جۋىردا قازاقستاننىڭ ەڭ ۇلكەن مەگاپوليسى سانالاتىن - الماتىدا ورتا ازياداعى ەڭ ۇلكەن "دونەر" دايارلاندى دەپ حابارلايدى Qamshy.kz پورتالى.
قازاقستانداعى تۇرىك پەن قازاق اسپازدارى بىرلەسە وتىرىپ، ورتا ازياداعى ەڭ ۇلكەن تۇرىك تاعامىن ازىرلەگەن. الماتى قالاسىندا ورنالاسقان "چيچەك مانگال" ورتالىعىندا ازىرلەنگەن "دونەردىڭ" سالماعى 200 كيلوگرامنان اسادى.
ارنايى رەكوردتىق كورسەتكىشتى جاڭارتۋ ءۇشىن دايىندالعان "دونەر" تازا سيىر ەتىنەن جاسالعان. قازاق-تۇرىك اسپازدارى بىرگە دايىنداعان الىپ "دونەردەن" ءدام تاتۋعا تۇركيانىڭ الماتىداعى باس كونسۋلى سۋپحي اتان مىرزا ارنايى كەلگەن.
"مەن بۇرىن-سوڭدى مۇنداي الىپ دونەردى كورمەپپىن. قازاق جانە تۇرىك اسپازدارى بىرلەسە وتىرىپ دايىنداعان بۇل "دونەر" ورتا ازيا ەلدەرى ىشىندە رەكوردتتىق كورسەتكىشتى كورسەتىپ وتىر. ال دۇنيە ءجۇزىنىڭ گيننەس رەكوردىندا ازىرلەنگەن دونەردىڭ سالماعى 250 كگ بولعان ەدى"،-دەدى كونسۋل سۋپحي اتان.
"بۇل ءبىزدىڭ العاشقى قادامىمىز. قازاق جانە تۇرىك ەلدەرىندە، اسىرەسە تاعامعا كەلگەندە تالعام وتە جوعارى. تۇرىكتەر ءتاتتى تاعامداردى ءجيى تۇتىناتىن بولسا، قازاق ەلىندە ەت تاعامدار نەگىزگى ءمازىر بولىپ سانالادى. ءبىزدىڭ تازا سيىر ەتىنەن ازىرلەگەن دونەرىمىز 200 كگ-دان اسادى. الايدا بۇل رەكوردتتىق كورسەتكىش ەمەس. الداعى ۋاقىتتا ورتا ازيادا عانا ەمەس، دۇنيەجۇزىندەگى ەڭ ۇلكەن دونەردى دايىندايتىن بولامىز"،-دەدى "چيچەك مانگال" ورتالىعىنىڭ ديرەكتورى، باس اسپاز نيەۆرۋز گۇنياشيەۆ.
