ق ر ۇلتتىق كىتاپحاناسىنىڭ زالىندا تۇرىك تىلىندە جازىلعان قازاق جازۋشىلارى كىتاپتارىنىڭ تۇساۋكەسەرى ءوتتى.
بەردىبەك سوقپاقبايەۆتىڭ «مەنىڭ اتىم - قوجا»، تايىر جومارتباي ۇلىنىڭ «قىز كورەلىك»، سپانديار كوبەيەۆتىڭ «قالىڭ مال»، ءمىرجاقىپ دۋلات ۇلىنىڭ «باقىتسىز جامال»، سۇلتانماحمۇت تورايعىروۆتىڭ «قامار سۇلۋ» شىعارمالارى تۇرىك تىلىندە جارىق كوردى.
باسپادان بۇل كىتاپتاردىڭ ازىرگە العاشقى سيگنالدى نۇسقاسى باسىلىپ شىققان. قايتا قارالىپ، تۇزەتۋلەر ەنگىزىلگەننەن كەيىن قالىڭ وقىرمانعا جول تارتادى.
جوبا دەمەۋشىسى - تۇركيا رەسپۋبليكاسىنىڭ انكارا قالاسىنداعى كەچيورەن اۋدانىنىڭ اكىمى مۇستافا اق. اكىم باستاعان دەلەگاسيا مەن تۇركيانىڭ الماتىداعى باس كونسۋلى رىزا قاعان يىلماز شارانىڭ قۇرمەتتى قوناعى بولدى.
«بۇگىن ءبىز ءۇشىن ماڭىزدى كۇن. اتا قونىسىمىزدا قانداستارىمىزبەن باس قوسقانىمىزعا قۋانىشتىمىز. ۇلى مادەنيەتىمىزدىڭ ءيىسى تۇركى حالىقتارىنا ورتاق ەكەنى ءمالىم. وسى شاراعا قولداۋ بىلدىرگەنىمىزدەي، الداعى ۋاقىتتا دا حالىقارالىق ءمانى بار جوبالارعا اتسالىسامىز. سوڭعى جىلدارى دوستىق، باۋىرلاستىعىمىزدان بولەك، تىلدىك، مادەني قارىم-قاتىناسىمىز دامىپ كەلەدى. بۇگىنگى قازاق زيالىلارى ەڭبەكتەرىنىڭ تۇرىك تىلىنە ءتارجىمالانۋى، تيىسىنشە تۇرىك اۆتورلارى شىعارمالارىنىڭ قازاق تىلىندە جارىق كورىپ جاتقانى - وسىنىڭ دالەلى»،-دەدى انكارا قالاسىنداعى كەچيورەن اۋدانىنىڭ اكىمى مۇستافا اق.
ايتا كەتۋ كەرەك، بالالار ادەبيەتى باسپاسىنىڭ باستاماسىمەن ورحان كەمال، مەحمەت ساراي، مەحمەت راۋف، ايكۋت ەرتۋگرۋ، سۋنگۋ گيۋراي سىندى تۇرىك اۆتورلارىنىڭ كىتاپتارى قازاق تىلىنە اۋدارىلعان. قازىرگى تاڭدا قولجازبالاردى كىتاپ قىلىپ شىعارۋ ءۇشىن الماتى باسپالارىمەن كەلىسسوز ءجۇرىپ جاتىر.
پىكىر قالدىرۋ