وتباسىنداعى ايەلدەرگە قارسى زورلىق-زومبىلىقپەن كۇرەسۋگە شاقىراتىن "قۇتقارۋ ارمياسى" (Army of Salvation) قايىرىمدىلىق قورى عالامتوردى شۋلاتقان كويلەكتى جارناما ءۇشىن پايدالاندى.

جانۇيادا نازىك جاندىلارعا قارسى كۇش قولدانۋمەن كۇرەسۋدى ۇگىتتەيتىن اقپاراتتىق پوستەر شىعارۋ كەرەك بولعان ۇيىم جەرگىلىكتى جارناما كومپانياسىنا وسى تاقىرىپقا قاتىستى تاپسىرىس بەرەدى. ناتيجەسىندە كومپانيانىڭ كرەاتيۆشىل توبى جەلىگە كەلۋشىلەردىڭ تالاس-تارتىسىن تۋدىرعان كويلەكتى ىزگى ماقسات ءۇشىن پايدالانۋدى ۇيعارىپ، بۇل تۋرالى "قۇتقارۋ ارمياسىنا" حابارلاپ، كەلىسىمدەرىن الادى. اتىشۋلى كويلەكتى سانبيكەگە كيگىزىپ، ونىڭ ءۇستى-باسىن ءتۇرلى جاراقات العانداي ەتىپ، گريمدەپ، بويايدى. ال جارناماداعى جازۋدا بىلاي دەلىنگەن: "ەگەر "ول مۇنداي ءومىردى ءوزى تاڭداپ الدى" دەپ ويلاساڭىز مۇلدە قاتەلەسىز. ءاربىر التىنشى ايەل وتباسىنداعى زورلىق-زومبىلىقتان زارداپ شەگۋدە. نازىك جاندىلارعا قارسى زورلىق-زومبىلىقتى بىرگە توقتاتايىق". قايىرىمدىلىق قورىنىڭ وكىلى فرەنك بەرگوين بۇل جارناماعا قاتىستى بىلاي دەدى: "تالايلاردىڭ تارتىسىن تۋعىزعان كويلەكتى قايىرىمدىلىق ماقساتتا قولدانعاننىڭ ەشبىر ابەستىگى جوق. كەرىسىنشە، ءبىز وسى ارقىلى بۇگىنگى كۇنگى ايەلدەردىڭ باستى قيىندىقتارىنىڭ بىرىنە قارسى كۇرەسۋ جولىندا جۇمىلا تۇسەتىن بولامىز". ال عالامتورعا كەلۋشىلەر جارناماعا بىردەن كوڭىل اۋدارىپ، ونى تۆيت ارقىلى ءارى قاراي تاراتا جونەلدى. "قايىرىمدىلىق قورىنىڭ مۇنداي تانىمال تاقىرىپتى قولدانۋى – ماقتان تۇتارلىق نارسە"، - دەپ جازىپتى جەلىنى پايدالانۋشىلاردىڭ كوبى.