20 ناۋرىز. Qamshy.kz -  بۇگىن الماتى قالالىق اكىمشىگىندە جەڭىل اۆتو كولىكتەرگە ارنالعان اقىلى اۆتوتۇراقتارعا قاتىستى مالىمدەمە جاسالدى. بۇل تۋرالى "قامشى" پورتالى حابارلايدى.

"ەگەر اقىلى اۆتوتۇراقتاردا ارنايى بەلگى جوق بولسا، كولىك جۇرگىزۋشىسى اقى تولەۋگە مىندەتتى بولىپ ەسەپتەلمەيدى. ول اركىمنىڭ جەكە قالاۋى.  ءقازىر قالاداعى كوپتەگەن اۆتوتۇراقتاردىڭ ورتاشا اقىسى - 100 تەڭگە.  ەگەر جۇرگىزۋشى اقى تولەگىسى كەلمەسە، ول ونىڭ جەكە شارۋاسى بولىپ تابىلادى. ياعني، تۇرعىندارعا  اقى تولەۋ مىندەتتەلمەيدى"، -دەيدى قالالىق اكىمشىلىك قىزمەتكەرى ەركەبۇلان ورازالين.

ال ناۋرىزدىڭ 14ء-ى كۇنگى الماتىنىڭ قاق ورتاسىندا بولعان وقيعا جۇرتىڭ جاعاسىن ۇستاتقان ەدى.  ول كەزدە اۆتوتۇراق اقىسىن تولەۋدەن باس تارتقان كولىك جۇرگىزۋشىسى ءدۇيىم جۇرتتىڭ الدىندا تۇراق قىزمەتكەرىنە تاپانشادان وق اتقان. وسى وقيعا الەۋمەتتىك جەلىلەر مەن باق-تا جاريالانعاننان سوڭ وق اتقان جۇرگىزۋشى يۆان حۋتور نە ءۇشىن وسىنداي قادامعا بارعانىن ايتتى.  يۆاننىڭ ايتۋىنشا ول بۇل ارەكەتكە قورعانۋ ماقساتىندا بارعان.  ال كەيبىر باق-تا  وقيعا ورىن العان تۇراقجايدا ارنايى بەلگىنىنڭ بولماعانىن جازعان. سونداي-اق، اقى تولەۋگە ارنالعان تەرمينال دا بولماعان.

"ول جەرگە بوگدە ادامدار قاپتاپ كەتتى. ءبارى ماعان دۇرسە قويا بەرگەن سوڭ مەن تراۆماتيكالىق تاپانشانى جەرگە قاراتىپ ەكى-ۇش رەت وق اتتىم. ءبىراق، ماقساتىم كىسىنى جارالاۋ ەمەس ەدى. تەك ماعان ءتونىپ كەلە جاتقانداردى قورقىتۋ عانا بولاتىن. كورگەن ادامدار مۇنى تەز ارادا ۆيدەوعا ءتۇسىرىپ جاتتى"،-دەيدى جۇرگىزۋشى يۆان حۋتور.

بۇگىندە الماتى قالاسىندا 70ء-تىڭ ۇستىندە اقىلى اۆتوتۇراق بار. ولاردىڭ بىردە-بىرەۋىندە اكىمشىلىك قىزمەتكەرى اتاپ وتكەن بەلگى قويىلماعان. ال اكىمشىلىكتەگى جيىندا الماتىداعى تۇراقجايلاردان تۇسەتىن قارجىنىڭ 20 پايىزى عانا قالالىق قازىناعا تۇسەتىنىن ايتتى. مىسالى،ۇستىمىزدەگى جىلى بۇل سوما 75 ميلليوندى قۇراعان.

ال تۇراقجاي قىزمەتكەرىنە وق اتقان جۇرگىزۋشىگە قاتىستى قىلمىستىق ءىس قوزعالىپ، يۆان حۋتورعا قالادان شىقپاۋ تۋرالى قول حاتپەن بوساتقان.

"ال جانجال كەزىندە باسىمنان قاتتى سوققى الدىم" دەگەن جۇرگىزۋشى بار كىنانى تۇراقجاي قىزمەتكەرىنە جاۋىپ، ءوزى قاسكەلەڭ قالاسىنداعى اۋرۋحاناعا جاتىپ العان.  ايتۋىنشا، زاڭدى قۇجاتىن كورسەتە الماعان ولار ءبىرىنشى بولىپ جۇدىرىق جۇمساپتى. ارتىنان تاعى ارىپتەستەرىن شاقىرعان. ولار دا سوزگە كەلمەستەن يۆاندى سوققىعا جىعا باستاپتى. ول ازداي، كولىگىمدى توناپ، ءتىپتى ايداپ كەتپەك تە بولدى دەيدى جۇرگىزۋشى.

نۇرزات توعجان