قازاق تىلىندە  قارجى-ەكونوميكا، بيزنەس تاقىرىبىندا اقپارات تاراتاتىن 7kun.kz ىسكەرلىك جاڭالىقتار سايتى اشىلدى. سايت وقىرمانعا كۇن سايىن ىسكەر الەم جاڭالىقتارى مەن  تانىمدىق اقپارات، مۋلتيمەديالىق ونىمدەر ۇسىنباق. «كاسىپكەرلىك، قارجى-ەكونوميكا تاقىرىپتارىندا قازاق تىلىندە اقپاراتتىق-تانىمدىق ماتەريالدار از. وقىرماندار وتباسىلىق بيۋدجەت، بانك قىزمەتتەرى بويىنشا اقىل-كەڭەستەر، كاسىپ جۇرگىزۋ بويىنشا باعىت-باعدار بەرەتىن جاريالانىمدارعا ءزارۋ. جاڭالىق تاراتۋمەن قاتار، ءبىز وسى باعىتتا دا وقىرماننىڭ سۇرانىسىن بارىنشا قاناعاتتاندىرۋعا تىرىسامىز. قازىرگى الەمدىك داعدارىس جاعدايىندا ىسكەرلىك جاڭالىقتار وزەكتى بولا تۇسەدى»، - دەيدى سايتتىڭ باس رەداكتورى دىنمۇحامەد زيادين. بۇل رەتتە رەسۋرس «قارجى كەڭەسشىسى»، «كاسىپكەر»، «made in kz» جانە باسقا دا ارنايى جوبا، ايدارلار  ارقىلى وقىرمانعا ءتۇرلى كەڭەستەر مەن كەرەكتى مالىمەتتەر ۇسىنباق. مۋلتيمەديالىق ونىمدەر ۇسىنۋ، كونۆەرگەنتتى رەداكسيا قۇرۋ – جوبانىڭ باسىم باعىتتارىنىڭ ءبىرى. سايت وقىرماندارى تۇراقتى تۇردە ۆيدەو، فوتورەپورتاجدار، ينفوگرافيكا، پودكاست تۇرىندە اقپاراتتارمەن تانىسا الادى.