وسىعان دەيىن ەلىمىزدە 26 ساۋىردە وتەتىن كەزەكتەن تىس پرەزيدەنت سايلاۋىنا ءوزىن-وزى ۇسىنۋ ءتارتىبى بويىنشا پرەزيدەنتتىككە ۇمىتكەر بولۋعا نيەتتى مۇرات تەلىبەكوۆتىڭ مالىمدەمەسى ءبىرقاتار قازاقستاندىق باق-تا جاريالانعان.

قحا ۇسىنىسىن ۇكىمەت مۇشەلەرى جانە ق ر پرەزيدەنتى  ماقۇلداعاننان كەيىن Qamshy.kz پورتالىنىڭ ءتىلشىسى حالىق اراسىندا ءوزىن "ق ر مۇسىلماندار وداعىنىڭ ءتوراعاسى" دەپ تانىستىرعان مۇرات تەلىبەكوۆ مىرزادان سۇحبات العان بولاتىن. وندا مۇرات مىرزا ءوزىنىڭ باسقارىپ وتىرعان ۇيىمى "ادىلەت باسقارماسىنا" تىركەلگەنىن، قۇرامىندا 523 747 كىسى مۇشە ەكەنىن، ءوزىنىڭ كانديداتۋراسىن 1 456 329 كىسى ۇسىنعانىن جانە الداعى سايلاۋعا مىندەتتى تۇردە قاتىسۋعا نيەتتى ەكەنىن  ايتقان بولاتىن.

 بەلگىلى بولعانداي، ءبىر توپ ازامات قمدب-عا  «مۇسىلماندار وداعىنىڭ» ءدىني باسقارماعا قاتىسى بار ما؟ م.تەلىبەكوۆتىڭ مۇسىلماندار اتىنان ءوزىن ۇسىناتىن قۇقىعى بار ما؟ دەيتىن مازمۇندا سۇراقتار جولداعان.

وسى سۇراقتارعا قمدب-نىڭ جاۋابى مىناداي بولىپتى:

بىرىنشىدەن، ءبىزدىڭ سۇراۋىمىز بويىنشا ءدىني باسقارماعا ادىلەت مينيسترلىگى تاراپىنان رەسمي جاۋاپ حات كەلىپ ءتۇستى.

وسى حاتتا «قازاقستان مۇسىلماندار وداعىنىڭ» ۇيىم رەتىندە ەش جەردە تىركەلمەگەنى كورسەتىلگەن.

سونداي-اق، م.تەلىبەكوۆ قانداي دا ءبىر ءدىني بىرلەستىكتىڭ باسشىسى نە بولماسا مۇشەسى رەتىندە تىركەلمەگەن.

وسى ورايدا، قمدب م.تەلىبەكوۆتىڭ ءوزىن «قازاقستان مۇسىلماندار وداعىنىڭ» باسشىسى رەتىندە ايتۋعا جانە تىركەلمەگەن ۇيىمنىڭ اتىنان سويلەۋگە قۇقىعى جوق دەپ سانايدى.

سونىمەن قاتار، ب ا ق وكىلدەرىنەن ەندىگى جەردە م.تەلىبەكوۆتىڭ ەسىمىن ەلىمىزدىڭ مۇسىلماندىق ۇيىمدارمەن بايلانىستىرماۋىن جانە بارلىق اقپاراتتى تولىققاندى تەكسەرىپ وتىرۋىن سۇرايمىز دەلىنگەن.

ەكىنشىدەن، قوعامداعى ءدىني ماسەلەلەر بويىنشا ءپاتۋا شىعاراتىن رەسمي مەكەمە – قمدب عۇلامالار كەڭەسى.

وسىعان وراي، ءپاتۋا بەرۋ مارتەبەسىنە يە بولماعان جانە بارلىق مۇسىلمانداردىڭ اتىنان سويلەيتىن ادامنىڭ ارەكەتتەرىن قمدب قۇپتامايدى.

بۇل – مۇسىلمان ۇمبەتىنىڭ بىرلىگىنە سىزات ءتۇسىرىپ، بولىنۋىنە ىقپال ەتەدى. مۇسىلمان پەندەنىڭ ادامدار اراسىندا بۇلىك تۋدىرۋى دۇرىس ەمەس دەيدى.

پايعامبارىمىز مۇحاممەد (اللانىڭ وعان يگىلىگى مەن سالەمى بولسىن) ءبىر سوزىندە ناعىز مۇسىلماندى ادامدارعا تىلىمەن دە، ىسىمەن دە زيان تيگىزبەگەن پەندە دەپ سيپاتتاعان دەپ دالەل كەلتىرەدى.