الماتىدا Mural Fest فەستيۆالى باستالعاننان بەرى 3 جىل ىشىندە 23 ءۇيدىڭ قابىرعاسىنا سۋرەت سالىنعان.

Mural Fest فەستيۆالى الماتىدا 3ء-شى رەت قاتارىنان وتكىزىلۋدە. جوبا اياسىندا قازاقستاندىق جانە شەتەلدىك سۋرەتشىلەر قالاداعى  ۇيلەردىڭ  قابىرعاسىنا سۋرەت سالادى.

بۇگىندە مەگاپوليستە 23 كوپقاباتتى تۇرعىن ءۇي سىرتى سۋرەتپەن ارلەنگەن.  قالادا مۇنداي ونەرمەن بىرنەشە سۋرەتشىلەر توبى اينالىسادى.

ماسەلەن، ۋكرايندىق دوكسانىڭ قازاقستاندىق سايد اتابەكوۆتىڭ فوتوكوللاجى جەلىسىمەن جاسالعان جۇمىسى بار. شەتەلدە ەڭبەكتەرى تانىمال Repas كومانداسى  شىمكەنتتىك سۋرەتشى راسۋل ەسمەسوۆتىڭ شىعارماسىن قابىرعاعا تۇسىرگەن. فەستيۆال كۋراتورى ءمولدىر بەكجاننىڭ ايتۋىنشا، «بالالار الەمدى بەينەلەيدى» قوعامدىق قورىنىڭ ۇسىنۋمەن 11 جاسار پاۆلودارلىق ءبۇلدىرشىننىڭ سۋرەتى  الماتى ۇيلەرىنىڭ ءبىرىنىڭ قابىرعاسىنا تاڭدالىپ الىنعان.

«بۇل تۋرالى جەلگە ۇشقان شىعىن دەپ ايتىپ جاتىر. الايدا بۇعان سونشالىقتى  قاراجات  كەرەك ەمەس. شەتەلدىك سۋرەتشىلەر بۇل فەستيۆالدى ەستىگەندە تاڭعالعاندارىن جاسارمايدى. سەبەبى ورتالىق ازيا بويىنشا  مۇنداي مونۋمەنتالدى ونەر فەستيۆالىن قازاقستاندا عانا ۇيىمداستىرىلىپ وتىر. ءوزىمىزدىڭ  قازاقستاندىق شەبەرلەر جىل سايىن قاتىسادى. جۇمىستىڭ كوپ بولىگى سولاردىڭ ەڭبەگى. حالىقارالىق فەستيۆال بولعاندىقتان  شەتەلدىك سۋرەتشىلەردى دە شاقىرامىز. ولاردىڭ كەلۋى قازاقستانعا، اسىرەسە الماتىعا  پايداسىن تيگىزەدى. «بۇركىتشى» بەينەسىن سالعان ۋكرايندىق سۋرەتشى اندرەي پالۆال ءوزىنىڭ 100 مىڭداعان وقىرمانى بار الەۋمەتتىك پاراقشاسىندا ءبىزدىڭ مادەنيەتىمىز تۋرالى جازعان. الماتى تۋرالى، مۇنداعى فەستيۆال جايلى كوپتەگەن سۋرەتشى بىلەدى، وزدەرى حابارلاسىپ، قاتىسۋعا نيەت ءبىلدىرىپ جاتادى »،-دەدى  ءمولدىر بەكجان.

كارتينالار قابىرعاعا تۇسپەس بۇرىن، ەسكيز تۇرىندە ۇيىمداستىرۋشىلار تاڭداۋىنان وتەدى. وسىدان كەيىن عانا شىعارمالاردىڭ قالا ومىرىنە سايكەس كەلەتىنى ىرىكتەلەدى.

بيىل سۋرەتشىلەر  ءبىرقاتار ۇيلەردىڭ سىرتىن ارلەگەن بولاتىن.

بەينەلەۋ ونەرىنىڭ تۋىندىلارى  بايتۇرسىنوۆ-گوگول، اباي-اۋەزوۆ كوشەلەرى قيىلىسىنداعى ، سونداي-اق  تولە بي بويىنداعى  ۇيلەردىڭ قابىرعاسىندا پايدا بولدى. كونستيتۋسيا كۇنى مەرەكەسى قارساڭىندا نازاربيەۆ پەن قابانباي باتىر قيىلىسىندا كارتينالاردىڭ سوڭعى شتريحتارى سالىنىپ ءبىتتى. ەسكيز اۆتورلارى الماتىلىق نەون مەن شامان ەسىمدى جىگىتتەر.

«يدەيا وزىمىزدىكى. بىزگە شەكتەۋ قويىلعان جوق. وتكەن جىلى ەسكيز جىبەرىپ ءبىر جۇمىسىمىز تاڭدالعان بولاتىن، بيىل وسىنى لايىق دەپ تاپتى. ءبىز بۇل جولى  بولاشاقتى بەينەلەۋگە تىرىستىق. ادامزاتتى ەرتە  مە كەش پە تەحنولوگيا زامانى كۇتىپ تۇر. بار تىرلىكتى قۇلتەمىرگە ارتىپ، ادامدار ۇزاق ءومىر سۇرە باستايتىن كەز الىس ەمەس»،-دەدى سۋرەتشىلەر.