تەگىن تاماقتاناتىن وقۋشىلار سانى قىسقارمايدى دەپ مالىمدەدى ءبىلىم جانە عىلىم ءمينيسترى اسلان ءسارىنجىپوۆ.

"بۇل جەردە قانداي دا ءبىر وزگەرىستەر بولمايدى، ياعني تەگىن تاماقتاناتىن الەۋمەتتىك توپقا جاتاتىن بالالار تەگىن تاماقتانۋدى جالعاستىرا بەرەدى. جەرگىلىكتى قاراجات مۇمكىندىگىنشە تەگىن تاماق ۇسىنىلا بەرەدى. قازىرگى تاڭدا ءبىز قىسقارتۋ جاعىن قاراستىرىپ جاتقان جوقپىز"، - دەدى ءسارىنجىپوۆ بەيسەنبىدەگى بريفينگتە.

ونىڭ ايتۋىنشا، قازىرگى تاڭدا وقۋشىلاردىڭ 30% -ى تەگىن تاماقتانادى.

"قازىرگى تاڭدا جەرگىلىكتى بيۋدجەت ەسەبىنەن بالالاردىڭ 30%-ى تەگىن تاماقتانادى. ول بارلىق الەۋمەتتىك توپتى قامتيدى، كەيبىر وڭىرلەردە باستاۋىش سىنىپ وقۋشىلارى دا تەگىن تاماقتانادى"، - دەدى بعم باسشىسى.

ەسكە سالساق، جاقىندا ۇكىمەتتىڭ كەڭەيتىلگەن وتىرىسى بارىسىندا مەملەكەت باسشىسى نۇرسۇلتان نازاربايەۆ اتا-انالار بالالارىنىڭ ايرانى مەن توقاشىن وزدەرى ساتىپ الۋلارى كەرەك دەپ مالىمدەگەن بولاتىن.

"سونداي-اق مەكتەپتەگى بالالار تاماقتانۋى بويىنشا. اتا-انالار ءوز بالالارىنىڭ تاماقتانۋىن قامتي الماي ما؟ ءبىز ءبارىمىز دە وقىدىق، قالتامىزعا اقشا سالاتىن، قوڭىراۋ كەزىندە ايران مەن توقاش (ساتىپ الاتىنبىز – قازتاگ) جانە سولاي ءومىر سۇردىك. مەملەكەت ءبىلىم سالاسىنىڭ، مۇعالىمدەردىڭ، وقۋلىقتاردىڭ، مەكتەپتىڭ بارلىق شىعىنىن ءوزى كوتەرەدى، ال ەندى مىنا ىسكە (وقۋشىلاردى تاماقپەن قامتۋ) اتا-انالار وزدەرى شىعىندانۋى كەرەك. سوندىقتان بۇعان سانالى تۇردە كەلەيىك"، - دەدى نۇرسۇلتان نازاربايەۆ. KazTAG