ساياحات جاساۋدى سۇيەسىز، ءبىراق كوپ ۋاقىتتى تالاپ ەتەتىن قۇجات دايىنداۋ ۇدەرىسى كەدەرگى بولىپ ءجۇر مە؟ ەندەشە ءسىزدى ۆيزاسىز شىعۋعا بولاتىن ەلدەر تۋرالى اقپارات قىزىقتىرارى انىق. راسىندا، قازاقستان ازاماتتارىنان كوپ قۇجات تالاپ ەتپەيتىن ەلدەر بار جانە ولار از ەمەس. الەمدەگى 194 ەلدىڭ 64 ەلىنە ۆيزاسىز شىعۋعا بولادى. دەمەك، الەمدەگى ەلدەردىڭ ۇشتەن ءبىر بولىگىنە ەشقانداي قاتاڭ تالاپتارسىز كىرۋگە رۇقسات ەتىلگەن.

بۇرىنعى كسرو ەلدەرى

الدىمەن پوستكەڭەستىك تەرريتورياداعى 10 ەلدى ايتۋعا بولادى. ولار: رەسەي، بەلارۋس، ءازىربايجان،ارمەنيا، گرۋزيا، قىرعىزستان، وزبەكستان، ۋكراينا، تاجىكستان جانە مولدوۆا. ال ەۋرازيالىق ەكونوميكالىق وداققا وراي بەلارۋس پەن رەسەيگە، سونىمەن قاتار، وداققا ۇمىتكەر قىرعىزستانعا جەكە كۋالىكتىڭ كومەگىمەن شىعۋعا دا بولادى. ودان بولەك، تۇرىكمەنستانعا ەلىمىزدىڭ اتىراۋ جانە ماڭعىستاۋ وبلىستارىنىڭ تۇرعىندارى 5 كۇنگە ۆيزاسىز وتە الادى.

ەۋروپا

بۇرىنعى كسرو ەلدەرىنەن بولەك ەۋروپانىڭ دا بىرنەشە ەلىنە ەشقانداي ۆيزاسىز شىعۋ مۇمكىندىگى قاراستىرىلعان. ناقتىراق ايتساق، ەۋروپانىڭ سەربيا (30 كۇن)، البانيا (90 كۇن) جانە چەرنوگوريا (90 كۇن) سىندى ءۇش ەلىنە ءتولقۇجاتقا ۆيزا باسپاي كىرۋگە رۇقسات ەتىلگەن. ال ەگەر ءسىز وسىعان دەيىن ەكى رەت شەنگەن ۆيزاسىن العان بولساڭىز، وندا اندورراعا دا ەركىن كىرۋگە مۇمكىندىگىڭىز بولادى.

امەريكا

سولتۇستىك امەريكا: انتيگۋا جانە باربۋدا (1 اي)، گايتي (3 اي)، باربادوس (28 كۇن)، نيكاراگۋا (شەكارادا ۆيزا باسۋ)، يامايكا (شەكارادا ۆيزا باسۋ – $20)، سەنت-ۆينسەنت جانە گرەنادين (1 اي)، دومينيكان رەسپۋبليكاسى (30 كۇن – $10)،

وڭتۇستىك امەريكا: ارگەنتينا (30 كۇن) جانە ەكۆادور (90 كۇن).

ازيا جانە افريكا

ازيا قۇرلىعىندا ۆيزاسىز كۇرۋگە بولاتىن 19 ەل بار. ولار: تۇركيا (30 كۇن)، لاوس (30 كۇن – $30)، ليۆان (3 اي)،نەپال (15 كۇن – $25، 30 كۇن – $40، 90 كۇن – $100)، باحرەين (14 كۇن)، گونكونگ (14 كۇن)، يوردانيا (1 اي – 10 يوردان دينارى)، كامبودجا (30 كۇن – $20)، تايلاند (15 كۇن – 1000 بات)، سەيشەل ارالدارى (1 اي)،فيليپپين (30 كۇن)، شري-لانكا (30 كۇن – $35)، وڭتۇستىك كورەيا (كورەيا رەسپۋبليكاسى) (30 كۇن)، قىتايدىڭحاينان ارالى (15 كۇن)، مونعوليا (90 كۇن)، ماكاو (30 كۇن)، مالديۆ ارالدارى (30 كۇن)، مالايزيا (1 اي) جانە شىعىس تيمور (30 كۇن – $30).

قازاقستاندىقتارعا افريكاداعى ۆيزاسىز اشىق ەلدەر: بۋرۋندي (شەكارادا ۆيزا باسۋ)، گۆينەيا (شەكارادا ۆيزا باسۋ – $80)، دجيبۋتي (1 اي – 5000 دجيبۋتي فرانكى)، زامبيا (3 اي – $50)، كابو-ۆەردە (شەكارادا ۆيزا باسۋ)،كەنيا (3 اي – $50)، كومور ارالدارى (شەكارادا ۆيزا باسۋ)، ماۆريكيي (60 كۇن)، ماۆريتانيا (شەكارادا ۆيزا باسۋ)، مالي (شەكارادا ۆيزا باسۋ)، موزامبيك (30 كۇن – $25)، ناميبيا (3 اي)، سومالي (30 كۇن)، توگو (7 كۇن – 35000 باتىس افريكا فرانكى)، ۋگاندا (3 اي – $50)، تۋنيس (ۆيزاسىز ەل).

مۇحيتتاعى ارالدار

مۇحيتتاعى ارالداردا دەمالۋدى جوسپارلاعان قازاقستاندىقتار ءۇشىن مىنا اقپارات پايداعا اسارى انىق. مۇندا قازاقستان ازاماتتارى ءۇشىن باتىس ساموا (60 كۇن)، تۋۆالۋ (1 اي)، نيۋە (30 كۇن)، ميكرونەزيا فەدەراتيۆتى شتاتتارى (30 كۇن)، پالاۋ (30 كۇن) ەلدەرى اشىق.

وزدەرىڭىز بايقاعاندارىڭىزداي، ەل ازاماتتارىنىڭ ساياحاتتاۋىنا كوپتەگەن ەلدەردە قولايلى جاعداي جاسالعان. ەسكەرتە كەتەتىن جايت، كەز كەلگەن تۋريستىك ەل ۆيزانىڭ قۇنىن ءوزى باعامدايدى. سوندىقتان ساپارعا شىعار الدىندا انىقتاپ العانىڭىز ءجون.

دەرەككوز: ماسساگەت