بيىل شىعىس تۇركىستانداعى الاش يدەياسىن ناسيحاتتاۋشى ۇلت قايراتكەرى، تاريحي تۇلعا، اقىن، اعارتۋشى تاڭجارىق جولدى ۇلىنىڭ (1903-1947) تۋعانىنا 112 جىل تولدى. تاڭجارىق – قازاق جازبا پوەزياسىنىڭ كوركەمدىك دەڭگەيىن كوتەرىپ قانا قويماي، ايتىس ونەرىنىڭ دە تاريحي بەتتەرىن اشقان ادۋىندى ايتىسكەر. ابايدان باستاپ زامانداسى بولعان الاش ارىستارىنىڭ شىعارماشىلىعىن جەتە تانىپ مەڭگەرگەن. الاش يدەياسىن قىتايداعى قازاقتارعا ءتۇرلى جولدارمەن ناسيحاتتاعان. قۇلجادا العاش رەت قازاق تەاترىن اشىپ بەيىمبەتتىڭ «شۇعا» پەساسىن ساحنالاپ، باستى ءرولدى سومداعان. 1935-جىلى جۇڭگو قازاقتارىنىڭ تۇڭعىش ءباسپاسوزى – «ىلە وزەنىن» شىعارۋى ۇيىمداستىرعان ءارى باس رەداتورى بولعان. كوپتەگەن مەكتەپتەردىڭ اشىلۋىنا ىقپال ەتكەن. اقىننىڭ كوپ ولەڭى اباقتىدا جازىلعان. تۇرمە ادەبيەتىن قالىپتاستىرىپ، سول كەزدەگى قوعامدىق شىندىقتى ولەڭ، تولعاۋ، اندەرى ارقىلى بۇكپەسىز پاش ەتكەن. اقىننىڭ كوپتەگەن ولەڭ، ارناۋ، تولعاۋلارى، قيسا-داستاندارى مەن ايگىلى ايتىستارى بار. اقىن شىعارمالارىندا XX عاسىردىڭ العاشقى جارتىسىنداعى قىتايداعى قازاقتاردىڭ تاريحي تاعدىرى، الماعايىپ ساياسي احۋال، كۇردەلى الەۋمەتتىك ماسەلەلەر اينا قەتەسىز اشىپ كورسەتىلەدى. اقىننىڭ 112 جىلدىعىنا، قازاق حاندىعىنىڭ 550 جىلدىق مەرەي تويىنا وراي 17-18-ناۋرىزدا الماتىدا قالالىق «تاڭجارىق وقۋلارى» وتەدى. وعان قالاداعى 8 وقۋ ورنىنان 40تان استام ستۋدەنت، ماگيسترانت قاتىسپاق. يگى شارانى قازاق مەملەكەتتىك قىزدار ۋنيۆەرسيتەتى ۇيىمداستىرىپ وتىر. باستى ماقساتى: الاش ۇراندى ادەبيەتتىڭ بەلدى وكىلى، ۇلت قايراتكەرى، اقىن-اعارتۋشى تاڭجارىق جولدى ۇلىنىڭ ولەڭدەرىن، ونەگەلى ءومىرىن دارىپتەۋ، جاس ۇرپاقتى قازاق ادەبيەتى مەن تاريحىنىڭ اقتاڭداقتارىن اشۋعا، زەردەلەۋگە شابىتتاندىرۋ. قاتىسۋشىلار تاڭجارىق ولەڭدەرىن جاتقا وقىپ، اقىن ءومىرى مەن شىعارماشىلىعى تۋرالى سۇراقتارعا جاۋاپ بەرىپ، تەاترلاندىرىلعان قويىلىمدار جاسايدى. وعان تاڭجارىقتانۋشى عالىمدار، زەرتتەۋشىلەر، بەلگىلى ايتىسكەر اقىندار، تانىمال انشىلەر قاتىسپاق. ءىس-شارا اياسىندا تاڭجارىق جولدى ۇلىنىڭ ايتىستارىنان ءۇزىندى ورىندالىپ، اندەرى شىرقالادى.
شارانىڭ وتەتىن ۋاقتى: 18.03.2015ج. ساعات: 14:00 مەكەن-جايى: الماتى قالاسى، گوگول كوشەسى، 114. 1- عيمارات، 218 كابينەت، قازاق ادەبيەتى كافەدراسى. بايلانىس تەلەفوندارى: تۇرسىنباي ءداۋىت ۇلى: 233-19-31، 8-701-148-20-10
