پسيحولوگتار "باربي قۋىرشاعىنا ۇقساعىسى كەلەتىن بويجەتكەندەر "سۇلۋلىق" ءسوزىن دۇرىس تۇسىنبەيدى" دەگەن پىكىردە. ءبىر قىزىعى، بىلىكتى فوتومودەلدەر "ءتىرى" باربيلەردىڭ باسىندا تازا اۋادان باسقا ەشتەڭە جوق دەپ بولجايدى.

الەمدە قۋىرشاققا ۇقساعىسى كەلەتىن قىزدار بار. ءسانقويلار قازاقستاندا دا تابىلادى. لينزانىڭ كومەگىمەن كوزدىڭ قاراشىعىن "ۇلعايتۋ"، جاپسىرما كىرپىكتەر مەن جارقىن وپا-دالاپ ءبىراز الماتىلىقتىڭ تالعامىنا ساي كەلگەن.

قۋىرشاق بەينەسى ءساندى بولعانى سونشالىقتى، الىپ شاھاردا مەيكاپ جاسايتىن ماماندار ءوز قىزمەتتەرىنىڭ تىزىمىنە اتالعان ءستيلدى ەنگىزگەن. ال دۇكەن سورەلەرىندە كوزدەگەن ماقساتقا تەزىرەك جەتىپ، "ءتىرى باربي" اتانۋعا قاجەتتى زاتتاردىڭ ءبارى پايدا بولدى.

"ءبارى دۇكەننەن قۇبىلمالى تۇستەگى كىرپىكتەردى كورىپ، ساتىپ الۋىمنان باستالدى. سونىمەن قاتار، ۆيزاج جاساۋ قولىمنان كەلگەندىكتەن، "بۇل كىرپىك ارقىلى قانداي ماكياج جاساۋعا بولادى؟" دەگەن سۇراق تۋىندادى. مەن سىناق رەتىندە سىرت كەلبەتىمە ءباربيدىڭ بەينەسىن جاساۋعا تىرىستىم. ءبىراق تۇيگەنىم، تەك ەرەكشە جاعدايدا بولماسا، كۇندەلىكتى ومىردە بۇلاي ءجۇرۋ قاجەت ەمەس. ال  وتا جاساۋ ارقىلى قۋىرشاق كەيپىنە ەنگىسى كەلەتىن قىزداردىڭ ويىندا تۇك جوق"، - دەدى مودەل ماريا كولەنكو.

سۇرانىس ۇسىنىستى تۋدىردى. قازاقستاندا ۇلكەن كولەمدەگى لينزالاردى تابۋ قيىندىققا سوقتىرمايدى. دەسە دە، ءسان قۋۋ تاقىرعا وتىرعىزۋى مۇمكىن. مامانداردىڭ سوزىنشە، ءبىر قاراعاندا سان سوقتىرمايتىن اكسەسسۋارلار شىعىنعا باتىرۋى عاجاپ ەمەس.

"بىزدە 500 ءتۇرلى لينزا بار. ولاردىڭ سۋرەتتەرى، تۇستەرى مەن ديزايندارى سان ءتۇرلى. بويجەتكەندەر لينزا تاڭداعاندا مۇقيات بولعاندارى ابزال. كونترافاكتىلىك ونىمدەردى ساتىپ الماعاندارى ءجون. سەبەبى جاساندى دۇنيەنىڭ تيگىزەر زيانى كوپ. 16، 17 نەمەسە 22 ميلليمەتر كولەمىندەگى لينزالاردى ەلىمىزدە قولدانۋعا رۇقسات بەرىلسە (ءبىراق مەن ءوزىم كورمەدىم)، ول تۇتىنۋشىنىڭ تاڭداۋى. ەگەر بۇل كونترافاكتىلىك جانە كونتراباندالىق ءونىم بولسا، ادامنىڭ دەنساۋلىعىنا ءقاۋىپتى، ياعني كوزدىڭ كورۋ قابىلەتىن ناشارلاتىپ الۋى مۇمكىن"، - دەدى لينزا ساتۋمەن اينالىساتىن كومپانيا وكىلى باحتيار ءابدىراحيموۆ.

ونىڭ ايتۋىنشا، ولاردا قىزمەت كورسەتەتىن كەڭەسشىلەر كليەنتتەرگە لينزانى دۇرىس قولدانۋ تۋراسىندا مالىمەت بەرەدى. ءابدىراحيموۆ ۇلكەن كولەمدەگى لينزالارعا قىزىقپاۋدى ەسكەرتەدى. ونىڭ ايتۋىنشا، كوزدىڭ قاراشىعىن ۇلعايتاتىن لينزالاردىڭ ماكسيمالدى كولەمى 15 مم-دەن اسپاۋى ءتيىس.

بۇل تۋرالى كوپتەگەن قىزدار بىلمەيدى. سونىمەن قاتار، ۇلكەن لينزانى تاققان قىزداردىڭ كوز قاراستارى سۋىق جانە جانسىز بولادى. پسيحولوگتىڭ پىكىرىنشە، مۇنداي اجار ءمىنسىز ءسان تۋرالى بۇرمالانعان تۇسىنىكتىڭ ناتيجەسى بولىپ تابىلادى.

"اتا-انالار بالالارىنا اسا نازار اۋدارۋلارى ءتيىس. بالانىڭ ومىرلەرىنەن حاباردار بولۋ كەرەك. وزىنە سەنىمدى ءارى جەكە باسىنا جانە قوعامعا دۇرىس باعا بەرە الاتىن بالا ءوسىرۋ قاجەت. ءوزىن مىسالعا الا وتىرىپ، ءار ادامنىڭ جاراتىلىسى ءار ءتۇرلى ەكەندىگىن تۇسىندىرگەن دۇرىس. ادام وزگە ادامنان مەيكاپ ارقىلى ەمەس، وي ءورىسى، ءىس-قيمىلى ارقىلى ەرەكشەلەتىندىگىن جەتكىزگەن ءجون"، - دەدى پسيحولوگ ەلەنا مانجيكوۆا.

ونىڭ ايتۋىنشا، اركىم ءوز كەيپىن ساقتاپ قالۋ ارقىلى دا باقىتتى بولا الادى. "الماتى" ارناسى