قازاقستاننىڭ ورتا مەكتەپتەرىنە فۋتبول ءپان رەتىندە ەنگىزىلۋى مۇمكىن. بۇل جايىندا قازاقستان فۋتبول فەدەراسياسىنىڭ پرەزيدەنتى ەرلان قوجاعاپانوۆ ۋەفا باسپا ءسوز قىزمەتىنە بەرگەن سۇحباتىندا مالىمدەدى.

"ءبىز فۋتبولدى ورتا ءبىلىم بەرۋ جۇيەسىنە ەنگىزۋدى جوسپارلاپ وتىرمىز جانە بۇل ۇسىنىمىزدى ۇكىمەتتىڭ الدىنا قويدىق. ءقازىر بۇل ماسەلەنى پارلامەنتتىڭ قاراۋىنا ۇسىنباقپىز. ءبىزدىڭ ەلدە فۋتبولعا قىزىعۋشىلىق تانىتىپ،  اينالىسقىسى كەلەتىندەر وتە كوپ. ءبىراق، ولاردىڭ بارلىعىندا مۇمكىندىك جوق. اسىرەسە، كۇننىڭ سۋىعىندا. سول ءۇشىن توبەسى جابىلاتىن الاڭدار كەرەك"، -  دەدى قوجاعاپانوۆ.

قفف پرەزيدەنتى اتاپ وتكەندەي، ول ءوز ارىپتەستەرىمەن قازاقستانداعى فۋتبول دەڭگەيىنىڭ تىم تومەندىگى جايىندا كوپ تالقىلاعان. ال ونىڭ باستى سەبەبى فۋتبول ينفراقۇرىلىمىنىڭ دامىماۋى دەگەن ناتيجەگە كەلىپتى.

"ءبىزدىڭ ەلدىڭ باسىم بولىگىندە قىس ۇزاققا سوزىلادى. ال جاستارىمىز جىل ون ەكى اي جاتتىعۋى ءۇشىن توبەسى جابىق فۋتبول الاڭدارى قاجەت. ەگەر، 1 الاڭ 100 مىڭ ادامعا جەتەدى دەپ ەسەپتەسەك، قازىرگى تاڭدا ولاردىڭ سانى 170 بولۋى كەرەك ەكەن. وكىنىشتىسى، فۋتبول نىساندارىن سالۋ قارجى جاعىنان وتە قيىن ماسەلە"، - دەدى ول.

اتالعان سالاداعى تاعى ءبىر ۇلكەن پروبلەما - بىلىكتى باپكەرلەردىڭ جوقتىعى. قوجاعاپانوۆتىڭ ايتۋىنشا، ءبىزدىڭ ەلدە ءبىر باپكەرگە 342 شاكىرتتەن كەلەدى ەكەن. ال انگليادا ءار باپكەرگە نەبارى ءۇش شاكىرتتەن تيەسىلى.

"سوندىقتان، ءبىز پلاتيني مىرزادان بىلىكتى باپكەرلەردى دايارلاۋعا كومەكتەسۋىن سۇرايمىز. بۇل ءبىزدىڭ ەلدەگى بالالار فۋتبولىنىڭ دامۋىنا ۇلكەن كومەك بولماق"، - دەيدى فەدەراسيا پرەزيدەنتى.