بۇگىنگىدەي جاھاندىق داعدارىستاردىڭ الدىندا تۇرعان الماعايىپ كەزەڭدە دامۋدىڭ سەرپىندى جولىن تاڭداعان مەملەكەتىمىزدىڭ جاڭاشا سيپاتىن قالىپتاستىرۋعا ءاربىر قازاقستاندىق مۇددەلى ەكەنى راس. مەملەكەتتىك ساياسي جۇيەلەردى جەتىلدىرۋ ءۇشىن قوعامدى دەموكراتيالاندىرىپ، ەكونوميكالىق جانە ساياسي رەفورمالاردى جۇزەگە اسىرۋعا - ەلدەگى ساياسي پارتيالاردىڭ قىزمەتى ماڭىزدى ءرول اتقاراتىنىن تاعى بىلەمىز. وسى ورايدا، ەلىمىزدەگى جەتەكشى، بيلەۋشى پارتيا سانالاتىن - نۇر وتان حدپ-نىڭ سوڭعى كەزەڭدەردەگى ەلىمىزدەگى جانە كورشىلەس ەلدەردەگى شيەلەنىستى ماسەلەلەرگە قاتىستى ءۇن-تۇنسىز وتىرعانىنا قاراپ كوبىمىزدىڭ كوكەيىمىزدە كۇدىكتى ساۋالدار تۋىندايدى.
ەندى، سول باس پارتيانىڭ ءۇن قاتۋىن كۇتكەن بىرنەشە ماسەلەنى سانامالاپ كورەيىكشى.
- 2014 جىلدىڭ اقپانىندا تەڭگە كۇرت قۇنسىزداندى. اقش اقشاسىنىڭ قازاق ۆوليۋتاسىنا شاققانداعى باعامى 185 تەڭگەگە تەڭەلدى. سودان ءسال عانا بۇرىن باس بانكير كەلىمبەتوۆ "ەشقانداي تەڭگەنىڭ قۇنسىزدانۋى بولمايدى" دەپ جۇرتتى سەندىرگەن بولاتىن.
- قازاق بيلىگى مۇددەلى بولعان «ەۋرازيالىق وداق» تۋرالى قاراپايىم جۇرتشىلىق پىكىرى ءار الۋان بولدى. ءتىپتى «تاۋەلسىزدىگىمىزدەن ايىرىلامىز» دەپ تە دابىل قاقتى.
- ال رەسەيدىڭ سەناتورلارى مەن بەلدى تۇلعالارى(جرينوۆسكيي باستاعان) «قازاق ەلىن قايتارىپ الۋىمىز كەرەك. ول رەسەيگە تاۋەلدى» دەپ كوكىدى.
- ەلىمىزدەگى ەڭ تانىمال باسىلىمداردىڭ ءبىرى «جۇلدىزدار وتباسى» جۋرنالىنىڭ باس رەداكتورى جارىلقاپ قالىباي «گيتلەردى – عاسىر قاسىرەتى» دەپ جازعانى ءۇشىن ءفاشيزمدى ناسياعاتتاعان بولىپ شىعا كەلدى. سۇيەگى قۋراپ قالعان گيتلەر ءۇشىن جارىلقاپتىڭ باسى داۋدان ارىلعان جوق.
- وتكەن جىلدىڭ 22 قازانىندا سيرياعا بارىپ، سوعىسىپ جۇرگەن قازاقستاندىق جيھادشىلار تۋرالى ۆيدەو-روليك الەۋمەتتىك جەلىلەر ارقىلى قازاق ەلىن ءدۇر سىلكىندىردى. ءتىپتى ولاردىڭ اراسىندا بەسىكتەن بەلى شىقپاعان سابيلەردە ءجۇر.
- كورشىلەس ۋكراينا ەلىندە بولىپ جاتقان جاعدايلارعا ءبىزدىڭ وداقتاسىمىز رەسەي تىكەلەي قاتىسىپ وتىر.
- 2014 جىلدىڭ 2 قىركۇيەگىندە «ەۋرازيالىق وداق» اياسىنداعى ەڭ باستى سەرىگىمىز رەسەيدىڭ پرەزيدەنتى پۋتين مىرزا: «قازاقتا مەملەكەت بولماعان» دەپ ورىس جاستارىنان ءسۇيىنشى سۇراعانداي بولدى.
- 2014 جىلى شەتەلدەگى قانداستار ماسەلەسى – ەڭ ءبىر شىرقاۋ شەگىنە جەتتى. الدى كەلگەن ەلدەرىنە قايتتى. قالعاندارى كوشى-قوننىڭ جايىن ايتىپ، زار جىلادى. ەلباسى اتاجۇرتقا ورالاتىن قازاقا ەشقانداي توسقاۋىل قويىلماسىن دەپ كەسىپ ايتتى. پارلامەنت زاڭ قابىلدايمىز دەگەننەن ءالى تانعان جوق.
- 2014 جىلدىڭ 31 جەلتوقسان كۇنى الماتى وبلىسى، ۇيعىر اۋدانى، شونجى اۋىلىنىڭ ورتالىق الاڭىندا قازاق جانە ۇيعىر ازاماتتارى اراسىندا كەلىسپەۋشىلىكتەر بولدى. ءتىپتى بۇكىل ەل ازاماتتارىنا تەلەفون ارقىلى ۇندەۋ جاريالاندى.
- مىنە جاقىندا عانا سارىاعاشتا بولعان جاڭجال بۇكىل قازاق ەلىن تاعى دا شۋلاتتى.
قاراپ وتىرساق، تاۋەلسىز قازاقستانعا تىكەلەي قاتىستى شەكارانىڭ ءىشى-سىرتىندا بولىپ جاتقان وسىنداي ماسەلەلەرگە «نۇر وتان» پارتياسىنىڭ ءۇن قاتقانىن ەستىدىڭىزدەر مە؟ تىم قۇرىسا «تۇنشىققان» اقپارات پەن وسەك-اياڭنىڭ ورتاسىندا دۇرلىككەن جۇرتقا باسۋ ايتقانىن دا كورگەن جوقپىز.
ال سوندا «نۇر وتان» پارتياسى ەشتەڭە ىستەمەگەن بە» دەپ وتكەن جىلعا كوز سالساڭ، قاپتاعان ءىس-شارالارعا قارىق بولاسىڭ. ەلباسى جولداۋىن ناسيحاتتاۋ مەن قاتىپ قالعان ساياسي جيىنداردان باسقا بىردەن ەسكە تۇسەتىنى – ايتىس. ونىڭ سوڭى ۇلتتىق قۇندىلىقتى مازاققا اينالدىرعان «شوۋ-ايتىسپەن» ءبىراق توقتادى. ەكىنشىسى – كۆن. ءۇشىنشىسى – اسىق ويىنى. ءتورتىنشىسى – اۋدارىسپاق.... قويشى وسىلاي كەتە بەرەدى. قىزىققا باتاسىڭ دا جاتاسىڭ.
ال مىنا جاقتا جۇرت ءوزىن مازالاعان سۇراقتارعا باس پارتيادان جاۋاپ كۇتەدى، نە دەر ەكەن، نە ىستەر ەكەن دەيدى؟ ءلام-ميم!
حازىرەت ءابدىلدا
