گونكونگتا جاڭادان تۋىلعان قىز بالا جۇكتى بولىپ شىقتى، ونىڭ قۇرساعىنان ەكى ۇل بالانىڭ ەمبريونى انىقتالدى، - دەپ حابارلايدى Live Science.
باسىندا دارىگەرلەر جاڭا تۋعان سابيدە ىسىك بار دەپ كۇدىكتەنگەن، ول گينەكولوگتەردىڭ ەرەكشە باقىلاۋىنا الىندى. ۋلترادىبىستىق تەكسەرۋدىڭ ناتيجەسىندە ونىڭ قارنىندا بوگدە زاتتاردىڭ بارى انىقتالدى. تۋعانىنا ءۇش اپتا بولعان قىز بالاعا وپەراسيا جاساعان كەزدە ونىڭ باۋىرى مەن بۇيرەگى اراسىنان ەكى شارانا تابىلدى. ءبىرىنىڭ سالماعى - 9،3 گرامم، ەكىنشىسى - 14،2 گرامم، ياعني ولار جۇكتىلىكتىڭ سەگىزىنشى جانە ونىنشى اپتاسىندا بولعان. شارانالاردىڭ كىندىگى قىزدىڭ ىشىندەگى پلاسەنتا ءتارىزدى ماسساعا جالعانىپتى.
ەمبريوننىڭ ىشىندە ەمبريوننىڭ بولۋى ورتاشا ەسەپپەن جارتى ميلليون جۇكتىلىك جاعدايىندا ءبىر رەت كەزدەسەدى. عالىمدار اراسىندا ونىڭ پايدا بولۋ سەبەبى جونىندە داۋلى پىكىرلەر بار. دۇنيەجۇزىلىك دەنساۋلىق ساقتاۋ ۇيىمى نارەستەنىڭ قۇرساعىنداعى ۇرىق ىسىكتىڭ ءبىر ءتۇرى دەپ ەسەپتەيدى، ال گونكونگ دارىگەرلەرى بولسا، كىشكەنتاي پاسيەنت جۇكتى ەمەس، اناسىنىڭ جۇكتىلىگى بارىسىندا ونىڭ اعزاسىنا بەلگىسىز سەبەپپەن قۇرساقتاس قوس سىڭارى ەنىپ كەتكەن دەپ وتىر.
قازىرگى زامانعى مەديسينا تاريحىندا مۇنداي جاعداي بارلىعى 200 رەت تىركەلگەن.
