قازاق كاسىپقوي بوكسشىسى قانات يسلام ءوزىنىڭ 19-كەزدەسۋىن 1 ناۋرىزدا ماسكەۋدە وتكىزەدى. ول گۋيدو نيكولاس پيتتومەن (ارگەنتينا) كەزدەسەدى. بۇل كەزدەسۋدە جەڭىسكە جەتكەن بوكسشى ورتا سالماقتا WBA International چەمپيوندىق اتاعىن يەلەنەدى. 27 جاستاعى پيتتو 22 كەزدەسۋ وتكىزىپ، 19 ماچتا جەڭىپ، ۇشەۋىندە جەڭىلگەن. ال 31 جاستاعى قانات يسلام 18 كەزدەسۋ وتكىزىپ، بارلىعىندا جەڭىسكە جەتكەن. قانات يسلام 18-كەزدەسۋىن 2014 جىلى تامىزدا وتكىزىپ، كولۋمبيالىق  فيدەل مونتەرروس مۋنوستى جەڭگەن ەدى. قىتايدا تۋعان ەتنيكالىق قازاق قانات يسلام 2008 جىلى پەكين وليمپياداسىنا سول ەلدىڭ اتىنان قاتىسىپ، قولا جۇلدە يەلەنگەن. ول 2010 جىلى قازاقستان ازاماتتىعىن الىپ، «استانا ارلاندارى» كلۋبىندا بوكستاسىپ ءجۇردى. بوكسشى 2012 جىلى لوندون وليمپياداسىنا اتاجۇرتىنىڭ اتىنان قاتىسۋىنا بايلانىستى ازاماتتىق-قۇقىقتىق داۋ تۋعان سوڭ كاسىپقوي بوكسقا بەت بۇرىپ، اقش-قا كەتكەن.