كەشەگى ۇكىمەتتىڭ كەڭەيتىلگەن ماجىلىسىندە "مەملەكەت قارجىسىنىڭ ەسەبىنەن ءوز اتا-بابالارىنىڭ مەرەيتويىن وتكىزۋدى دوعارۋ كەرەك. سونىمەن قاتار، ءجون-جوسىقسىز اتاۋلى كۇندەردى مەرەكەلەۋدى دە مۇمكىندىگىنشە قازىرشە ازايتا تۇرعانىمىز ابزال. مەن ءوزى ۇلى تۇلعالاردى دارىپتەۋگە ارنالعان مۇنداي شارالاردى وتكىزۋدى قولدايمىن. دەسەك تە، ۇيىمداستىرۋ كەرەك بولىپ جاتسا، مەملەكەتتىڭ اقشاسىنا ەمەس، دەمەۋشىلەردىڭ قولداۋىمەن ات شاپتىرىپ، اس بەرسىن. وعان قارلىسىعىم جوق. ءبىراق، مەملەكەتتىك دەڭگەيدە وڭدى-سولدى توي تويلانباۋىن ۆيسە-پرەمەر بەردىبەك ساپاربايەۆقا تاپسىرامىن. ونداي جيىن-تويعا جۇمسالار قاراجاتقا بالالارىمىزدى وقىتىپ، ەمدەگەنىمىز ءجون بولار، - دەدى نۇرسۇلتان ءابىش ۇلى. وتە دۇرىس ايتىلعان ءسوز. بۇل جاعىنان ورالمانداردىڭ بەتى جارىق! ۇكىمەت الىستان كەلگەن اعايىننان ۇلگى العانى ءجون! ءبىزدىڭ قانداستارىمىز مۇنداي تويلاردى مەملەكەتكە گرامم سالماق سالماي-اق، ءوز قارجىلارىنا كەڭ اۋقىمدى، ءمان-ماعانالى ەتىپ حالقارالىق دەڭگەيدە وتكىزىپ كەلەدى. مىسالى، 2013 جىلى وتكەن جاكۋلا بولىستىڭ 150 جىلدىعى، وتكەن جىلى تويلانعان ەر جانىبەكتىڭ 300 جىلدىعى. ول از دەسەڭىز، بىلتىر 22-قازاندا ەلباسى "كەلەسى 2015 جىلى قازاق حاندىعىنىڭ 550 جىلدىعىن اتاپ وتەمىز" دەپ ايتىپ، اۋىز جيعان جوق، "قامشى.كز" پورتالى تاعى دا سول شەگارا اسىپ كەلگەن اعايىنداردىڭ دەمەۋشىلىگىمەن بايگە كولەمى 3 000 000 تەڭگە تۇراتىن شىعارماشىلىق بايگە جاريالاپ ۇلگىردى. وتانعا ماحاببات دەپ وسىنى ايت!