قاراعاندى وبلىسى بالقاش قالاسىندا سەگىزىنشى سىنىپتا وقيتىن ءۇش وقۋشى جالعان لاڭكەستىككە قاتىستى دەپ تانىلىپ، كۇدىكتى رەتىندە ۇستالدى. بۇل تۋرالى وبلىستىق ءىىد باسپا ءسوز قىزمەتىنەن حابارلادى.
پوليسيانىڭ حابارلاۋىنشا، 6 ناۋرىز كۇنى 101 نومىرىنە بالقاش مەكتەپتەرىنىڭ بىرىندە جارىلعىش زات قويىلعانى جايىندا حابارلاما تۇسكەن. وسىدان كەيىن وقيعا ورنىنا قۇقىق قورعاۋ ورگاندارى مەن ارنايى قۇتقارۋ قىزمەتى ماماندارى شۇعىل بارعان.
تەكسەرۋ قورىتىندىسى بويىنشا، مەكتەپتەن جارىلعىش زات تابىلعان جوق.
"جەدەل ىزدەستىرۋ شاراسى قولعا الىنىپ، پوليسيا قىزمەتكەرلەرى وسى مەكتەپتە سەگىزىنشى سىنىپتا وقيتىن ءۇش وقۋشىنى انىقتادى. كىنالىلەردىڭ ايتۋىنشا، ولار وسىلاي ازىلدەگىسى كەلگەن"، - دەلىنگەن حابارلامادا.
تەررورلىق اكتى تۋرالى جالعان اقپارات تاراتقانى ءۇشىن وقۋشىلارعا قاتىستى سوتقا دەيىنگى تەرگەۋ امالدارى جۇرگىزىلىپ جاتىر. "كازينفورم"
