BI Group كومپانياسىنىڭ نەگىزىن قالاۋشى قازاقستاندىق كاسىپكەر ءارى سپورتشى ايدىن راحىمبايەۆ تابىستى كومپانيا قۇرۋدىڭ قۇپياسىن اشتى.

قاڭتار ايىندا وتكەن "داكار" راللي-مارافونىندا ۇزدىك وندىققا كىرگەن ول ەڭبەك جولىن قاراپايىم قۇرىلىسشى رەتىندە باستاعان Vlast.kz سايتىنا بەرگەن سۇحباتىندا ايتتى. بۇگىندە ءىرى كومپانيانىڭ باسشىسى بولسا دا، ول ءالى كۇنگە دەيىن قۇرىلىسشىلىقتان باس تارتپاعانىن ايتتى.

"مەن ءقازىر دە قۇرىلىسشىمىن. ءيا، بۇرىن ۇيلەر سالعانمىن، ءقازىر كومپانيانىڭ قۇرىلىسىن جۇرگىزىپ جاتىرمىن. قاتارداعى جۇمىسشى بولعانىمدا مەن ءىرى كومپانيانىڭ باسشىسى بولۋدى ارمانداعان جوقپىن. الايدا، كىشكەنتايىمنان وقۋعا قۇمار بولعانىم مەنى وسى كۇنگە جەتكىزدى"، - دەيدى راحىمبايەۆ.

ول بيزنەستە تابىستى بولۋى ءۇشىن تامىر-تانىس، بايلانىس كەرەك پە دەگەن سۇراقتى جاۋاپسىز قالدىرمادى.

"كەيدە بايلانىس كەرەك، كەيدە كەرەك ەمەس. الدىعا ماقسات قويساڭ، بارىنە دە جەتۋگە بولادى. جالپى بايلانىس دەگەن نە؟ مەنىڭ اكەم 30 جىل بويى كولحوزدا مەحانيزاتور بولىپ ەڭبەك ەتتى. انام ءومىر بويى پوشتاشى بولدى. مەنىڭشە، بايلانىس دەگەنىمىز جاقىن ادامدارىڭ مەن دوستاردىڭ سەنىمى"، - دەيدى كاسىپكەر.

ايدىن راحىمبايەۆ قاراپايىم قۇرىلىسشىدان كومپانيا باسشىسى اتانۋ ءۇشىن نە ىستەۋ كەرەكتىگىن دە ءتۇسىندىرىپ ءوتتى.

"مەن جاقسى ءارى ساپالى جۇمىس ىستەسەم دەپ ويلادىم. ال اتالعان جۇمىسقا قانشاما كۇش كەتەتىنى بولەك اڭگىمە. بيىل ءبىزدىڭ كومپانيامىزعا 20 جىل تولادى. ال مەن جەتى كۇندىك ەڭبەك دەمالىسىما ون جىلدان كەيىن شىعىپپىن. بار ۋاقىتتا جۇمىس ىستەدىم. ءتىپتى، ءقازىردىڭ وزىندە ەڭبەك دەمالىسىنا كەتەتىن ۋاقىت جوق. مەن تابىسقا جەتۋدىڭ ەڭ باستى كەپىلى – تەك قانا جۇمىس ىستەۋ دەپ بىلەمىن. ءتىپتى، ءبىر تانىمال ادامنىڭ "سەنبى كۇنى دەمالاتىن بولساڭ، كومپانيانىڭ 60 پايىزعا ءوسۋى مۇمكىن ەمەس" دەگەنى بار"، - دەيدى قازاقستاندىق كاسىپكەر.

ول ءوزىنىڭ باسقا بيزنەسمەندەردەن قانداي ايىرماشىلىعى بارىن دا اتاپ بەردى.

"مەن بولىسكەندى جاقسى كورەمىن. كومپانياداعى توپ-مەنەدجەرلەرمەن مەن كومپانيانىڭ ۇلەسىمەن بولىسەمىن. تابىسىممەن بولىسەمىن. بۇگىندە كومپانياداعى 8 مىڭ ادامنىڭ 800ء-ى بونۋستىق باعدارلامالارعا يە. ياعني، وزدەرى جۇمىس ىستەيتىن جوبادان قوسىمشا پايدا كورىپ وتىر. مەن بارلىق جۇمىسشىنىڭ وسىنداي تابىس تاباتىنىن كۇنىنە تەزىرەك جەتكىم كەلەدى"، - دەيدى كاسىپكەر.

سونىمەن قاتار، ايدىن راحىمبايەۆ ءالى كۇنگە دەيىن قۇرىلىس نىساندارىن ارالاۋدان شارشامايتىنىن، ءتىپتى، ءاربىر جەرتولە مەن شاتىرلاردى دا باقىلاپ، كورىپ شىعاتىنىن ايتقان.

"ماسەلە ءبارىن تەكسەرىپ، قاتاڭ باقىلاۋدا ەمەس. مەن وسى ىسىمنەن ءوزىم راحات الامىن. قاي جەرىن جاقسارتىپ، قاي جەرىن تۇزەتۋ كەرەكتىگىنە كوز جەتكىزەمىن. ءاربىر جەكسەنبى سايىن 25-30 جۇمىسشىنى ەرتىپ الىپ، قۇرىلىس الاڭىن ارالاپ شىعۋ ادەتىمە اينالعان"، - دەدى ول.

ايدىن راحىمبايەۆ العاشقى ميلليونىنا 28 جاسىندا قول جەتكىزگەن. ءقازىر كاسىپكەر $280 ملن-مەن Forbes.kz جۋرنالىنىڭ نۇسقاسى بويىنشا 23ء-نشى ورىنعا تۇراقتادى.

ميلليونەر قايىرىمدىلىققا قوماقتى قاراجات ءبولىپ، وتاندىق ونەرگە جاناشىر رەتىندە تانىلعان ازامات.

ەسكە سالا كەتەيىك، تانىمال كاسىپكەر اۆتوجارىسپەن دە اۋەستەنەدى. سۇحبات بارىسىندا ول جۇمىسىنا كەسىرى تيمەۋ ءۇشىن جارىسقا تەك دەمالىس كۇندەرى بارىپ، جۇمىس ۋاقىتىنا ۇلگەرۋ ءۇشىن ماراپاتتاۋ راسىمىنە قاتىسپايتىنىن دا اشىق ايتتى.

ايدىن راحىمبايەۆ بيىلعى "داكار" كوپكۇندىگىندە 9-شى ورىن يەلەنگەن بولاتىن.