ماسكەۋدە ءۇش مىڭنان اسا پاتەر قىسقا ۋاقىتقا، ياعني بىرنەشە ساعاتقا نەمەسە ءبىر كۇنگە جالعا بەرىلەدى. ەلدىڭ اساتاناسىنا كەلۋشىلەر  ءۇشىن دە، ماسكەۋلىكتەر ءۇشىن دە قىسقا ۋاقىتقا پاتەر جالداۋ ىڭعايلى. پاتەر يەلەرىنە بۇل بيزنەستەن جاقسى قاراجات تۇسەدى.  الايدا وسىنداي پاتەرلەردىڭ جانىندا تۇراتىن كورشىلەر ازاپ تارتادى، دەپ جازادى لەنتا.رۋ.

جالعا پاتەر الۋ بيزنەسىمەن كۇرەسۋدىڭ زاڭدى جولدارى جوق. 42 جاستاعى تاتيانا ءوزىنىڭ قارت اناسىمەن جانە 11 جاستاعى ۇلىمەن بىرگە  ەسكى ۇيدە تۇرادى. بۇل پاتەر وعان اتاسىنان قالعان مۇرا جانە مۇندا ونىڭ بىرنەشە ۇرپاعى تۇرعان. ۇستىڭگى قاباتتا تۇراتىن تاتيانانىڭ كورشىسى ايەلدىڭ ءومىرىن توزاققا اينالدىرعان. سول سەبەپتى امالى تاۋسىلعان  ايەل  ءوز ۇيىنەن كوشكىسى كەلەدى.

ايەلدىڭ ايتۋى بويىنشا، وسى پاتەردە قانشا تۇرسا دا، كورشىلەر اراسىنداعى داۋ-داماي تەز ءارى جەڭىل شەشىلەتىن. الايدا پودبارلىق كەمپىر-شالدار كوز جۇمعان سوڭ، ۇيلەردىڭ ءبىرشاماسى ولاردىڭ بالالارى مەن نەمەرەلەرىنە كوشكەن.

"پودەزدە 3 پاتەر جالعا بەرىلەدى، ءبىراق ولاردىڭ تۇرعىندارى تىنىش، ۇزاق قوناقتايدى، بارلىعىن تانيمىن. ال 5-قاباتتاعى بىرەۋى تۇپ-تۋرا بوردەلگە اينالىپ كەتتى.

ەڭ قىزىعى، بۇل پاتەر باياعىدا ءبىر مەكتەپتە وقىعان، قۇرداسىمنىڭ ءۇيى. بالا كەزدە دوس بولىپ، ءبىر ۇيىرمەلەرگە قاتىسقانبىز. ال ەندى مىنە، ءومىر دەگەن قالاي... ول مەنىڭ قاس جاۋىما اينالدى"،-دەيدى ايەل.

- كوپشىلىگى ءبىزدىڭ جاعدايدى تۇسىنە المايدى. سەبەبى تاۋلىك سايىن جالعا بەرىلەتىن پاتەردىڭ جانىندا تۇرىپ كورمەگەن. وسى جىلدىڭ وزىندە ءۇيدى ەكى رەت سۋ باستى، ءبىر رەت ءورت شىقتى، بىرنەشە رەت پوليسيا ارالاسقان داۋ-دامايدى باستان وتكەردىك. وتباسىلار، تۋريستەر، شەت جاقتان كەلگەندەر جالعا السا، ءبىر ءسارى. قارسى بولمايتىن ەدىم. ءبىراق مىنا پاتەرگە كىمدەر كەتىپ، كىمدەر كەلمەيدى. ءبىر جولى پوليسيامەن پاتەر ىشىنە كىرىپ كوردىم. شىن ايتسام، بالالاردى بۇل جەردەن 100 مەتر اۋلاق ۇستايتىن ەدىم. پاتەردىڭ ىشىندە جيھاز دا جوق، قوناق بولمەدە ۇلكەن تەلەديدار مەن ەكى الپامساداي ولەڭ تىڭدايتىن كولونكالار تۇر ەكەن. بولمەلەر قىزىل تۇسكە بويالعان-،دەيدى ايەل.

- مۇلدەم ۇيىقتامايمىن دەسەم، ارتىق ايتقانىم ەمەس. ءتۇن سايىن پاتەردە ايقاي-شۋ، قىزداردىڭ شىڭعىرعان داۋسى، ۇرىس-كەرىس، بي. جۇمىس كۇندەرى كەيدە تىنىشتالىپ قالادى، ال دەمالىس كۇندەرىمىز «وتە كوڭىلدى» وتەدى.  جازدا ءۇيدى تاستاپ، شەت جاقا دەمالۋعا كەتەمىز.

مەنىڭ 11 جاستاعى ۇلىم كەرەمەت كورشىلەرىمىزدىڭ «ارقاسىندا» جەزوكشە دەگەن كىم ەكەنىن ولاردىڭ  قانداي بولاتىنىن بىلەدى. كوپ جاعدايدا قىزدار باسپالداقتا وتىرىپ جىلايدى، تەمەكى شەگىپ وتىرادى، كەيدە قارقىلداپ كۇلىپ جاتادى. پاتەر ىشىندەگى سۋدى وشىرمەي كەتىپ جاتادى، سونىڭ سالدارىنان مەنىڭ ءۇيىمنىڭ توبەسى سارعايىپ، جارىلىپ كەتكەن.

ارينە، پاتەردى جالعا الاتىن ادامدارمەن دە، ونىڭ يەسىمەن دە تالاي رەت كەلىسىمگە كەلۋگە تىرىستىق. جالعا بەرۋشىلەر كوپ دەگەندە كەشىرىم سۇراپ قۇتىلادى دا، ارى قاراي ءوز دەگەندەرىن ىستەي بەرەدى. ال پاتەر يەسىنە كەلەتىن بولساق، باياعىدا  مەنىڭ كوز الدىمدا قالعان جاقسى بالادان ەشتەڭە قالماعان، ءقازىر ول بارلىعىنا نەمقۇرايلى قارايتىن  جىگىتكە اينالعان. كەيدە ايتقاندارىمىزدى مۇلدەم ەستىمگەن كەيىپ تانىتادى. ءبىر جولى انامدى بوقتاپ تاستادى.  

پوليسيا بىزگە كەلىپ شارشادى، سەبەبى ولاردىڭ قولىنان ەشتەڭە كەلمەيدى. كەلەدى دە، پاتەردى جالداۋشىلاردىڭ قۇجاتتارىن تەكسەرەدى. قاتتى شۋلاماۋدى وتىنەدى، بولدى.

ءبىر جولى پاتەردە بىرەۋدى زورلاپ جاتقانداي داۋىستار ەستىلدى. ءبىز قاتتى شوشىپ كەتىپ پوليسيا شاقىردىق. قىز ءۇشىن قورىقتىق. الايدا پاتەردەگى قىز وندا ءوز ەركىمەن كەلگەنىن ايتتى دا، ءبىز بولساق قۇقىق قورعاۋ ورگاندارىنىڭ الدىندا اقىماق بولىپ قالدىق، - دەيدى ول.

ءقازىر ايەل ۇلى، اناسىمەن بىرگە جاڭا ءۇي ىزدەپ جاتىر.

"سەبەبى مۇنداعى ايقاي-شۋجان شارشادىق. پاتەردى ساتۋىمىزدىڭ سەبەبىن ءۇيدى ساتىپ الۋشىلارعا نە دەپ تۇسىندىرەمىز. وتىرىك ايتقان ۇيات، الايدا شىندىقتى ايتساق پاتەردى ەشكىم ساتىپ الماۋى دا مۇمكىن. ارينە، مەن، انام، ۇلىم تۋىس وسكەن پاتەردى دە قيمايدى ەكەنسىڭ"...- دەيدى ايەل.