"شەتەلدەگى 5 ميلليوننان استام اعايىندى الاڭداتىپ وتىرعان "كوشى-قون تۋرالى" زاڭدى بۇگىن ماجىلىسكە قازاق تىلىندە سويلەمەك تۇگىلى، تۇسىنبەيتىن دەنساۋلىق ساقتاۋ جانە الەۋمەتتىك دامۋ ۆيسە-مينيسترى تانىستىردى. داۋلەت ارعىندىقوۆ ورالمانداردىڭ ازاماتتىق الۋى تۋرالى قازاقشا ساۋالداردى ۇعا الماي، وعان دەپۋتاتتاردىڭ ورىس تىلىنە اۋدارىپ بەرۋىنە تۋرا كەلدى"، – دەپ حابارلادى 31 تەلەارنا جاڭالىقتارى.

قازاقستان رەسپۋبليكاسىنىڭ ۇلتتىق قاۋىپسىزدىگى مەن ۇلتتىڭ بولشاق تاعدىرىنا ساياتىن بۇنداي ماڭىزدى ماسەلەنىڭ وسىلايشا قارسىلىقتار مەن كەدەرگىلەرگە ۇشىراۋى زيالى قاۋىمدى ۇمىتسىزدەندىرىپ وتىر.  ەندى ءبىر جاعىنان، بۇل زاڭدى قابىلداپ، قانداستاردىڭ ورالۋىنا داڭعىل جول اشۋ – پرەزيدەنتىمىز نۇرسۇلتان نازاربايەۆتىڭ تاپسىرماسى ەكەنىن بىرەۋلەر ۇمىتىپ قالعان سەكىلدى. مۇمكىن ادەيى بولۋى دا عاجاپ ەمەس. بىزدە سول سيۋجەتكە وراي وز پىكىرىمىزدى ءبىلدىرۋدى ءجون كوردىك.

بىرىنشىدەن، قازاق ءتىلىن تۇسىنبەيتىن ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى داۋلەت ارعىندىقوۆتىڭ زاڭ جوباسىن دايىنداۋى مەن ۇيالماي كەلىپ وزگە تىلدە تانىستىرۋى - ءتىل مەن ۇلتتى، ءماجىلىس پەن ماجىلىسمەندەردى، قانداستاردى، قازاقتاردى قورلاۋ. ق ر اتا زاڭىن، ق ر ءتىل تۋرالى زاڭىن، ازاماتتاردىڭ ازاماتتىق قۇقىن بۇزعاندىق. سوندىقتان ول زاڭ الدىندا جاۋاپ بەرۋى ءتيىس.

ەكىنشىدەن، ءبىر ءبولىم ماجىلىسمەندەر "ورىس ءتىلىن بىلمەيتىندەردى - ساۋاتسىز سانايدى". ايتپەسە، قانداستارىمىزدىڭ زور ينۆەستيسيالىق كاپيتال  مەن ادامي كاپيتال ەكەنىن بىلمەۋى – ساياسي ءارى ازاماتتىق ساۋاتسىزدىق بولار ەدى. مىسالى، ق ر پارلامەنتى ءماجىلىسىنىڭ دەپۋتاتى ساميعوللا ورازوۆ "قازاقشا ايتقاندا سانى بار دا ساپاسى جوق. كەلگەندەردىڭ 70 پايىزى جۇمىسسىزداردىڭ قاتارىن تولىقتىرادى. ولاردىڭ سانى ءبىز دە ونسىزدا 2 جارىم ملن نان اسادى" دەدى.

ءۇشىنشىدەن، ءبىر جىل ىشىندە ازاماتتىق الۋعا مىندەتتەپ، تاعى دا سەرگەلدەڭگە ءتۇسىرۋ مۇمكىن. ەگەر ءبىر جىل ىشىندە ازاماتتىق الماسا ىقتيارحات پەن باسقا دا جەڭىلدىكتەردەن ايىرماق.  بۇل تۋرالى دا ءبىر دەپۋتات ۇسىنىس جاساعان. سەبەبى، وسىلاي بولسا، ورالمان اعايىنداردىڭ بۇرىنعى مەكەنىنە بارۋ-كەلۋىنە قيىندىق تۋىپ، بەلگىلى مولشەردە دۇنيە-مۇلىكتەرى مەن زەينەتاقىلارىنان ايىرىلادى. بۇل دا حالىقارالىق قۇقىقتىق نورمالاردى نەگىزگە الماي، جاداعاي شەشىم جاساعاندىق بولماق.

 تورتىنشىدەن، اتالمىش 2 انىقتامانى: "سوتتالماعانى تۋرالى انىقتاما" مەن "ءوزى كەلگەن ەلىنىڭ ازاماتتىعىنان شىققانى نەمەسە باسقالاي رۋحسات انىقتاماسىن اكەلۋ تۋرالى انىقتامانى " الىپ تاستاماسا، جاڭا زاڭ ءبارىبىر قانداستار ءۇشىن ەشقانداي پايداسىز بولىپ قالماق.  سەبەبى  ۇكىمەتتىڭ 111 ءنومىرلى قاۋلىسى  قىتايدان ورالاتىن قانداستارىمىزدىڭ تۇراقتى تىركەۋگە تۇرۋىن زاڭدىق تۇرعىدان شەكتەپ وتىر. ايتا كەتەيىك، قىتايداعى قانداستار جالپى قازاق ۇلتى سانىنىڭ  1/8ء-ى، شتەلدەگى قانداستاردىڭ  1/3ء-ى.

التاي بۇقاربايەۆ