بۇگىن، 26 ناۋرىزدان باستاپ، قازاقستان پرەزيدەنتتىگىنە 3 كانديدات وزدەرىنىڭ ۇگىت-ناسيحات جۇمىستارىن باستايدى.

ايتا كەتەيىك، ەلىمىزدىڭ ورتالىق سايلاۋ كوميسسياسى پرەزيدەنتتىككە كانديدات رەتىندە “نۇر وتان” پارتياسى اتىنان نۇرسۇلتان نازاربايەۆتى، قازاقستاننىڭ كوممۋنيستىك حالىق پارتياسى اتىنان تۇرعىن سىزدىقوۆتى، كەزەكتەن تىس پرەزيدەنتتىك سايلاۋعا ءوزىن-وزى ۇسىنعان ءابىلعازى قۇسايىنوۆتى تىركەگەن بولاتىن.

ولاردىڭ بارلىعى دا قازاقستان پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسياسىنىڭ ەمتيحانىن تاپسىرىپ، “قازاقستان رەسپۋبليكاسىنداعى سايلاۋ تۋرالى” كونستيتۋسيالىق زاڭىندا تالاپ ەتىلەتىن بارلىق قۇجاتتاردى وسك-گە وتىزگەن.

سونىمەن قاتار، 1 ملن 60 مىڭ تەڭگە كولەمىندەگى سايلاۋ جارناسىن دا تولەدى. قازاقستان پرەزيدەنتتىگىنە كانديدات بولىپ تىركەلۋ ءۇشىن ۇمىتكەرلەر سايلاۋشىلاردىڭ 93 مىڭنان استام راستالعان قولىن جيناۋ كەرەك بولاتىن.

ەسكە سالا كەتەيىك، 25 ناۋرىزدا كانديداتتاردى تىركەۋ مەرزىمى اياقتالدى.

“پرەزيدەنت سايلاۋىن بەكىتكەننەن باستاپ، قاجەتتى جۇمىستاردىڭ بارلىعىن اتقاردىق. قانشاما سەمينار، وتىرىستار ءوتتى. سايلاۋ ناۋقانىن كەزەڭ-كەزەڭگە ءبولىپ قاراستىرساق، ءبىرىنشى كەزەڭى اياقتالدى. 26 اقپاننان باستاپ، پرەزيدەنتتىك سايلاۋعا كانديداتتار وزدەرىن ۇسىنا باستادى. وزدەرىڭىز بىلەتىندەي، 27 كانديدات ورتالىق سايلاۋ كوميسسياسىنا ۇمىتكەر رەتىندە ءوز وتىنىشتەرىن بەرگەن. سونىڭ ىشىندە، 25 كانديدات ءوز ءوزىن ۇسىنعان، ەكى كانديدات رەسپۋبليكالىق قوعامدىق بىرلەستىك جوعارعى ورگانىنان ۇسىنىلدى. ۇسىنعان ازاماتتاردىڭ اراسىندا ەكى ايەل بولدى: قويشييەۆا ليمانا جانە وتەپوۆا ايگۇل. كانديداتتاردىڭ ورتاشا جاسى – 54 جاستا ەكەن. 2005 جىلمەن سالىستىرعاندا، سول جىلى 18 كانديدات ءوتىنىش بەرگەن ەكەن، ونىڭ ىشىندە ءۇش كانديتدات قالعان. 2011 جىلى 22 كانديدات ءوتىنىش بەرگەن، ونىڭ ىشىندە ءتورت ادام قالعان”، – دەدى وسك حاتشىسى باقىت مەلدەشيەۆ.