دۇنيەجۇزى قازاقتارىنىڭ قاۋىمداستىعى  اقساقالدار القاسى مۇشەلەرىنىڭ قازاقستان رەسپۋبليكاسىنىڭ بارلىق ازاماتتارىنا، تاۋەلسىزدىك جىلدارى  شەتەلدەردەن اتاجۇرتقا ورالعان اعايىندارعا

ءۇ  ن  د  ە  ۋ  ءى

بۇگىنگى تاڭدا الىس جانە جاقىن شەتەلدەردە 5 ميلليونعا جۋىق قازاق دياسپوراسىنىڭ وكىلدەرى تۇرادى. بۇل اعايىندارىمىز قاي جەردە، قاي ەلدە تۇرسا دا قازاق حالقىنىڭ قۇرامداس ءبىر بولىگى. سوعان وراي، ولار قازاقستان رەسپۋبليكاسىنىڭ اتاق-ابىرويىنىڭ اسقاقتاپ، وسىپ-وركەندەي بەرۋىنە ءبىر كىسىدەي تىلەكتەس. قازاق ەلىنىڭ بۇگىنى مەن بولاشاعىنا بايلانىستى قولعا الىنعان كەز-كەلگەن ءىس-شارالارعا دا  ايرىقشا كوڭىل ءبولىپ، بۇل جونىندەگى جاڭالىقتارعا ەرەكشە نازار اۋدارادى. مىنە، وسى تۇرعىدان كەلگەندە، شەتەلدەگى اعايىندار ءۇشىن  قازاقستانداعى بيىلعى  كەزەكتەن تىس پرەزيدەنت سايلاۋى – اسا ماڭىزدى ۋاقيعالاردىڭ ءبىرى. ياعني، الداعى ۋاقىتتا قازاق ەلىنىڭ تىزگىنىن كىم ۇستايدى، مەملەكەت باسشىسى بولىپ كىم سايلانادى دەگەن  ماسەلە ولاردى دا ەرەكشە ويلاندىرادى ءارى الاڭداتادى. ويتكەنى، تاريحي وتانىنىڭ تاۋەلسىزدىگى، باق-بەرەكەسى، يگى جەڭىستەرى دۇنيەجۇزىنىڭ تۇكپىر-تۇكپىرىندەگە بۇكىل  قانداستارىمىز ءۇشىن بارىنەن دە قىمبات.

ءدۇبىرى مول دۇنيە ءدال ءقازىر دۇربەلەڭ شاقتى باستان وتكىزۋدە. كوڭىلگە الاڭ سالارلىق جايتتار بۇگىنگى كۇنى تىم كوبەيىپ بارادى. بارىنەن دە ءقاۋىپتىسى، گەوساياسات اتتى الىپ اجداھانىڭ ويانىپ، قايتا باس كوتەرۋى، الەمنىڭ جاعرافيالىق كارتاسى بەتىنە وزگەرىستەر ەنگىزۋ ارەكەتىنىڭ ءورشۋى بولىپ وتىر. الەمدىك ەكونوميكالىق قۇرىلىمدى اركىم ءوز مۇددەسىنە ساي قايتا قۇرۋعا ۇمتىلۋشىلىق تا بايقالۋدا. بۇل رەتتە الەمنىڭ الپاۋىت ەلدەرىنىڭ نازارى شيكىزات كوزدەرىنە باي قازاقستان ءتارىزدى ەلدەرگە ەڭ الدىمەن ءتۇسىپ وتىرعاندىعى دا جاسىرىن ەمەس. مۇنىڭ سىرتىندا، جەر باۋىرلاپ جىلجىپ، جەر بەتىن تەگىس جايلاي باستاعان الەمدىك ەكونوميكالىق داعدارىس تاعى بار. قالاي دەگەندە دە، الداعى كەزەڭ كوپتەگەن مەملەكەتتەر ءۇشىن، ونىڭ ىشىندە سۇيىكتى قازاقستانىمىز ءۇشىن دە اۋىر سىناقتار مەزگىلى بولعالى تۇر. ىشتەگى، سىرتتاعى بارشا قازاق پەن بارلىق قازاقستاندىقتار كوزدىڭ قاراشىعىنداي ساقتاۋعا ءتيىستى ەل تاۋەلسىزدىگىنە، ىرگەلى مەملەكەتتىگىنە نۇقسان كەلمەۋ ءۇشىن ارەكەت ەتەر كەز كەلدى. ارينە، ەلدىڭ بىرلىگى، ىنتىماعى قاجەت مۇندايدا. شيرەك عاسىر ۋاقىت بويى نەبىر قيىن-قىستاۋ كەزەڭدەردەن قازاقستاندىقتاردى سۇرىندىرمەي وتكىزگەن، بۇگىنگى بيىك تابىستارعا قولدارىن جەتكىزگەن ەلباسى توڭىرەگىنە تىعىز توپتاسۋ قاجەت مۇندايدا. وسىعان بايلانىستى بىزدەر، تاريحي وتانىنا شەتەلدەن ورالعان قازاقتار استانادا وتكەن «نۇر-وتان» پارتياسىنىڭ كەزەكتەن تىس حVI سەزى جۇمىسىنا ۇلكەن قىزىعۋشىلىقپەن كوڭىل اۋداردىق. تاۋەلسىزدىك جىلدارىندا اتاجۇرت توپىراعىنا ورالعان ميلليونعا جۋىق (تابيعي ءوسىمىن ەسكەرسەك، جان سانى 1،5 ميلليون ادامعا جەتەدى) قازاقتىڭ قاي-قايسىسى دا وسىنداي سەزىمدى باستان كەشتى.   شەتەلدەگى جالپى سانى 5 ميلليونعا جۋىق  قازاق دياسپوراسى وكىلدەرى دە وسىناۋ ۇلتىمىزدىڭ ۇلى جيىنىنا ەلەڭدەي قۇلاق تۇرگەندىگىنەن حاباردارمىز. ءبارىمىز قازىرگىدەي دۇربەلەڭ شاقتا تاجىريبەلى دە بىلىكتى، تالاي سىناقتى باستان وتكىزگەن ن.ءا.نازاربايەۆتىڭ كانديداتۋراسىن سەزد دەلەگاتتارى ءبىراۋىزدان ق ر پرەزيدەنتتىگىنە ۇسىنعاندىعىن قۋانىشپەن قارسى الدىق.

قازاق توپىراعىنان تىس جەرلەردە  الماعايىپ عۇمىر كەشكەن، تالاي ساياسي ناۋقاندارعا كۋا بولعان بىزدەرگە قازىرگى كەزەڭنىڭ كۇردەلىلىگىن، ونىڭ سىنىنا ەلباسىمىز نۇرسۇلتان ءابىش ۇلى نازاربايەۆتىڭ توڭىرەگىنە تىعىز توپتاسۋ ارقىلى عانا توتەپ بەرە الۋعا بولاتىندىعىن  ايتۋ – پارىز. ويتكەنى، قازاقستان رەسپۋبليكاسىنىڭ جيىرما جىلدان ءسال عانا اسقان ۋاقىت ىشىندە بۇكىل الەم تانىپ، مويىنداعان، جانە الەۋمەتتىك-ەكونوميكالىق، مادەني-رۋحاني سالادا بارىنشا تەز قارقىنمەن دامىعان تاۋەلسىز مەملەكەتكە اينالۋى ەڭ الدىمەن ەل تىزگىنىن بەرىك ۇستاپ كەلە جاتقان تۇڭعىش پرەزيدەنتىمىز، ەلباسىنىڭ ەرەن ەڭبەگىنىڭ  ناتيجەسى. بۇل رەتتە ەلباسى تاۋەلسىزدىك العاننان بەرگى كەزەڭدە  وتكىزىلگەن الەم قازاقتارىنىڭ ءتورت قۇرىلتايىندا دا دۇنيەجۇزى قازاقتارى قاۋىمداستىعىنىڭ ءتورالقا ءتوراعاسى رەتىندە دۇنيەنىنىڭ تۇكپىر-تۇكپىرىنەن جينالعان اعايىندارعا قازاق ەلىن دامىتۋ جونىندە جۇزەگە اسقان جاقسى ىستەردى، قولعا الىنۋعا ءتيىس بيىك ماقسات-مىندەتتەردى جان-جاقتى تالداپ ورتاعا سالعان ەدى. سوعان وراي، الىس-جاقىنداعى اعايىندار نۇرسۇلتان نازاربايەۆتى قازاقستان رەسپۋبليكاسىنىڭ پرەزيدەنتى عانا ەمەس، جەر جۇزىندەگى بۇكىل قازاقتىڭ كوشباسشىسى رەتىندە باعالاپ، ءقادىر تۇتادى.

ءقادىرلى وتانداستار! سىزدەردى وسى ايتىلعان جايتتاردى ەسكەرىپ جانە ەل بولاشاعى الدىنداعى ءوز جاۋاپكەرشىلىكتەرىڭىزدى تەرەڭ سەزىنىپ الداعى پرەزيدەنت سايلاۋىندا نۇرسۇلتان ءابىش ۇلى نازاربايەۆتىڭ كانديداتۋراسىنا  ءبىر كىسىدەي داۋىس بەرۋگە شاقىرامىز.

تالعات ماماشيەۆ، دۇنيەجۇزى قازاقتارى قاۋىمداستىعى ءتورالقا ءتوراعاسىنىڭ ءبىرىنشى ورىنباسارى

ءسۇلتانالى بالعابايەۆ، دۇنيەجۇزى قازاقتارى قاۋىمداستىعى ءتورالقا ءتوراعاسىنىڭ  ورىنباسارى

ۋاقاپ قىدىرحان، جازۋشى، دۇنيەجۇزى قازاقتارى قاۋىمداستىعى جانىنداعى اقساقالدار القاسىنىڭ ءتوراعاسى

ارىستان توسىن، قاجى، ەۋروپادان ورالعان

اياتحان تۇرىسبەك، كاسىپكەر، موڭعوليادان ورالعان

بەلدەۋباي قىپشاقباي، زەينەتكەر، موڭعوليادان ورالعان

ساعيدولدا ءالي، دارىگەر-زەينەتكەر، قحر-دان ورالعان

زەينەل رۋستەم، زەينەتكەر، اۋعانستاننان ورالعان

مەللات رامەت ۇلى، جازۋشى، قحر-دان ورالعان

دينا بولەشوۆا، عىلىم كانديداتى، وزبەكستاننان ورالعان

قابدەن التاي، حاليفا التاي ابىزدىڭ بالاسى، تۇركيادان ورالعان

قامبار وزتەمىر، كاسىپكەر، اۋعانستاننان ورالعان