بيىل 2015 جىل قازاقستان حالقى ءۇشىن ءدۇبىرلى وقيعالارعا تولى جىل بولماق. قازاق حاندىعىنىڭ 550 جىلدىعى، تاۋەلسىزدىگىمىزدىڭ 24 جىلدىعى، فاشيستتىك گەرمانيانى جەڭگەنىمىزگە 70 جىل ت.س.س. مەملەكەت دەڭگەيىندە وسىنداي وراسان مانگە يە مەرەكەلەرمەن قاتار، بيىل قازاقستاندا كەزەكتەن تىس پرەزيدەنت سايلاۋى وتكىزىلەتىنى تاعى بار. ال ەلباسى ءوزىنىڭ بيىلعى جولداۋىندا "دامىعان 30 ەلدىڭ قاتارىنا قوسىلۋ ماقساتىمىزدى" باسا ايتقان بولاتىن. سونداي-اق، 2020 جىلعا قاراي قازاقستاندىقتاردىڭ جان سانىن 20 ميلليونعا جەتكىزۋ دە الدەقاشان جوسپارلانعان.
ال مەملەكەت باسشىسى قويعان مەجەدەن كورىنۋگە وبلىستارىمىز دايىن با؟ وسىعان وراي، Qamshy.kz پورتالى سايتىمىزدا "ەڭ ۇزدىك وبلىستى تاڭداڭىز" دەگەن حالىقتىق ساۋالناما جۇرگىزگەن بولاتىن. ساۋالنامانىڭ تالاپتارى بويىنشا داۋىس بەرۋشى – جولى، ەكونوميكاسى، مادەنيەتى، ءباسپاسوزى، ءتۋريزمى، مەديسينا، حقك سالالارى بويىنشا وزدەرىنە ۇناعان وبلىسقا ءوز داۋىسىن بەرگەن. داۋىس بەرۋ ءادىل بولۋ ءۇشىن ءبىر كومپيۋتەردەن تەك ءبىر رەت قانا داۋىس بەرۋ مۇمكىندىگىن ۇسىنعانبىز.
سونىمەن، قازاقستاننىڭ 14 وبلىسىنىڭ ىشىنەن ەڭ ۇزدىگىن تاڭداۋ قورىتىندىسى تومەندەگىدەي بولدى.
جالپى، ساۋالناماعا بارلىعى - 11 مىڭعا جۋىق ادام قاتىسقان. سولاردىڭ - 4000-نان استامى داۋىس بەرگەن. 500-گە جۋىق ادام پىكىر جازعان.
ءبىز جۇرگىزگەن ساۋالناما قورىتىندىسى بويىنشا العاشقى ۇشتىكتى قىزىلوردا وبلىسى تۇيىندەيدى. 600-گە جۋىق ادامنىڭ داۋىسىن جيناعان قىزىلوردا وبلىسى قىرىمبەك كوشەربايەۆ مىرزانىڭ تىزگىن ۇستاۋىمەن ءبىراز بيىكتەردى باعىندىرىپ كەلەدى. ەستەرىڭىزدە بولسا، «جاڭاوزەن» قاسىرەتى كەزىندە وسى قىرىمبەك مىرزا ماڭعىستاۋ وبلىسىنىڭ اكىمى ەدى. ياعني وسى وقيعاعا بايلانىستى ءبىراز «جامان اتى» شىققان. ەندى مىنە ءوزى تۋعان ءوڭىرى قىزىلوردانىڭ كوشىن العا سۇيرەۋگە مىقتاپ كىرىسكەن سياقتى.
ال ەكىنشى ورىندا وقو جالپى ەسەپتە 1000-عا جۋىق داۋىس جيناعان.
ايتا كەتەرلىگى – وڭتۇستىك قازاقستان وبلىسىنىڭ ەكونوميكالىق ءوسىمى ءوز الدىنا. اسىرەسە، اكىمشىلىك اپپاراتىنا بەرىك ءۋالي مىرزا بارعالى بەرى وڭتۇستىكتەگىلەردىڭ ءيميدجى بارعان سايىن بيىكتەدى دەسەك ارتىق ايتقاندىق بولماس. اتاپ ايتار بولساق - تاۋەلسىزدىك مەرەكەسىن تويلاۋ، ناۋىرىز مەيرامىن قارسى الۋ، ەسكەرتكىشتەر، جەڭىس سولداتتارىن 70 كۇن ۇلىقتاۋ، قازاقستاندىق ونىمدەردى قولداۋ اكسياسى سەكىلدى ماڭىزدى شارالار جۇرتقا ەتەنە تانىس.
ال ساۋالناما قورىتىندىسى بويىنشا ەڭ كوپ داۋىسقا يە بولىپ، داۋىس بەرۋشىلەردىڭ 30 پايىزعا جۋىعى، ياعني 1200 ادامنىڭ داۋىسىن جيناعان ماڭعىستاۋ وبلىسى – قازاقستاننىڭ ەڭ ۇزدىك وبلىسى اتاندى. اليك ايداربايەۆ مىرزا باسشىلىق ەتەتىن وبلىس قالاي ۇزدىك اتاندى؟ ءبىز ماڭعىستاۋ وبلىسىندا اتقارىلعان بىرنەشە يگىلىكتى جۇمىستاردىڭ ءتىزىمىن جاساپ كوردىك.
- «اق بۇلاق» باعدارلاماسىن ىسكە اسىرۋ ناتيجەسىندە ورتالىقتاندىرىلعان سۋ جۇيەسىمەن قالالىق جەرلەر - 87 %-عا، اۋىلدىق جەرلەر - 28 %-عا قامتىلعان.
- تۇرعىن ءۇي–كوممۋنالدىق شارۋاشىلىعىن جاڭعىرتۋ باعدارلاماسى اياسىندا بيىلعى جىلى اقتاۋ قالاسىنىڭ 2ء-شى، 3ء-شى، جانە 3ء-شى «ا» شاعىن اۋداندارىنداعى 10 تۇرعىن ۇيدە كۇردەلى جوندەۋ جۇمىستارى جۇرگىزىلگەن.
- وبلىستا «بالاپان» باعدارلاماسىن ىسكە اسىرۋ ناتيجەسىندە 3 جاس پەن 6 جاس ارالىعىنداعى سابيلەردى مەكتەپكە دەيىنگى تاربيەمەن قامتۋ جۇيەلى قولعا الىنعان.ياعني بۇل كۇندە بالاباقشامەن قامتۋ – 81 % بولسا، 2020 جىلعا دەيىن بالاباقشامەن قامتۋدى 100 %-عا جەتكىزۋ جوسپارلانعان. وسى ناتيجەگە جەتۋ ءۇشىن بيىلدىڭ وزىندە 660 ورىندىق 4 بالا باقشانىڭ قۇرىلىسى ءبىتىپ، پايدالانۋعا بەرىلگەن.
- بيىلعى جىلى «قولجەتىمدى تۇرعىن ءۇي - 2020»باعدارلاماسىنىڭ بارلىق باعىتتارى بويىنشا 487 مىڭ شارشى مەتر ءۇيدى پايدالانۋعا بەرۋ جوسپارلانعان. قازىرگى ۋاقىتتا ونىڭ 280 مىڭ شارشى مەترى قولدانىسقا بەرىلگەن. بۇل وتكەن جىلمەن سالىستىرعاندا 30 %-عا ارتقان.
- ماڭعىستاۋ وبلىسىندا جىلدان جىلعا حالىق سانى دا ارتىپ كەلەدى. بۇگىندە وبلىستا 595 مىڭ ادام تۇرادى، ال جىل سايىنعى ءوسىم كورسەتكىشى 4%-دى قۇرايدى.
سونداي-اق، وڭىردەگى جالپى ىشكى ءونىمنىڭ قورىتىندىسى بويىنشا تۇراقتى ءوسىم - 1 ترلن. 880 ملرد. تەڭگەنى قۇراعان. جان باسىنا شاققانداعى جالپى وڭىرلىك ءونىم بويىنشا وبلىس باسقا وڭىرلەر اراسىندا ءتورتىنشى ورىندا. ال ماڭعىستاۋ وبلىسىنداعى ەڭ جوعارعى جالاقى كورسەتكىشى - 222 مىڭ تەڭگەنى قۇرايدى ەكەن.
«بارەكەلدى» دەيىك! ءىس ىلگەرى بولسىن!
ال قاي وبلىستار كوشتىڭ سوڭىندا قالدى؟ Qamshy.kz پورتالى جۇرگىزگەن ساۋالناما قورتىندىسى بويىنشا ەڭ تومەن داۋىس جيناعان - سولتۇستىك وڭىرلەر بولدى. جالپى داۋىس بەرۋشىلەردىڭ 0 پايىزىن جيناعان سقو-عا بار-جوعى 13 ادام داۋىس بەرگەن. ال اقمولا وبلىسىنا داۋىس بەرگەندەردىڭ سانى - 19 ادام. ەڭ سوراقى ناتەجيەلەرگە يە بولعان سولتۇستىك وبلىستاردىڭ ۇشتىگىن قوستاناي وبلىسى باستاپ-اق تۇر. قورىتىندى ناتەجيەدە 1 پايىزعا اۋپىرىمدەپ ءجۇرىپ ىلىنگەن قوستاناي وبلىسىنا نە ءبارى- 38 ادام داۋىس بەرگەن. كۇن سايىن 20 مىڭنان استام وقىرمانى بار سايتىمىزدا جۇرگىزىلگەن ساۋالناماعا سولتۇستىك وڭىرلەردەن تىم قۇرىعاندا 50 ادام ءۇن قاتپاعانىنا تاڭعالدىق. بۇل سولتۇستىك قازاقستان، پاۆلودار، قوستاناي، اقمولا سياقتى وڭىرلەردىڭ مەملەكەتتىك تىلگە پىسقىرمايتىنىن تاعى ءبىر دالەلدەگەندەي بولدى. سوعان قاراعاندا بۇل وبلىستار پرەزيدەنت نۇرسۇلتان نازاربايەۆ قاداعالاپ وتىرعان، سولتۇستىكتەگى بوس جۇمىس ورىنىنا وڭتۇستىك تۇرعىندارىن تارتۋ سىندى ۇلى باستاماعادادا «ءپىشتۋ» دەيتىن سياقتى.
ال اقتوبە، الماتى، اتىراۋ، قاراعاندى، جامبىل، شىعىس قازاقستان، باتىس قازاقستان وبلىستارى وگىز ولمەيتىن، اربا سىنبايتىن بەل ورتانى كورسەتتى.
ارينە، «ەڭ ۇزدىك وبلىس» تاڭداۋى مۇنىمەن شەكتەلمەيدى. دەگەنمەن كۇنىنە 20 مىڭنان استام وقىرمانى بار، قازاقستانداعى ءقازاقتىلدى سايتتاردىڭ كوش باسىندا كەلە جاتقان «قامشى» ساۋالناماسىنان دا ءبىراز نارسەنى اڭعارۋعا بولاتىن سياقتى. الدا «ەڭ ۇزدىك» ايدارىمەن ءالى تالاي ساڭلاقتاردى ساراپتايتىن بولامىز.
