«قازاقستان داۋىسى» تانىمال مۋزىكالىق جوبانىڭ جەڭىمپازى اتاعىنا ءتورت ۇمىتكەردىڭ قايسىسى يە بولادى؟ «قازاقستان داۋىسى» مەگا-جوباسىنىڭ باس سىيلىعى - 5 ملن. تەڭگە كىمگە بۇيىرادى؟ وسىنىڭ بارلىعى الداعى جەكسەنبى كۇنى بەلگىلى بولادى.

شوۋ-بيزنەس الەمىندەگى ەڭ تانىمال مۋزىكالىق جوبانىڭ وزىق شىققان ءتورت ۇمىتكەرىمەن جاقىن تانىس بولىڭىزدار.

ەكى بالانىڭ اكەسى جانە قولونەرشى بولۋدى ارماندايتىن ماقسات ماقۇلبەكوۆ

ماقسات ماقۇلبەكوۆ – «قازاقستان داۋىسى» مەگا-جوبانىڭ گراند-فينالىنا شىققان ءتورت ۇمىتكەردىڭ ءبىرى. تالىمگەرى – مەدەۋ ارىنبايەۆ. فينالعا شىققان ۇمىتكەرلەردىڭ ىشىندە وتباسىن قۇرعان جالعىز قاتىسۋشى.

جوباعا كەلگەنگە دەيىن اباي اتىنداعى ماوبت-تا قىزمەت ەتتى، «اڭسار» توبىنىڭ ءانشىسى. قىزىلوردا قالاسىنداعى قازانعاپ اتىنداعى مۋزىكا كوللەدجىنىڭ تۇلەگى. قازىرگى ۋاقىتتا قۇرمانعازى اتىنداعى قازاق ۇلتتىق كونسەرۆاتوريانىڭ ماگيسترانتى.

ۇيلەنگەن. ەكى بالاسى بار. ومىرىندەگى ەڭ باقىتتى ساتتەرىنىڭ ءبىرى – مەيىرجان مەن ميراس اتتى ەكى ۇلىنىڭ دۇنيەگە كەلگەن كۇندەرى. بوس ۋاقىتىن وتباسىمەن وتكىزگەندى ءجون كورەدى. ماقساتتىڭ ۇستانىمى: «ناعىز وتباسى – بۇل ءوزىڭدى جاقسى كورەتىن جانە ءاردايىم كۇتىپ تۇراتىن قورعانىڭ، بۇزىلماس قامالىڭ».

بالا كەزىندە دجەكي چاندى، جان كلود ۆان داممدى ءپىر تۇتقان. بۇل اۋەسقويلىعىن كۇرەسكە قاتىسىپ، وسىنداي ءىرى دەنەلى اكتەرلەردى ۇناتاتىنىمەن تۇسىندىرەدى.

ماقسات يتالياندىق تەنور لۋچانو ءپاۆاروتتيدىڭ تۋىندىلارىن جالىقپاي تىڭدايدى. «ەگەر ءان ايتپاعان جاعدايدا، كۇرەسپەن نەمەسە جيھاز جاسايتىن سەح اشىپ، ۇستا بولار ما ەدىم؟!»، - دەپ سىرىن اقتارادى.

ينديرا ەدىلبايەۆا ءاندى عانا جاقسى ايتىپ قويمايدى، سونىمەن قاتار اعىلشىن ءتىلىن جەتىك مەڭگەرگەن

«قازاقستان داۋىسى» مەگا-جوباسىنىڭ كەلەسى ۇمىتكەرى – ينديرا ەدىلبايەۆا. اتىراۋدا دۇنيەگە كەلگەن. 7 جاسىنا دەيىن اقتاۋدا، كەيىن اقتوبەدە وسكەن. سوڭعى ەكى جىل بويى الماتى قالاسىندا تۇرادى. جۇبانوۆ اتىنداڭى اقتوبە مەملەكەتتىك ۋنيۆەرسيتەتىن اعىلشىن جانە نەمىس تىلدەرىنىڭ اۋدارماشىسى ماماندىعى بويىنشا اياقتاعان.  ومىرلىك ۇستانىمى: «قانداي جاعداي بولماسىن، ءوز قالپىڭنان تايما!». تالىمگەرى – ءمادينا سادۋاقاسوۆا.

«قازاقستان داۋىسى» مەگا-جوباسىنا دەيىن ينديرا ۆوكالدى-اسپاپتى انسامبلدە تاجىريبە جيناقتاپ، جۇمىس ىستەدى. اتالعان جوبا ينديرا ءۇشىن كوكەيىندە جۇرگەن ارمانىنا اپاراتىن جول.

ينديرا وتباسىندا جالعىز بالا. 13 جاسىندا اكەسى دۇنيەدەن ءوتتى. ينديرا: «انام  اكەمنىڭ، اعام مەن اپكەمنىڭ ورنىن باسقان اقىلشىم، تىرەگىم»، - دەپ ءوز ويىمەن بولىسەدى.

«انام، مەكتەپتە اعىلشىن تىلىنەن ساباق بەرەدى. انامنىڭ ارقاسىندا اعىلشىن تىلىنە، شەتەل اندەرىنە دەگەن قىزىعۋشىلىعىم وياندى. ءالى ەسىمدە، 5 جاسار كەزىمدە انام ماگنيتافوننان Mariah Careyء-دىڭ تاسپالارىن قوساتىن، ونىڭ اندەرىنە بيلەپ، ىڭىلداپ ءان سالىپ، ءۇي شارۋاسىمەن اينالىساتىنبىز»، - دەيدى ينديرا.

جەكە قالعاندا Sade اتتى ءانشىنىڭ اندەرىن تىڭداۋدى ۇناتادى. «جانىمدى تەربەتەر، داۋىسى كەرەمەت انشىلەردىڭ ءبىرى. مەن ءبىر باعىتتاعى عانا مۋزىكانى تىڭدامايمىن، روكتى دا، كەيدە قازاقتىڭ حالىق اندەرىن دە تىڭدايمىن»، - دەيدى ينديرا.

«ەگەر ءان ايتپاساڭ، نەمەن اينالىسار ەدىڭ؟»، - دەگەن سۇراققا: «شەتەل كومپانياسىندا ماماندىعىم بويىنشا اۋدارماشى بولىپ قىزمەت ىستەر ەدىم. انام ءومىر بويى اۋدارماشى بولعانىمدى جانە ءومىرىمدى اعىلشىن تىلىمەن بايلانىستىرعانىمدى قالايتىن، ءبىراق مەن ءان ايتۋدى ءجون كوردىم»، - دەپ جاۋاپ بەردى.

دانيار يسمايلوۆ دومبىرانى اسقان شەبەرلىكپەن تارتادى جانە اسكەري وركەستردىڭ جەكە ورىنداۋشىسى

«قازاقستان داۋىسى» مەگا-جوباسىنىڭ ءۇشىنشى ۇمىتكەرى - دانيار يسمايلوۆ. تالىمگەرى – نۇرلان البان. دانيار تۇركىستان قالاسىنىڭ تۋماسى، شىمكەنت قالاسىنداعى ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتى  ونەر فاكۋلتەتىنىڭ تۇلەگى. قازىرگى ۋاقىتتا الماتى قالاسىنداعى اسكەري وركەستردىڭ جەكە ورىنداۋشىسى. مىنەزى سالماقتى. «قازاقستان داۋىسى» جوباسىنا دەيىن كوللەدج ستۋدەنتتەرىنە دومبىرا تارتۋدى ۇيرەتەتىن.

ءان شىعارىپ، تەرمە ورىندايدى. ارمانى اتاقتى ءانشى بولۋ. قازاقستاننىڭ ەسترادا ورىنداۋشىلارىن ءجيى تىڭدايدى. بالا كەزىنەن دوسحان جولجاقسىنوۆتى، نۇرلان ونەربايەۆتى، بەكبولات تىلەۋحاندى ءپىر تۇتادى. ومىرىندەگى ەڭ قۋانىشتى ءساتى مەكتەپتى ۇزدىك اتتەستاتقا اياقتاعان كەزى. «ەگەر ءانشى بولماسام، بيزنەسكە كەتەر ەدىم»، -  دەيدى دانيار.

«قازاقستان داۋىسى» جوباسى بولماسا، مۇنايشى بولار ەدىم» - باۋىرجان رەتبايەۆ

«قازاقستان داۋىسى» مەگا-جوباسىنىڭ سوڭعى ۇمىتكەرى - باۋىرجان رەتبايەۆ. تالىمگەرى – الماس كىشكەنبايەۆ. ماڭعىستاۋ وبلىسىنىڭ تۋماسى. قازىرگى ۋاقىتتا ت.جۇرگەنوۆ اتىنداعى قازاق ۇلتتىق ونەر اكادەمياسىندا ەسترادا ۆوكالى ماماندىعى بويىنشا ءبىلىم الۋدا. 2013 جىلى ش.قالداياقوۆ اتىنداعى حالىقارالىق كونكۋرستىڭ ءۇشىنشى ورىن جۇلدەگەرى.

سپورتپەن شۇعىلدانادى. ناقتى ايتقاندا، وتاندىق فۋتبولدىڭ جانكۇيەرى. انشىلەردەن مەيرامبەك بەسپايەۆتىڭ، اقىلبەك جەمەنەيدىڭ جانە «زامان» توبىنىڭ اندەرىن تىڭدايدى.

تۋعان-تۋىستارى جانە جاقىندارى ەركەلەتىپ، «باۋكاباي» نەمەسە «باۋكا» دەپ اتايدى.

ومىرىندەگى ەلەۋلى وقيعالاردىڭ ءبىرى تۋعان كۇنىن اتاپ وتكەن يتالياعا جاساعان ساپارى.

«ەگەر ءانشى بولماسام، جەرلەستەرىمنىڭ باسىم كوپشىلىگى سياقتى مۇنايشى بولار ما ەدىم؟»، -دەپ، باۋىرجان ويىمەن بولىسەدى.