داۋلەت ارعىندىقوۆ مىرزا شەتتەگى ميلليونداعان قانداسىمىزدىڭ كوز تىگىپ وتىرعان زاڭ جوباسىن ورىسشا تانىستىردى. ول دەپۋتاتتاردىڭ قازاقشا ساۋالدارىن تۇسىنبەدى دە، ولاردىڭ ساۋالىن ورىسشا قويۋىن تالاپ ەتتى. ياعني، زاڭدى تانىستىرۋعا كەلگەن شەنەۋنىكتىڭ مەملەكەتتىك تىلدە سويلەۋى بىلاي تۇرسىن، تۇسىنبەۋى دەپۋتاتتاردىڭ دا، زاڭ جوباسىن تىڭداۋعا كەلگەن ورالمانداردىڭ دا سىنىنا ۇشىرادى. ويتكەنى الەۋمەتتىڭ مۇڭىن تىڭداپ، ولاردىڭ كوڭىلىنەن شىعاتىن زاڭ جاساۋ ءۇشىن ولاردىڭ تىلىندە سويلەپ، مۇڭىن دا مۇڭداي ءبىلۋ قاجەت. ونسىز تولىققاندى زاڭ قابىلداۋ مۇمكىن ەمەس. وكىنىشكە قاراي، دەنساۋلىق جانە حالىقتى الەۋمەتتىك قورعاۋ ءمينيسترى تامارا دۇيسەنوۆا حانىم ورالمانداردىڭ قۇقىقتىق ماسەلەلەرىن شەشۋگە بەل شەشىپ كىرىسكەنىمەن، ونىڭ قاراماعىنداعى شەنەۋنىكتىڭ مۇرنىنا بۇل ماسەلەنىڭ ءيىسى دە بارمايتىندىعى اڭعارىلىپ قالدى.

سونداي-اق، زاڭ جوباسىنا قاتىسۋشى جۇمىس توبىنىڭ وكىلدەرى بۇگىندە تۇراقتى تىركەۋىنىڭ مەرزىمى اياقتالعان، قازاقستاننان دەپورتاسيالانۋى ءتيىس شەتەلدىك قازاقتاردىڭ قۇجاتىنىڭ مەرزىمىن سوزۋعا قانداي دا ءبىر جەڭىلدىك بولا ما دەگەن سۇراعىنا دا، مەرەز شەنەۋنىكتەن مەرەز جاۋاپ الدى. قۇجاتىنىڭ ۋاقىتى اياقتالعان، تىركەۋى جوق شەتەل ازاماتتارى قازاقستاننان شىعارىلۋى ءتيىس. ۇكىمەتتى شىعۋ ۆيزاسىمەن قازاقستاننان شىعىپ كەتكەن قازاقتاردىڭ بەس جىلسىز ەلدىڭ ەسىگىن قايتا اشا المايتىندىعى تولعاندىرىپ وتىرعان جوق.

ءتىپتى، دەپۋتاتتاردىڭ ءبىرى "ساپاسىز قازاقتاردى شاقىرا بەرىپ قايتەمىز، ولاردىڭ جەتپىس پايىزى ءبىلىمسىز، ولار قازاقستانعا كەلگەننەن كەيىن، ءوزىن-وزى قامتاماسىز ەتۋشى توپتىڭ قۇرامىن تولىقتىرادى. ودان دا ساپالى قازاقتى شاقىرايىق" دەپ  ايدى اسپانعا ءبىراق شىعاردى. الايدا، دەنساۋلىق جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ ورىنباسارى اسلان قارجاۋبايەۆ "قازاقستانعا قانداي قازاق بولسا دا كەرەك. ءارى تاياۋ جىلداردا بۇل ساياسات وزگەرمەيتىن بولۋى ءتيىس" دەپ جاۋاپ قاتتى. دەمەك، اسلان مىرزا قازاقستان بيلىگىنىڭ ىشكى ەسەبىن دە، ۇلتتىق ساياساتىن دا جاقسى ءتۇسىنىپ وتىر. "ساننان ساپاعا" دەگەن ماركستىك ءىلىمدى دە ەسىنە مىقتاپ ۇستاعان. قازاق ءوز ەلىندە ءالى دە از. سول سەبەپتى دە ءوز ۇيىنە ءوزى قوجايىن بولا الماي كەلەدى. ەگەر ساندىق تۇرعىدان ارتسا، ساپالىق تۇرعىدان ناتيجە بەرەتىنى دە انىق.

جاقىندا "31كانال" ارناسى ىقتيار حاتى بولسا دا، تىركەلۋ مەرزىمى اياقتالعان ءبىر ورالماننىڭ قازاقستاننان كەتۋگە ءماجبۇر ەكەندىگىن، ەكىنشىسى قازاقستان ازاماتى اتانا الماعاندىعىنان پەرزەنتحانادا بوسانعان ايەلىن اقشانىڭ جوقتىعىنان شىعارا الماي شىرىلداپ جۇرگەندىگىن كورسەتتى. الايدا قازاقستان بيلىگى بۇل بەيباقتاردىڭ قازاقستاندا تىركەلۋىنە قول ۇشىن سوزۋدى ويلاپ وتىرعان جوق.

"زاڭ سولاي" دەگەن جەلەۋمەن ەلدەن الاستاپ جىبەرۋدى كوزدەۋدە. اتالعان زاڭ جوباسى وتكەلەكتەن ءوتىپ بولعانشا، تىركەلە الماي جۇرگەن مىڭداعان قانداسىمىزدان جان شىعاتىن سەكىلدى.

"تۇركىستان" گازەتى