جۋىردا قىتايلىق ميللياردەر ءولىم جازاسىنا كەسىلدى دەگەن اقپارات بارلىق باق-تا جانە الەۋمەتتىك جەلىلەردە كەڭ تارادى. ۇيىمداسقان قىلمىستىق توپ قۇرادى دەگەن ايىپپەن ءولىم جازاسىنا كەسىلگەن قىتايلىق مۋلتي ميللياردەر ليۋ حان دەگەن كىم؟

9 اقپاندا بەلگىلى بولعانداي 48 جاستاعى قىتايلىق مۋلتي ميللياردەر ليۋ حان ءوزىنىڭ قىزمەت جولىندا الەمدەگى ەڭ ءىرى كەڭ ءوندىرۋ ورنى سانالاتىن "حان ءلۋندى" باسقارعان بولاتىن. سونداي-اق، قىتايداعى ەڭ باي 100 ادامنىڭ قاتارىندا كىرگەن ليۋ مەملەكەتتىڭ قىلمىستىق كودەكسىنىڭ 13 بىردەي بابى بويىنشا، ۇيىمداسقان قىلمىستىق توپ قۇرۋ، بانديتيزم، كىسى ءولتىرۋ ءىسى، زاڭسىز قارۋ-جاراق ساۋداسى ت.ب. ايىپتالىپ، كەيىننەن ءولىم جازاسىنا كەسىلگەن.

ليۋ حاننىڭ ءومىرىن "بريگادا" سەريالىنىڭ قىتايلىق نۇسقاسىنا ۇقساتۋعا بولاتىن سەكىلدى. نەبارى 26 جاستاعى سىچۋاندىق ليۋ 90 جىلدارى ءوزىنىڭ جەكە كاسىبىن باستايدى.

ول سىچۋان ولكەسى ديرەكتورلار كەڭەسى ءتوراعالىعىنا ءۇش مارتە سايلانادى. ليۋ تۋرالى ايگىلى "فوربس" باسىلىمى 40 ملرد يۋان قازىناسىمەن "سۋ استىنا جاسىرىنعان ميلليونەر ليۋ حان" دەپ جازادى.

بايلىق پەن بيلىكتىڭ شىڭىنا شىققىسى كەلەتىندەر كوپ-اق. ءبىراق، بۇل ءۇشىن قاجىر مەن قايرات، تاۋەكەل مەن جۇرەك كەرەك ەكەنىن ناق تۇسىنگەن ليۋ 90-جىلدارى، اعاش جانە قۇرلىس ماتەريالدارىنىڭ باعاسى شارىقتاپ تۇرعان قيىن كەزەڭدەردە  ساۋدانىڭ ءساتىن تاۋىپ پايداعا بەلشەسىنەن باتادى.

ونىڭ اينالاسىنا ءوزىنىڭ جاقىن تۋىستارى مەن دوستارى تەگىس جينالادى. ايگىلى "بريگادانىڭ" وڭ قولى، ءارى ءليۋدىڭ باستى كەڭەسشىسى ونىڭ ءىنىسى ليۋ ۆەي ەدى.

كەيىن ميللياردەر اتانعان ءليۋدىڭ اگرەسسيۆتى باسەكەلەستەرى ءبىرىنىڭ ارتىنان ءبىرى قۇلدىراپ جاتتى. ليۋ حاننىڭ ايقىن پوتەنسيالىنا دەس بەرمەگەندەر وعان جول بەرىپ جاتتى. ال ليۋگە قارسىلار اجال قۇشاتىن. الايدا قانداي دا ءبىر سەبەپتەرمەن بۇل ولىمدەردىڭ بەتى اشىلمايتىن نەمەسە ءىز-تۇسسىز جوعالىپ كەتەتىن.

سىچۋاننىڭ نەگىزگى بايلىعى-كومىر جانە مينەرالدى كەن وندىرىستەرى. 1997 جىلى باسقا باسەكەلەستەرىن جولدا قالدىرعان ليۋ حان ايگىلى "حان لۋن" كورپوراسياسىن قۇرادى. سىچۋانداعى بارلىق كەن ورىندارى"حان ءلۋننىڭ" يەلىگىنە تيەسىلى بولدى.

قارقىندى دامىپ كەلە جاتقان جۇڭگو ەكونوميكاسىنا وسىنداي كەن ورىندارىنىڭ تيگىزەر پايداسى ۇشان تەڭىز ەدى. وسى تۇستا "حان لۋن" جۇڭگو بيرجاسىنداعى، ارتىنان الەمدىك بيرجاداعى  ءىرى ويىنشىعا اينالدى.

XXI عاسىر تابالدىرىقتان اتتاعان تۇستا ءليۋدىڭ كورپاراسياسى تاۋ-كەن ونىرىسىنەن بولەك ەنەرگەتيكا، قۇرىلىس، ءتىپتى تۋريستىك بازالارعادا يەلىك ەتە باستادى. 2011 جىلى "حان لۋن" كورپاراسياسى امەريكا، افريكا جانە اۋسترالياعا قارجىلاي كومەك بەرەدى.

ليۋ حاننىڭ نەگىزگى ارقاسۇيەرى قحر قوعامدىق قاۋىپسىزدىك ءمينيسترى بولعان چجوۋ يۋنكان(2002-2007جج) ەدى.

2012 جىلى ءتۇرلى قىلمىستىق توپتاردى قۇرىقتاۋ بارىسىندا چجوۋ يۋنكان قىزمەتىنەن بوساپ، ۇستىنەن تەرگەۋ جۇرگىزەدى. 2014 جىلى تەرگەۋ بارىسىندا چجوۋدىڭ ۇيىنەن 14،5 ميلليارد دوللار تاركىلەنىپ، جۇزدەگەن سىبايلاستارىنىڭ باسىنا ءقاۋىپ تونەدى. 2014 جىلى چجوۋ يۋنكانعا اسا ءىرى كولەمدە پارا العان دەگەن ايىپ تاعىلىپ، ءۇي قاماققا الىنادى. يۋنكان جازادان جەڭىل قۇتىلعانىمەن، ليۋ حان مەن ونىڭ ءىنىسى تۇتقىندالادى. وسىلايشا ايگىلى "بريگادا" سانالىپ كەلگەن "حان لۋن"كورپوراسياسى توقىراۋعا ۇشىرايدى.

ليۋ حاننىڭ  قىلمىستىق ىسىنە قاتىسى بار دەگەن 36 ادام قامالىپ، ءسوتىسى 2 ايدان استام ۋاقىت قارالادى.

2014 جىلدىڭ مامىرىندا وتكەن سوتتىڭ العاشقى ينستانسياسىندا-ليۋحان مەن ونىڭ ءىنىسىن جانە كورپوراسيانىڭ ءۇش بىردەي ليدەرىن ءولىم جازاسىنا، تاعى بەس قىزمەتكەردى 2 جىل قاماۋعا، ارتىنان ءولىم جازاسىنا كەسەدى، سونىمەن قاتار،  ەكەۋىن ءومىر باقي باس بوستاندىعىنان ايىرۋعا، جانە 22ءسى ءتۇرلى مەرزىمدى قاماۋعا الىنادى.

ول داۋرەنى تاسىپ تۇرعان تۇستا 2008 جىلى قىتايدا بولعان ءىرى جەر سىلكىنىسىنەن زارداپ شەككەندەرگە 50 ميلليون كومەك بەرەدى. (قازاقستان ءدال سول كەزدە ءزىلزالادان زارداپ شەككەندەرگە 681،1 مىڭ يۋان كومەك كورسەتكەن بولاتىن)

2008 جىلى 43 جاستاعى ليۋ حان حالىققا قايىرىمدىلىق رەتىندە 127 ميلليون يۋان بەرىپ، 2009 جىلى 270 ميلليون يۋان بەرىپ  قىتايداعى ەڭ جاس ءارى ەڭ كوپەس مەيىرىمدى جان اتانادى.

ليۋ حان جۇڭگو تاريحىنداعى تاسى ورگە دومالاعان، ارتى ءولىم جازاسىنا كەسىلگەن ميللياردەرلەردىڭ الدى ەمەس، ءتىپتى ونىنشىسى دا.