جەر جارالىپ، سۋ اققالى تۇران توپىراعىندا مىناداي ءبىر ءداستۇر ساقتالعان. قار استىنان ميزامشۋاق تەبىندەپ، كەر دالانى بوز جۋسان اڭقىتىپ ءاز ناۋرىز تۋعاندا كۇن مەن ءتۇن تەڭەلىپ، حان مەن قارا تەڭەلىپ ءبىر ءماز مەيرام بولىسادى ەكەن. حان جارشىسى جەر جاھانعا جار سالىپ، كىل ساڭىلاقتاردى حان ورداسىنا الدىرادى. قاراشا ىشىنەن سۋرىلىپ شىعىپ، قايمانادان ونەر وزدىرعان شىن دارىندىعا حان ءبىر كۇنگى تاعىنان ءتۇسىپ، ەل بيلەتىپتى. («حان مەن قارا تەڭەلىپتى» دەگەن ءسوز وسىدان قالسا كەرەك.) ءاز ناۋرىزدا ايتىلعان قاراشانىڭ قالاۋى –  حان تارابىنان كەرى قايتارىلماعان ەكەن. (بۇل موتيۆ كونە اڭىزداردى زەرتتەگەن عالىمداردىڭ ەڭبەكتەرىندە دە ايتىلادى.)

مىنە، قىسىتىڭ توڭى ءجىبىپ، قار كوبەسىن سوگىپ، قازاق دالاسىنا ءاز ناۋرىز دا جەتتى. ەبى جەلدەي جۇيتكىپ وتكەن جىلقى جىلعا سالاۋات ايتىپ، موماقان قوي جىلىن قارسى الماقپىز. كۇللى شىعىس حالىقتارىنىڭ جاڭا جىلى تابىلدىرىقتان اتتاعالى تۇر. وسى ورايدا جوعارىدا ايتىپ وتكەندەي «حان مەن قاراشا تەڭەلەر» تۇستا بىزدە ەل تىزگىنىن ۇستاعان ەلباسىنا دات ايتپاقپىز. (دات تا ەمەس، حات دەگەنىمىز دۇرىس شىعار). تەك ءبىر اۋىز تىلەگىمىز بار. سوزگە قوناق بەرگەن، ءسوز قۇنىن ءوز قۇنىم دەپ تۇسىنەتىن حالىقپىز عوي. سوندىقتان مۇنىڭ ەشبىر ابەستىگى جوق دەگەن ۇمىتتەمىز.

قۇرمەتتى، قازاق ەلىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ مىرزا!

ءسىزدى، الداعى ۇلىستىڭ ۇلى كۇنى ءاز ناۋرىز مەيرامىمەن قۇتتىقتاي كەلە، ساۋىردە بولاتىن سايلاۋداعى ۇمىتكەرلىگىڭىزگە ساتتىلىك تىلەيمىز!

ءبىزدىڭ سىزگە ايتپاق اقجولتاي تىلەگىمىز، ۇلىستىڭ ۇلى كۇنىن جاڭا جىلدى قارسى العانداي، (ناۋرىزدىڭ جيىرما بىرىننەن جيىرما ەكىسىنە قاراعىن ءتۇنى) قولىڭىزعا شارا تولى قىمىز الىپ، قاراشا حالقىڭىزدى قۇتتىقتاساڭىز. وسىنى  جىل سايىنعى بۇلجىماس داستۇرگە اينالدىرساڭىز ەكەن دەپ سۇرايمىز.

بۇل ەل بىرلىگى ءۇشىن، ءارى ءاز ناۋرىز مەيرامىنا تاماشا ءار بەرەتىن ەدى.

اتالعان باستاما – ەل ىشىندەگى ءتۇرلى ۇلتتار مەن ەشقانداي ەلارالىق ساياساتقا  كولەڭكەسىن تۇسىرەتىن قادام ەمەس دەگەن ويدامىز.

ەل ءۇشىن ماڭىزدى حاتتى حانعا جەتىزۋ ءۇشىن، حان ۋازىرلەرى شىبىن جانىن پيدا ەتكەندىگى تاريحتان ءمالىم. سوندىقتان ءبىزدىڭ بۇل ءوتىنىشىمىز جەردە قالماس دەگەن ۇمىتتەمىز.

ۇلىستىڭ ۇلى كۇنى ءاز ناۋرىز قۇت بەرەكە اكەلسىن!

قوي جىلى ەلىمىز قوماقتى تابىستارعا جەتسىن!

قۇرمەتپەن: باقىتبەك قادىر ۇلى،  ىقىلاس وجاي ۇلى،  قامشى.كز اقپاراتتىق پورتالىنىڭ ۇجىمى

سۋرەت: http://www.profi-forex.org/