ورتالىق سايلاۋ كوميسسياسى پرەزيدەنتتىك ۇمىتكەر بولۋعا ۇسىنىس بىلدىرگەن 4 ادامنىڭ ۇسىنىسىن قابالداۋدان باس تارتتى. بۇل تۋرالى Qamshy.kz  پورتالى حابارلايدى. وسك ءتوراعاسى،  قۋاندىق تۇرعانقۇلوۆ: - سايلاۋعا قاتىسۋعا ۇسىنىس بىلدىرگەن قوس ۇمىتكەردىڭ جاستارى كونستيتۋسيالىق تالاپتارعا ساي كەلمەيدى.  ولاردىڭ ءبىرى - "JH-قۇرىلىس" ج ش س قىزمەتكەرى، قۇرىلىسشى باقىت ابدىكەرىموۆ، ەكىنشىسى كولىك جۇرگىزۋشى سۋحراب مىرزاشيەۆ. وسى قوس نيەت ءبىلدىرۋشىنىڭ جاستارى 40-قا تولماعاندىقتان ولار سايلاۋعا ۇمىتكەر رەتىندە جىبىرىلمەيدى. ولاردىڭ ءبىرى - 37-دە، ەكىنشىسى - 30-دا عانا. وسك باس حاتشىسى باقىت مەلدەشوۆتىڭ ايتۋىنشا، ۇمىتكەرلەردى تىركەمەستەن بۇرىن، ولارعا تالاپقا ساي كەلمەيتىندىكتەرى ەسكەرتىلگەن. الايدا ولار "بۇل ءبىزدىڭ كونستيتۋسيالىق قۇقىعىمىز" دەپ قارسىلىق بىلدىرگەن. ورتالىق سايلاۋ كوميسسياسى ۇمىتكەر اسقار سىرعابايەۆتى دا تىركەۋدەن باس تارتتى. سەبەبى، اسقار سىرعابايەۆ مەملەكەتتىك ءتىلدى ەركىن مەڭگەرمەگەن. ول مەملەكەتتىك ءتىلدى ەركىن مەڭگەرگەنىن تەكسەرەتىن سىناقتان وتە الماعان بولاتىن. سونداي-اق، قازاق ءتىلىن جەتىك مەڭگەرەمەگەنى ءۇشىن سايفوللا الداجانوۆتىڭ دا ءوتىنىشى قابىلدانباعان. ال وسك پرەزيدەنتتىككە ۇمىتكەرلىككە نيەت ءبىلدىرۋشى ليمانا قويشييەۆانىڭ مەملەكەتتىك تالاپتارعا تولىقتاي ساي ەكەنىن ەسكەرە وتىرىپ، ونىڭ ۇسىنىسىن قابىلداعانىن مالىمدەدى. بۇگىن وسك ۇمىتكەر ليمانا حانىمعا  قول جيناۋ قاعازدارىن بەرۋ تۋرالى شەشىم شىعاردى. "الايدا پرەزيدەنتتىكتەن ۇمىتكەر ليمانا قويشييەۆا بۇگىن ورتالىق سايلاۋ كوميسسياسىنا كەلىپ، قاعازداردى الىپ كەتۋى كەرەك ەدى، كەلمەدى. ول ءقازىر كەپتەلىستە تۇر"،-دەدى باقىت مەلدەشوۆ. ال كوميسسيا ءتوراعاسى قۋاندىق تۇرعانقۇلوۆ ليمانا حانىمنىڭ  كوميسسيا الدىنا كەلۋى شارت ەمەس ەكەندىگىن ەسكەرتتى. وسىعان دەيىن وسك پرەزيدەنتتىككە ۇمىتكەر رەتىندە 10 ادامنىڭ ۇسىنىس بىلدىرگەنى تۋرالى قازاقستاندىق بۇقارالىق اقپارات قۇرالدارى جارىسا جازعان بولاتىن. ءتىپتى، ۇسىنىس بىلدىرۋشىلەردىڭ اراسىندا وزگە ۇلت وكىلدەرى دە بولعان. قازىرگى تاڭدا، پرەزيدەنتتىككە ۇمىتكەر رەتىندە ۇسىنىس بىلدىرۋشىلەر  ءتۇرلى سالا ماماندارى عانا. ولاردىڭ اراسىندا ماي قۇيۋ بەكەتىنىڭ يەسى، كولىك جۇرگىزۋشىسى، زەينەتكەر، قۇرىلىسشى ت.س.س. بار. الايدا، ۇمىتكەرلەردىڭ اراسىندا ساياسي ءبىلىمى، ەل باسقارۋ قابىلەتى بار، مەملەكەتتىك ءتىلدى 100 پايىز مەڭگەرگەن  تۇلعا ءالى كەزدەسكەن جوق.