پاۆلودار وبلىسى ىشكى ساياسات باسقارماسىنىڭ باسشىسى باۋىرجان كاپەنوۆ پەن وبلىس تۇتىنۋشىلار وداعىنىڭ تەڭ ءتوراعاسى اتانىپ جۇرگەن يۋريي پاۆلەنكونىڭ ىس-ارەكەتتەرى ەرتىستىڭ كەرەكۋ وڭىرىندەگى شىعارماشىل قازاق زيالىلارى مەن قوعام بەلسەندىلەرىنىڭ نارازىلىعىن تۋدىردى. باۋىرجاننىڭ قازاقشاسى دا، قازاقشىلىعى مەن ساياسي بىلىكتىلىگى دە شامالى. پاۆلودار قالاسى ىشكى ساياسات ءبولىمى باسشىسى بولىپ تۇرعانىندا تەلەجۋرناليستىڭ لەنين كوشەسىن اتاۋىن اۋىستىرۋ جونىندەگى سۇراعىنا، «تۇرا بەرسىن، كىمگە كەدەرگى كەلتىرەدى!»، - دەپ ورىسشا دۇڭك ەتىپ جاۋاپ قايتارعانى ءالى ۇمىتىلعان جوق.

يۋريي پاۆلەنكو بولسا كەزىندە «لاد» ۇيىمىنىڭ اسىرە بەلسەندىسى رەتىندە ەرماك قالاسى اتاۋىن قازاقشاعا اۋىستىرۋعا، كەڭەس وداعىنىڭ باتىرى ماحمەت قايىربايەۆتىڭ ەسىمىن تۋرگەنوۆ كوشەسىنە بەرۋگە قاتتى قارسىلىق كورسەتكەن ەدى. بەرتىن قحكپ بەلسەندىسى رەتىندە وبلىستا كوممۋنيستىك يدەولوگيانى جۇرگىزۋگە اتسالىستى. وسىنداي ىس-ارەكەتتەرىمەن اتى شىققان كاپەنوۆ پەن پاۆلەنكو تابان استىندا «نيەۆادا-سەمەي» انتيادرولىق قوزعالىسىنا - 25 جىل» مەدالىنىڭ يەگەرلەرى اتاندى!.. ءسويتىپ، قوزعالىستىڭ ناعىز بەلسەندىلەرىنىڭ ەڭبەگىن يەمدەنىپ، ولجاس سۇلەيمەنوۆتىڭ ءوزىن الداپ سوققانىنا تيتتەي قىمسىنعان جوق! وبلىستىڭ ىشكى ساياسات باسقارماسىنىڭ باسشىسى مۇنداي بولعاندا، كەڭەستىك كەزەڭدى كوكسەۋشىلەر قانداي بولماق؟.. ولار نەگىزىنەن ب ا ق سالاسىندا، قوعامدىق ۇيىمداردا ءجۇر. ۋكراينانىڭ رەسەيمەن شەكارالاس وڭىرىندەگى قازىرگى جاعداي قازاقستاننىڭ رەسەيمەن شەكارالاس ءبىزدىڭ وڭىردە كۇنى ەرتەڭ ورناماسىنا كىم كەپىلدىك بەرەدى؟ ءبىر بىلەتىنىم، كاپەنوۆ پەن پاۆلەنكو كەپىلدىك بەرمەيدى! وسى ورايدا وبلىس باسشىسى قانات بوزىمبايەۆقا باعىتتاعان جاريا حاتىما جاۋاپ جوق. بالكىم جەرگىلىكتى شىعارماشىل قازاق زيالىلارى مەن قوعام بەلسەندىلەرىنىڭ ءسوزى وبلىس اكىمىنە جەتپەيتىن شىعار... جەتسە ايماقتاعى قيۋى كەتە باستاعان يدەولوگيا سالاسىن تۇزەتۋگە ايماق باسشىسى قانداي دا ءبىر شارا قولدانار ەدى عوي... سولاي دەسەك تە، جۇرەگىمىز قان جىلاپ تۇرىپ: «ەلىمىز امان، جۇرتىمىز تىنىش، ەگەمەندىگىمىز باياندى بولسا ەكەن» دەپ تىلەيمىز. بۇل تىلەگىمىزدىڭ تاڭىرگە جەتۋى مۇمكىن...

ارمان قاني