2018 جىلعى 17 مامىردا استانا قالاسىندا استانا ەكونوميكالىق فورۋمى الاڭىندا ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان جۇڭگو حالىق رەسپۋبليكاسى اراسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە قول قويىلدى، دەپ حابارلايدى Qamshy.kz اقپارات اگەنتتىگى. ول ەكى ەل اراسىنداعى ىنتىماقتاستىقتى دامىتۋداعى قۋاتتى درايۆەرگە اينالۋى ءتيىس.
قازاقستان رەسپۋبليكاسىنىڭ اتىنان كەلىسىمگە قازاقستان رەسپۋبليكاسىنىڭ پرەمەر-مينيسترىنىڭ ءبىرىنشى ورىنباسارى اسقار مامين قول قويدى.
كەلىسىمدى بەكىتۋ تۋرالى كەلىسسوزدەر ەكى جىل بويى جۇرگىزىلدى.
كەلىسىم ەاەو-عا مۇشە مەملەكەتتەر مەن قىتايدىڭ اراسىنداعى ءوزارا ساۋدانى جاقسارتۋ شارتتارىن قۇرۋعا باعىتتالعان، الايدا ول باجدى الىپ تاستاۋدى نەمەسە بەيتاريفتىك بوگەتتەردى اۆتوماتتى تۇردە تومەندەتۋدى قاراستىرمايدى.
بۇل شارت ىشكى نارىقتى قورعاۋ شارالارى، ساۋداداعى تەحنيكالىق بوگەتتەر، سانيتارلىق جانە فيتوسانيتارلىق شارالار، كەدەندىك ىنتىماقتاستىق، زياتكەرلىك مەنشىك، باسەكەلەستىك، مەملەكەتتىك ساتىپ الۋلار سالاسىنداعى ىنتىماقتاستىق، سالالىق ىنتىماقتاستىق، ەلەكتروندىق ساۋدا ءتارىزدى كوپتەگەن ساۋدالىق رەتتەۋ مەن ىنتىماقتاستىق سالاسىن قامتيدى.
كەلىسىمگە سايكەس تاراپتار دسۇ دەڭگەيىندە ءوزارا تاۋار ساۋداسىنداعى ساۋدا رەجيمىن ساقتاۋ كەپىلدىگى مەن قۇقىقتارىن بەكىتتى.
سونداي-اق، كەلىسىم ارقىلى اشىقتىق تەتىگى كوزدەلگەن، ول قۇقىقتىق رەتتەۋ جۇيەسىنىڭ ايقىندىعىن، جالپى قولدانىستاعى شارالار جانە اكىمشىلىك اكتىلەردى قابىلداۋ ۇدەرىستەرىن، مەملەكەتتىك ورگانداردىڭ قىزمەت ۇدەرىستەرىن قامتاماسىز ەتەدى. سونىمەن قاتار، بۇل اشىقتىق تەتىگى تاراپتاردىڭ سۋبسيديالار مەن ساۋدا شارالارى تۋرالى حابارلاندىرۋلاردى، ساۋدا سالاسىنداعى ىشكى رەتتەۋ تۋرالى اقپاراتتاردى الماسۋىنا مۇمكىندىك بەرەدى.
ەلەكتروندىق ساۋدا سالاسىنداعى قول جەتكىزىلگەن ۋاعدالاستىقتاردىڭ دا ماڭىزى زور بولىپ تابىلادى. كەلىسىم تۇتىنۋشىلاردىڭ قۇقىقتارى مەن مۇددەلەرىن جانە ولاردىڭ جەكە مالىمەتتەرىن قورعاۋ دەڭگەيىن ارتتىرادى جانە يننوۆاسيا سالاسىنداعى قاعازسىز ساۋدانى دامىتۋدىڭ نەگىزىن قامتاماسىز ەتەدى.
جالپى، كەلىسىم قحر-مەن اناعۇرلىم تىعىز ساۋدا-ەكونوميكالىق ارىپتەستىككە قاراي ىلگەرىلەمەلى قوزعالىستىڭ نەگىزى بولۋى ءتيىس. سونىمەن قاتار، اقپارات الماسۋدى دامىتۋدىڭ، بوگەتتەردى انىقتاۋ مەن قىتايمەن ءوزارا ساۋدانى ىلگەرىلەتۋدىڭ قۇرالىنا اينالىپ، قوسىمشا ىقتيمال ىنتىماقتاستىق سالاسىن ىزدەستىرۋگە ىقپال ەتەتىن بولادى.
پىكىر قالدىرۋ