«ۆاليۋتالىق رەتتەۋ جانە ۆاليۋتالىق باقىلاۋ تۋرالى» زاڭ جوباسىن قابىلداۋدىڭ نەگىزگى مىندەتى ۆاليۋتالىق وپەراسيالار مونيتورينگىن كەڭەيتۋ جانە قازاقستان اۋماعىنداعى ەسەپ ايىرىسۋلاردا شەتەل ۆاليۋتاسىن قىسقارتۋ بولىپ تابىلادى. زاڭ جوباسىن قابىلداۋ قاراپايىم ازاماتتارعا اسەر ەتپەيدى، سەبەبى ۆاليۋتالىق رەتتەۋدىڭ ىرىقتاندىرىلعان قاعيداتتارى ساقتالعان. بۇل تۋرالى بۇگىن قازاقستان ۇلتتىق بانكىنىڭ ءتوراعاسى دانيار اقىشيەۆ ق ر پارلامەنتى سەناتىنىڭ پلەنارلىق وتىرىسىندا بايانداما جاساعان كەزدە ايتىپ بەردى، دەپ حابارلايدى Qamshy.kz اقپارات اگەنتتىگى ق ر ۇلتتىق بانك باسپا ءسوز قىزمەتىنە سىلتەمە جاساپ.

ول زاڭ جوباسى شەڭبەرىندە نەگىزگى تۇزەتۋلەردى اتاپ ءوتتى.

«ءبىرىنشى – بۇل شەتەلدىك ۇيىمداردىڭ فيليالدارىن رەزيدەنتتەر رەتىندە تانۋ. قولدانىستاعى زاڭناماعا سايكەس شەتەلدىك ۇيىمداردىڭ فيليالدارى بەيرەزيدەنتتەر رەتىندە قازاقستاندا ۆاليۋتالىق وپەراسيالاردى جۇزەگە اسىرۋعا قۇقىلى. ولاردىڭ قازاقستان تۇلعالارىمەن ەسەپ ايىرىسۋىن تەڭگەگە اۋىستىرۋ ۇسىنىلادى»، - دەدى د. اقىشيەۆ. ول وسى تۇزەتۋلەردىڭ جەرگىلىكتى كومپانيالار مەن شەتەلدىك ۇيىمداردىڭ فيليالدارى ءۇشىن بيزنەس جۇرگىزۋدىڭ تەڭ تالاپتارىن قامتاماسىز ەتۋگە مۇمكىندىك بەرەتىنىن اتاپ ءوتتى.

«كەلەسى – بۇل ۆاليۋتالىق وپەراسيالار تۋرالى اقپارات جيناۋ راسىمدەرىن جەڭىلدەتە وتىرىپ بەيرەزيدەنتتەرمەن ۆاليۋتالىق وپەراسيالاردى قامتۋدى كەڭەيتۋ»، - دەدى قازاقستان ۇلتتىق بانكىنىڭ باسشىسى. ول تىركەۋ مەن حابارلاۋدىڭ كۇردەلى رەجيمى جويىلاتىنىن اتاپ ءوتتى. ولاردىڭ ورنىنا ۆاليۋتالىق شارتتاردى ءبىرىڭعاي ەسەپتىك تىركەۋ ەنگىزىلەدى.

زاڭ جوباسىندا اقشانى ەلدەن اكەتۋ بەلگىلەرى بار ۆاليۋتالىق وپەراسيالاردىڭ تىزبەسىن ەنگىزۋ ارقىلى ەلدەن اقشانىڭ اكەتىلۋىنە قارسى ءىس-قيمىلدى كۇشەيتۋ كوزدەلەدى. ول مۇنداي بەلگىلەرگە اقشانىڭ قازاقستانداعى شوتقا ءتۇسۋىن كوزدەمەيتىن قارجىلاي قارىزدار، سونداي-اق پايىزسىز قارىزدار، 720 كۇننەن استام مەرزىمگە بەرىلەتىن كوممەرسيالىق كرەديتتەر جاتاتىنىن ءتۇسىندىردى.

د. اقىشيەۆتىڭ ايتۋىنشا، ەلدەن اقشانىڭ اكەتىلۋىنە قارسى ءىس-قيمىلدى كۇشەيتۋگە مەملەكەتتىك كىرىس ورگانىمەن بەلسەندى اقپاراتتىق جانە وزگە دە ءوزارا ءىس-قيمىل ىقپال ەتەدى. «اقپاراتپەن ءتيىمدى الماسۋ ءتۇرلى مەملەكەتتىك ورگاندارعا ءبىر مامىلە بويىنشا جالعان مالىمەتتەردى انىقتاۋعا مۇمكىندىك بەرەدى»، - دەپ حابارلادى ول.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۆاليۋتالىق رەتتەۋ جانە ۆاليۋتالىق باقىلاۋ، قارجى ۇيىمدارىنىڭ قىزمەتىن تاۋەكەلگە باعدارلانعان قاداعالاۋ، قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ جانە قازاقستان رەسپۋبليكاسى ۇلتتىق بانكىنىڭ قىزمەتىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسىنىڭ شەڭبەرىندە ۇلتتىق بانك پەن قارجى مينيسترلىگىنىڭ مەملەكەتتىك كىرىستەر كوميتەتى اراسىنداعى مالىمەتتەر الماسۋ بويىنشا قارىم-قاتىناستار رەتتەلەدى.

سونىمەن قاتار د. اقىشيەۆ قازاقستانداعى ۆاليۋتالىق قۇندىلىقتاردىڭ اينالىس ءتارتىبىن ناقتىلاۋدى بولەك اتاپ ءوتتى. ول زاڭ جوباسىندا بانكتىك ەمەس ايىرباستاۋ پۋنكتتەرىنە ۇلتتىق بانكتىڭ شاعىن قۇيمالارىن ساتىپ الۋ جانە ساتۋ قۇقىعى ۇسىنىلاتىنىن ايتىپ بەردى.

قازاقستان ۇلتتىق بانكىنىڭ باسشىسى تۇزەتۋلەردىڭ جوسپارلى ەكەندىگىن جانە اعىمداعى وزگەرىستەرگە، ونىڭ ىشىندە «قورعاس» شەكارا ماڭى ىنتىماقتاستىعى حالىقارالىق ورتالىعى» ارنايى ەكونوميكالىق ايماعىنىڭ قۇرىلۋىنا، سونداي-اق قازاقستاننىڭ دۇنيەجۇزىلىك ساۋدا ۇيىمىنا كىرۋىنە بايلانىستى ەكەندىگىن اتاپ ءوتتى.