سەمەي قالاسىنىڭ ىرگەسىندەگى بالتا-تاراق اۋىلى 20 جىلدان بەرى جارىقسىز وتىر. وسىنشاما ۋاقىت قارا تۇنەكتە كۇن كەشكەن حالىق بارلىق وركەنيەتتەن قول ءۇزىپ، ءتىپتى تەلەديداردىڭ دا ءتۇرىن ۇمىتىپ قالعان.

"سوندىقتان ەلدە نە بولىپ جاتقانىنان بەيحابارمىز"، -دەيدى. اۋىلدىقتار بۇل ماسەلەنى ايتىپ تالاي تابىلدىقىرتى توزدىرىپتى. ءبىراق جەرگىلىكتى باسشىلار ەشكىم ارىزدانىپ كەلگەن جوق دەپ تاڭ قالدىردى.

قالادان 24 شاقىرىم قاشىقتىقتا ورنالاسقان بالتا-تاراق ەلدى مەكەنىن تابۋدىڭ ءوزى قيىن. اتاۋى جازىلعان ماڭدايشا دا ورناتىلماپتى. ال جارىق تاراتاتىن باعانالار بولعان، ءبىراق 1995 جىلى ورتەنىپ كەتكەن.

سونان بەرى مۇنداعى 20-عا جۋىق وتباسى "جارىقسىز وتىرمىز"، -دەيدى. ال ماسەلەنىڭ ءمانىسىن ايتىپ اكىمدەرگە بارعانىمەن، ماردىمدى جاۋاپ الا الماعاندارىن ايتادى.

"باعانا مەن جوعارىدان تارتىلاتىن سىمدى 1 ميلليون دەيدى. 1 ميلليوندى ءبىز قايدان تابامىز؟ وعان مۇلدەم جاعدايىمىز كەلمەيدى. قولىمىزدا بارى سيىر عانا. ءبىر-بىر سيىردان بەرەيىك دەگەنبىز. ءبىراق جابۋلى قازان جابۋلى كۇيىندە قالدى"، - دەيدى  بالتا-تاراق اۋىلىنىڭ تۇرعىنى ۇسەن حاسەنوۆ.

اۋىلدىقتار اس قامداۋ ءۇشىن وت جاعىپ، ساماۋرىن قايناتىپ كۇنەلتەدى. تىعىرىقتان شىعۋ ءۇشىن ءتۇرلى تاسىلدەردى قولدانا باستاعان. وزدەرىن جارىقپەن قامتۋ ءۇشىن ءار باسپانا موتور وناتىپ الىپتى. جانارمايمەن ىستەيتىن قۇرىلعى ەسكى بولعاندىقتان، ءجيى ىستەن شىعادى ەكەن. ال ونىڭ سايمانى دا جوقتىڭ قاسى.

باعانا مەن جوعارىدان تارتىلاتىن سىمدى 1 ميلليون دەيدى. 1 ميلليوندى ءبىز قايدان تابامىز؟ وعان مۇلدەم جاعدايىمىز كەلمەيدى.

"ءوشىپ قالادى 1-2 ساعات جانعانان كەيىن. كۇنىنە 400-500 تەڭگەنىڭ اقشاسى كەتەدى بەنزينگە. ايىنا ءبىر 10-15 مىڭداي اقشا كەتىپ جۇمسايمىز بەنزينگە"، - دەيدى اۋىل  تۇرعىنى دۋمان ءامىروۆ.

اۋىل اكىمدىگىندەگى  باس ماماننىڭ سوزىنشە، تالاي جىلدىڭ ءجۇزى بولسا دا، تۇرعىنداردىڭ ەشقايسىسى جارىققا قاتىستى ءوتىنىش ايتىپ كەلمەگەن. "سوندىقتان، اۋىل ەلەنبەگەن"، -دەيدى. قازىرگى تاڭدا، جارىقپەن قامتۋ جولدارىن قاراستىرا باستاپتى.

"حالىقتى جينايمىز. ءمان-جايدى تۇسىندىرەمىز. قاجەتتى ەلەكتردىڭ قۋاتىن ەسەپتەۋ كەرەك. ولارعا جارىق تاراتۋشى مەكەمەگە ءوتىنىش تۇسىرۋگە كومەكتەسەمىز. سمەتالىق قۇجات ازىرلەۋ ءۇشىن جوبالاۋشى كومپانيالاردىڭ قىزمەتىنە جۇگىنبەكشىمىز"، - دەيدى  وزەركا اۋىلدىق وكرۋگى اكىمشىلىگى اپپاراتىنىڭ باس مامانى ەرعالي بايتاسوۆ.

جارىقتى جاقىن ورنالاسقان زنامەنكا نەمەسە جارقىن اۋىلدارىنىڭ بىرىنەن تارتۋ كوزدەلىپ وتىر. دەسە دە ماماندار بۇل ماسەلەنى "بيزنەستىڭ جول كارتاسى -2020" باعدارلاماسىنا ەنگىزسەك، جىلدام شەشىمىن تابادى دەگەن ۇمىتتە.

سوندىقتان حالىقتىڭ تىلەگىن ورىنداۋ ءۇشىن قولدان كەلگەنىڭ ءبارىن جاساۋعا تىرىسامىز دەپ وتىر. "7 ارنا"