وز-وزىنە قول جۇمساۋ، ياعني سۋيسيد، بۇگىنگى قوعامنىڭ وزەكتى ماسەلەسىنە اينالعانى قاشان. ءتىپتى، بۇل ءسوزدىڭ ۇيرەنشىكتى بولىپ كەتكەنى سونشالىق، اتالمىش قۇبىلىس ەشقانداي ۇرەي تۋدىرمايتىنداي كورىنەدى، دەپ جازادى Qamshy.kz اقپارات اگەنتتىگى

قازاقستان رەسپۋبليكاسىنىڭ باس پروكۋراتۋراسى قۇقىقتىق ستاتيستيكا جانە ارنايى ەسەپ بويىنشا كوميتەتىنىڭ ءتوراعاسى باعدات ءمۋسيننىڭ مالىمدەۋىنشە ءبىزدىڭ ەل سۋيسيد فاكتىسى تىركەلۋ بويىنشا الەمدە ءتورتىنشى ورىندا تۇر. ستاتيستيكاعا ۇڭىلسەك، ەر ادامدار ايەلدەرگە قاراعاندا 4 ەسە ءجيى وز-وزىنە قول جۇمسايدى ەكەن. 2016 جىلى قازاقستاندا سۋيسيد 5،5 پايىزعا (3735-تەن 3942-گە) ارتتى جانە وز-وزىنە قول جۇمساۋ ارەكەتتەرى 2،1 پايىزعا (6047-دەن 5922-گە) دەيىن تومەندەدى. 2017 جىلدىڭ ءبىرىنشى توقسانىندا سۋيسيد كورىنىسى 8،7 پايىزعا (931-دەن 850-گە)، ال وزى-وزىنە قول جۇمساۋ ارەكەتتەرى 35،4 پايىزعا (1563-دان 1010-عا) دەيىن تومەندەگەن.

وسى كۇردەلى ماسەلەگە بايلانىستى ق ر قم راديوەلەكترونيكا جانە بايلانىس اسكەري-ينجەنەرلىك ينستيتۋتىندا اقپاننىڭ 19-ى مەن 28ء-ى ارالىعىندا جەكە جانە وتباسىلىق شيەلەنىستەردى ەسكەرتۋ جانە وزىنە-وزى قول جۇمساۋ كورىنىستەرىنىڭ الدىن الۋ جونىندە ونكۇندىك شارا ۇيىمداستىرىلدى. ينستيتۋت باسشىلىعى مەن پسيحولوگىنىڭ ۇيىمداستىرۋمەن جۋىردا كۋرسانتتارمەن ەرەجەسىز جەكپە-جەكتەن الەمنىڭ ءۇش دۇركىن چەمپيونى، ەرلىگىن – ەلگە مۇرا ەتكەن ارداق نازاروۆپەن كەزدەسۋ وتكىزىلدى.

سپيكەر جاس ۇرپاعىمىزدىڭ وتانعا دەگەن پاتريوتتىق رۋحىن كوتەرۋ، قازىرگى قوعامدا تامىرىن تەرەڭگە جايىپ بارا جاتقان جاستار اراسىنداعى ءوز–وزىنە قول جۇمساۋ وقيعالارىن بولدىرماۋ توڭىرەگىندە ءسوز سويلەدى. كۋرسانتتارعا قازاقتىڭ باتىرى باۋىرجان مومىش ۇلىنىڭ ەرلىگى، سۇراپىل سوعىس جىلدارىندا ءوزىنىڭ اسقان شەبەرلىگىمەن جاۋدىڭ بەتىن قالاي تويتارىس جاساعانى، سوعىس ونەرىنىڭ قىر-سىرىن مەڭگەرگەن بىلىكتى جاۋىنگەرلىك قاسيەتى جايىندا مول مالىمەتتەر ايتىلدى. ارداق، باتىر اعامىزدىڭ ەرلىكتەرى جونىندە جازىلعان بەلگىلى ورىس جازۋشىسى الەكساندر بەكتىڭ «ارپالىس» («ۆولوكولام شوسسەسى») پوۆەسىنە دە توقتالا كەتتى.

سونىمەن قاتار ارداق نازاروۆ اتا-بابالارىمىز، حاندارىمىز بەن باتىرلارىمىزدىڭ ەرلىكتەرىن دە ۇمىت قالدىرماي، ءتول تاريحىمىزدان دا دەرەكتەر كەلتىردى. تولە ءبيدىڭ تالىم-تاربيەسىندە بولعان ابىلايحاننىڭ بويىنا سىڭگەن قازاق دالاسىنىڭ دانالىعىن، بابا اقىلى مەن پاراساتىن، ەل بيلەۋ قابىلەتىن، انتالاعان جاۋعا قارسى قازاق حالقىنىڭ باسىن بىرىكتىرىپ تويتارىس بەرە العان باسشى قاسيەتتەرى تۋرالى كەرەمەت اڭگىمە قوزعادى.

كەزدەسۋدىڭ سوڭىندا ارداق باۋىرىمىز ومىرلەرىن اسكەري قىزمەتكە ارناعان ىنىلەرىنە: «سەندەر ەلىمىزدىڭ بولاشاعىسىڭدار. ەلدىڭ قورعانى ءارى تىزگىنۇستار ازاماتسىڭدار. قازاقتىڭ قانىنان سىڭگەن تەكتى قاسيەتىن بويلارىڭا ءسىڭىرىپ، باتىرلىق رۋحىن ساقتاپ، ەلىمىزدى بيىك بەلەستەرگە باستاپ، الىنباس قامال مەن بيىك شىڭداردى باعىندىرۋلارىڭ قاجەت.تەك قانا بىلەكتىڭ كۇشىنە ەمەس، سونىمەن قاتار بىلىمگە دە زەيىن قويعاندارىڭ ابزال» دەپ اعالىق اقىلىن ايتىپ، تىلەگىن ءبىلدىردى.

كۋرسانتتار كەزدەسۋ سوڭىندا بۇگىنگى كۇننىڭ باتىرى ارداق اعالارىمەن ەستەلىككە سۋرەتكە ءتۇسىپ، ودان العان كەرەمەت اسەرلەرىمەن ءبولىسىپ، قۋانىشتارىن جاسىرا المادى. بارلىعى دا ونىڭ ادالدىعىنا، تەرەڭ ويلى ازاماتتىق تۇلعاسىنا ءتانتى بولدى. ءبىر سوزبەن ايتقاندا، ارداق، ءىسى مەن ءسوزى سايكەس كەلەتىن جان.

داۋرەنبەكوۆا ساندۋعاش