قازاقستان قور بيرجاسىنىڭ تاڭعى سەسسياسىندا دوللاردىڭ قۇنى ورتاشا مولشەرلەمەدە 5 تەڭگەگە ءوستى، دەپ حابارلايدى Qamshy.kz اقپارات اگەنتتىگى.

قور بيرجاسىندا دوللار قۇنى 353،53 تەڭگەگە تۇراقتاعان. بۇل، كەشەگى 8 تامىزداعى دوللار قۇنىنان 5،39 تەڭگەگە قىمبات. ال، اقشا ايىرباستاۋ ورىندارىندا دوللار 356 تەڭگەدەن ساتىلىپ جاتىر.

وسىلايشا دوللار قۇنى 2016 جىلدىڭ 11 قاڭتارىندا قازاقستان قور بيرجاسىنداعى (KASE) تاڭەرتەڭگى سەسسيا قورىتىندىسى بويىنشا تىركەلگەن دوللاردىڭ ورتاشا باعامىمەن تەڭەسىپ، 2،5 جىلدان كەيىن قايتالادى.

تەڭگەنىڭ دوللارمەن رەسمي باعامى قازاقستان قور بيرجاسىنىڭ 2 سەسسياسىنىڭ قورىتىندىسىمەن بەكىتىلەدى.

ۇلتتىق بانك ءبىر اپتا بۇرىن تەڭگەنىڭ السىرەۋىن «تەڭگە باعامىنىڭ ۇزاق مەرزىمدى ۇردىسىنە ىرگەلى فاكتورلار اسەر ەتەدى، ولارعا نەگىزىنەن مۇناي باعاسى، نەگىزگى ساۋدا ارىپتەس ەلدەرى ۆاليۋتالارىنىڭ باعامدارى، سونداي-اق تولەم بالانسىنىڭ جاي-كۇيى، ينفلياسيا دەڭگەيى، ۇلتتىق بانكتىڭ بازالىق مولشەرلەمەسى، الەمدىك پايىزدىق مولشەرلەمەلەر جاتادى»، - دەپ تۇسىندىرگەن. شەتەلدىك ينۆەستورلاردىڭ پورتفەلدىك ينۆەستيسيالارى قازاقستاننىڭ ۆاليۋتا نارىعىنا اسەر ەتۋ فاكتورى رەتىندە جەكە ەسكەرۋدى تالاپ ەتەدى. قازىرگى ۋاقىتتا ق ر باعالى قاعازدار نارىعىندا ۇلتتىق بانكتىڭ نوتتارىن ۇستاۋشى بەيرەزيدەنتتەر كولەمىنىڭ جانە ايىرباستاۋ باعامىنىڭ كەرى تاۋەلدىلىگى بايقالادى.

سوڭعى ۋاقىتتا فەدەرالدىق رەزەرۆتىك جۇيەسى (فرج) مونەتارلىق ساياساتىنىڭ قاتاڭداۋى اياسىندا پورتفەلدىك ينۆەستيسيالاردىڭ اكەتىلۋىنە بايلانىستى كوپتەگەن دامۋشى نارىقتاردىڭ ۇلتتىق ۆاليۋتالارىنىڭ السىرەۋى بايقالادى، بۇل تۇرعىدان قازاقستان ەرەكشەلەنگەن جوق. سونىمەن بىرگە باعالاردىڭ نارىقتىق كونيۋنكتۋراسى جانە ەكونوميكا ءوسۋىنىڭ وڭ قارقىندارى تەڭگەگە قولداۋ كورسەتتى جانە قالعان فاكتورلاردىڭ السىرەۋشى اسەرىن جۇمسارتتى، بۇل تەڭگە باعامىنىڭ اقش دوللارىنا قاتىستى سالىستىرمالى تۇردە العاندا شامالى السىرەۋىندە كورىندى.