ءبىراز بۇرىن qamshy.kz سايتىندا ءاليحان بوكەيحانوۆتىڭ اتقوسشىسى بولعان رامازان اتتى كىسىنىڭ بالاسى قابىلبەك اقساقالمەن بەلگىلى جۋرناليست، اقىن ىقىلاس وجاي ۇلىنىڭ ۆيدەو سۇحباتى جاريالانىپ ەدى.
ۆيدەو سۇحباتتى جاريالاۋ بارىسىندا ىقىلاس: «قابىلبەك اقساقالمەن التى ساعاتقا جۋىق اڭگىمەلەسىپ، اڭگىمەسىن بەينەتاسپاعا جازىپ الدىق. جانىمىز اۋىرا وتىرىپ جارتى ساعاتقا قىسقارتقان بەينەبايان كوپ اڭگىمەنىڭ كوزمونشاقتاي ءبىر ۇزىگى عانا. بارلىعىن تولىقتاي بەرۋگە كورەرمەننىڭ ۋاقىتىن ايادىق»، - دەگەن تۇعىن.
جارتى ساعاتقا جۋىق اسەرلى سۇحباتتى كورىپ شىققان سوڭ «شىركىن، قىسقارتىپ، مونتاجداۋ بارىسىندا تالاي اسەرلى اڭگىمە تاسادا قالدى-اۋ، ىقىلاستىڭ وزىمەن جولىققاندا بۇل جايلى سۇرارمىز» دەپ ويلاپ ءجۇر ەدىك. ءساتى ءتۇسىپ استانادا جولىقتىق، اڭگىمەلەستىك. «ءاليحاننىڭ ازاماتتىق ءومىرى مەن كىسىلىك كەلبەتىن كورسەتەتىن ءبىر كەرەمەت دەتال بار ەدى، سول جەرىن جىگىتتەر بايقاماي قىسقارتىپ جىبەرىپتى» دەگەن جەرىن وزىنەن جازىپ الدىق.
اڭگىمە بىلاي بولادى. ءبىر كۇنى سەمەي شارىسىنە ساكەن سەيفۋللين كەلەدى. ءاليحان بوكەيحانوۆ كۇتىپ الادى. ات اربامەن كەلە جاتقاندارىندا، نە سايتان ءتۇرتتى ەكەن، كوشەگە تەزەگىن تاستاماي ۇيرەنگەن جانۋار كۇيىسىنەن جاڭىلىپ، تەزەگىن تاستايدى. ءدال سول كەزدە رامازان اتقوسشىنىڭ بۇيىرىنە سارت ەتىپ تاياق تيەدى. توسىننان تيگەن تاياققا رامازان مارقۇم ارتىنا جالت قارايدى. ەۋروپانىڭ اقسۇيەكتەرى سەكىلدى قولىنا تاياق ۇستاپ، سەرى جۇرەتىن ساكەن: «مۇنىڭ نە؟ اتتى دۇرىس باپتاپ ۇيرەتپەيسىڭ بە!»، - دەپ ەكىنشى رەت ۇرماقشى بولعاندا، ساكەننىڭ تاياق ۇستاعان قولىن شاپ بەرىپ ۇستاپ العان ءاليحان: «ساكە، ءبىر اشۋىڭدى بەر، مال مالدىعىن قىلادى دا»، - دەپ سابىرعا شاقىرادى. ارتىنا بۇرىلعان رامازان اتقوسشى ءاليحاننىڭ كوزىندەگى تامىپ كەتەردەي ءۇيىرىلىپ تۇنعان جاستى كورىپ، اڭىرىپ تۇرىپ قالادى. «مىنە، وسىنداي كىسى ەدى، انامداي مەيىرىمدى ەدى. ارى قاراپ كەتكەن ارىسىم بەرى بۇرىلىپ كەلمەدى عوي. سونداي مەيىرىمدى، سونداي ادال كىسىنى كوزى قيىپ، ءقايتىپ اتتى ەكەن بۇل ۇكىمەت. وسىنى تۇسىنە المادىم»، - دەپ كوزىنە جاس الاتىن رامازان اكەم». قابىلبەك اقساقالدىڭ دا ءۇنىن وكسىك جايلاپ، ايتقانى وسى ەكەن.
جازىپ العان ىرىسبەك دابەي
skifnews.kz
