تاۋەلسىزدىك العان جىلدارى ەلباسىنىڭ تىكە باستاماسىمەن جولعا قويىلعان "قازاق كوشى" بۇل كۇندە قاڭتارىلىپ تۇر. مەملەكەت باسشىسى سان مارتە قايتالاپ، "كوشكە كەدەرگى جاسالماسىن" دەسەدە، بازبىرەۋلەر "ۇلى كوشتىڭ" جالعاسۋىنا ايتارلىقتاي كەدەرگى كەلتىرىپ وتىر.

مىنە، تاعى ءبىر شۋ  اقمولا وبىلىسى، زەرەندى اۋدانى، قاناي بي اۋىلىنان شىقتى. بۇگىن-ەرتەڭ دەپ ەلەڭدەپ وتىرعان ەل پرەزيدەنتىن سايلاۋ ناۋقانىنا اقمولالىقتار "ورالمان قاماپ" دايىندالىپ جاتىر.

2014 جىلى شىلدەدە ءسايىپباي نۇربول دەگەن جىگىت وتباسىمەن اتاجۇرتقا كوشىپ كەلگەن ەدى، كەلە سالا سول جەردە ءۇش جىلدان بەرى تۇراتىن ءابىلماجىن ءقۇرمانالىنىڭ ۇيىندە تىركەۋگە تۇرعان. قۇجاتتارىن جيناپ، ىقتيارحاتىن الدىڭعى جۇما كۇنى 2015 جىلى 6 ناۋرىز الىپتى. ءسويتىپ،  وتكەن جىلدىڭ قاراشا ايىندا ساتىپ العان جاڭا ۇيىنە ەندى تىركەلەمىن بە دەپ وتىرعاندا زەرەندى اۋدانىنان پوليسيا كەلىپ، نۇربولدى الا جونەلگەن. ۋاجدەرى - ازامات ءوزى تىركەۋدە تۇرعان ۇيدە تۇرۋى كەرەك. ال مىنا نۇربولدىڭ جاڭا ساتىپ العان ءۇيى تىركەۋدە تۇرعان ۇيىنەن 2 مينۋتتىق جەردە ورنالاسقان. ىقتيارحاتتى جاڭا العانىن ايتىپ، ءمان-جايدى تۇسىندىرمەك بولعان قانداسىمىزدى الگى پاگوندىلار سوتتان ءبىراق شىعارعان. "ءاي، قايدا ءجۇرسىڭ" دەيتىن ەمەس، شاعىن اۋىلدا بار-جوعى 80-گە جۋىق وتباسى تۇرادى ەكەن.

سونىمەن، نۇربول ءسايىپبايۇلىنا "تىركەۋدە تۇرعان ۇيىنە تۇرماعاندىعى" سەبەپتى 80 مىڭ تەڭگە ايىپپۇل سالىنىپ، ءبىر تاۋلىككە قاماۋ جازاسى بۇيىرىلعان.

مەن جاعدايدى بىلگەننەن كەيىن تۇسكى مەزەتتە سوت جۇرگىزىپ وتىرعان جەردەگى پويسيامەن تەلەفون ارقىلى حابارلاسقان ەدىم.  ول "ءسىز قايدا قوڭىراۋ شالساڭىزدا، كىم بولساڭىزدا مەيلى، مەن تەك زاڭدى اتقارىپ جاتىرمىن" دەپ تەلەفوندى قويا سالدى.

ءسوز تۇسىنەتىن ءبىر ادام تابىلار دەپ  قاناي بي اۋىلىنىڭ اكىمى ءجۇسىپوۆ ءىلياس امانجولۇلىنا حابارلاسقانىمدا، "ءيا، ول ءبىزدىڭ اۋلدا تۇرادى، ايەلى، ەكى بالاسى بار.  مەن اۋىل اكىمىمىن، ىشكى ىستەر مەكەمەسىنىڭ شارۋاسىنا ارالاسپايمىن" دەپ جاۋابىن كەلتە قايىردى.

ءسويتىپ، ەشكىمنەن دەنى ساۋ جاۋاپ الا المادىق. شيەتتەي بالاسىمەن نۇربولدىڭ ايەلى وتىر زار ەڭىرەپ...

ءبىر تاڭعالعانىمىز، زەرەندى اۋدانىنىڭ ىشكى ىستەر دەپارتامەنتىندە وتىرعاندار 26 ساۋىردە قازاق ەلىندە پرەزيدەنت سايلاۋى وتەتىنىن، وعان "كەلگەن اعايىنعا بارلىق جاعدايدى جاساڭدار" دەگەن ەلباسى نۇرسۇلتان نازاربايەۆتىڭ قاتىساتىنىن بىلمەيتىن سياقتى.

تىم بولماسا وسىنداي ناۋقاندى كەزەڭدە "نۇرلى كوش" اۆتورىنىڭ قۇلاعىن شۋلاتپاسا كەرەك ەدى...

اياتجان احمەتجان