جاقىندا تۇرىك پرەزيدەنتى رەجەپ تايىپ ەردوعان يزرايل جانە ەۆرەي لوببيلەرىنىڭ قىزمەتىنە 65 ميلليون دوللار بولۋگە نيەتتى ەكەنىن ايتتى.
تۇركيا بيلىك باسىنداعى "اق پارتيانىڭ" ساياسي قيتۇرقىلىعىن سىنعا العان ستامبۇلداعى "جۇمحريەت حالىقتىق پارتياسىنىڭ" (جحپ) ورىنباسارى، جەمقورلىقپەن كۇرەس جانە تەرگەۋ بولىمشەسى ءتوراعاسى ايكۋت ەردوگۋدى، ەل پرەزيدەنتى تايىپ ەردوعاننىڭ يزرايل لوببيلەرىنىڭ قىزمەتىنە پارتيا بيۋدجەتىنەن 65 ميلليون دوللار تولەۋ تۋرالى شەشىم شىعارعانىن مالىمدەدى.
كەزىندە، تۇرىك پرەزيدەنتى ەردوعان "داۆوستا" سويلەگەن سوزىندە يزرايل بۇلىك شىعارىپ، رەسمي پالەستيناعا قىسىم كورسەتكەنىنە نارازىلىعىن بىلدىرگەن بولاتىن. 2009 جىلى 29 قاڭتاردا "داۆوستا" تايىپ ەردوعان مەن شيمون پەرەستىڭ اراسىندا ورىن العان كەلەڭسىز وقيعادان كەيىن، تۇركيا استاناسىندا مىڭداعان ازاماتتار "جۇمحريەت حالىق پارتياسىنىڭ"، ۇيىمداستىرۋىمەن يسرايل ۇرپاقتارىنىڭ پاليستينا مۇسىلماندارىنا جاساعان قىسىم، زورلىق ارەكەتتەرىنە قارسى ميتينگىگە شىققان بولاتىن.
سول كەزدە تۇرىك پرەزيدەنتى شالعايداعى مۇسىلمان ەلى ەۆرەي حالقىنىڭ ەزگىسىنىڭ استىندا قالعاندا گۋمانيتارلىق جاردەم جىبەرگەن ەدى. الايدا، ءمارمار تەڭىزىندە تۇركيا كەمەسىنە شابۋىل جاسالىپ، پاليستيناعا اتتانعان كەمە دىتتەگەن مەجەگە جەتپەي قالادى. سول كەزدە 9 بىردەي بەيبىت ادام وققا ۇشقان بولاتىن.
سول وقيعادان كەيىن تۇركياداعى ەۆرەي دياسپوراسى بيلىك باسىنداعى پارتيادان جاردەم سۇرايدى.
ءبىراق، بۇرىنعى ەردوعان ءقازىر وزگەرگەن. ءتىپتى، بيلىكتەگى جەتەكشى پارتيا دا يزرايل ساياساتىن قولداپ وتىر.
جۋرناليستەردىڭ ساۋالدارىنا جاۋاپ بەرگەن ەردوگۋدى: "جوعارىداعى تولەنەتىن 65 ميلليون دوللار جاردەماقى بولۋى مۇمكىن. جانە ەۆرەي لوببيلەرىنىڭ قىزمەتىنە 65 ميلليون 347 مىڭ 37 دوللار سىرتقى ىستەر مينيسترلىگىنىڭ بيۋدجەتىنەن ءبولىنۋى مۇمكىن. الايدا، اتالمىش قارجىنىڭ قايدان بولىنەتىنىن ايتا المايمىن" دەدى.
الەمدىك ساياساتتىعى تىك مىنەزدى باسشىلاردىڭ قاتارىنان سانالاتىن ەردوعان ءقازىر ەكىجۇزدى ساياساتتى ۇستانىپ وتىر. ال ساراپشىلار، ونىڭ بۇل ارەكەتىنە الەمدىك جانە تۇركيادا كەڭ تارالعان "پاراللەلدى مەملەكەتشىلەردىڭ" ىقپالى بولۋى مۇمكىن دەيدى. تۇركيانىڭ "Sozcu.tr.com" سايتى "ەردوعان ەۆرەيلەردى اتاتۇرىكتىڭ باسىنا دەيىن شىعارا ما؟" دەگەن ماقالاسىندا يزرايلگە كومەك رەتىندە بولىنەتىن 65 ميلليون دوللاردى تۇركياداعى جەكە كومپانيالار مەن جەكە كاسىپكەرلەردىڭ سالىعىنان ۇستايتىنىن جازعان. دەسە دە، وسى كۇنگە دەيىن يسرايل ۇرپاقتارىنا قىرىن قاراپ كەلگەن ەردوعان، كەنەتتەن جارامساقتانىپ، جاردەم بەرە قالعانىنىڭ سىرىن اركىم ءار ءتۇرلى توپشىلاۋدا. ءبىر اقيقاتى، سوڭعى كەزدە تۇركيا پرەزيدەنتىنىڭ يزرايلگە ءىشى ءجىبىپ كەلەدى.
