كينەماتوگرافشىلارعا قولعابىس ەتۋ ماقساتىندا الماتى اكىمدىگى جانىنان ارنايى ورگان قۇرىلۋى مۇمكىن. Almaty Film Comission-نىڭ قىزمەتى تۋرالى الدا وتەتىن حالىقارالىق كينوفەستيۆالعا ارنالعان باسپا ءسوز ءماسليحاتىندا ايتىلدى.
15-19 قىركۇيەك ارالىعىندا الماتىدا العاش رەت Almaty Film Festival حالىقارالىق شاراسى وتەدى. فورۋم اياسىندا ۇزدىك 30 فيلم كورسەتىلەتىنى جوسپارلانعان. سونداي-اق قازاقستاندىق رەجيسسەرلەرگە ارنالعان سەنارييلەر بايقاۋى، بەلگىلى قوناقتاردىڭ شەبەرلىك ساباقتارى، قازاقستاندىق كينەماتوگرافشىلاردىڭ شەتەلدىك ارىپتەستەرمەن ىنتىماقتاستىعىن تالقىلاۋعا ارنالعان بيزنەس-فورۋمدار وتەدى.
Almaty Film Festival شاراسىنىڭ باس پروديۋسەرى ەرنار قۇرماشيەۆتىڭ ايتۋىنشا، ءقازىر وتاندىق كينويندۋستريادا سەرپىلىس بايقالۋدا جانە بۇل ءساتتى وتكىزىپ الماۋ ماڭىزدى.
«ءدال ءقازىر الماتى قالاسىنىڭ اكىمدىگىمەن بىرگە كينوفەستيۆالدى ۇيىمداستىرۋمەن قوسا، Almaty Film Comission-دى قۇرۋ بويىنشا كەلىسسوزدەر جۇرگىزۋدەمىز. كينوپروديۋسسەرلەر ءاردايىم اكىمدىككە كومەك سۇراپ جۇگىنەدى - تۇسىرىلىمدەر ءۇشىن جەدەل جاردەم، ءورت ءسوندىرۋ كولىكتەرى قاجەت، كەي جاعدايلاردا كينو ءتۇسىرۋ ءۇشىن كوشەلەردى جابۋعا تۋرا كەلەدى. سونداي-اق بەلگىلى ءبىر جەرلەردى ءتۇسىرۋ ءۇشىن اكىمدىكتەن رۇقسات كەرەك. ءقازىر اكىمدىك بىزگە قولداۋ كورسەتىپ وتىر. Almaty Film Comission - بۇل حالىقارالىق تاجىريبە. ول بارلىق كينەماتوگرافشىلارعا، سونىڭ ىشىندە شەتەلدىك ارىپتەستەرگە رەسۋرستارمەن كومەك كورسەتەتىن اكىمدىك جانىنداعى ورگان بولادى. جالپى بۇل وتاندىق كينويندۋستريانىڭ ىلگەرى جىلجۋىنا مۇمكىندىك بەرەتىن قۇرال بولماق»، - دەدى Almaty Film Festival باس پروديۋسەرى ەرنار قۇرماشيەۆ.
پىكىر قالدىرۋ