الماتى كوشەلەرىندە جۇرگىزىلىپ جاتقان قارقىندى قۇرىلىس اياقتالۋعا جاقىن. قازىرگى تاڭدا تەگىستەلمەگەن 17 كوشە عانا قالىپ وتىر. ول تامىز ايىنىڭ اياعىنا دەيىن تولىق جاسالادى. جالپى، بيىل قالادا 157 كوشەدە ورتاشا جوندەۋ جۇمىستارى جوسپارلانعان بولاتىن. ودان بولەك، توزعان ترامۆاي رەلستەرى الىنىپ، ورنىنا جايلى جولدار توسەلۋدە. ۆەلوجولاقتار سالىنىپ، جۇرگىنشىلەرگە قولايلى جاعداي جاسالۋدا.
بيىل ماقاتايەۆ، بايتۇرسىنوۆ جانە جاروكوۆ كوشەلەرىندەگى ترامۆاي رەلستەرى الىندى. ۇزىن-ىرعاسى، 15 شاقىرىمنان اساتىن تەمىر جولداردىڭ ورنى تەگىستەلىپ، اسفالت توسەلدى. شويىن جولداردىڭ جالپى ۇزىندىعى 64 شاقىرىم بولسا، ولاردى تۇگەلدەي ارشۋ جۇمىستارى 2019 جىلى اياقتالماق. ال تەمىرجولدار الىنعان كوشە بويلارىنا ۆەلوجولدار سىزىلدى. بۇگىندە ۆەلوجولاقتىڭ جالپى ۇزىندىعى 78 شاقىرىمعا جەتكەن. ودان بولەك، قازىرگى تاڭدا بىرنەشە جولايرىق قۇرىلىسى ءجۇرىپ جاتىر
«الماتى قالاسى بويىنشا ءۇش كولىك جولايىرىعى سالىنىپ جاتىر. ولار: رىسقۇلوۆ داڭعىلى مەن ەمسوۆ كوشەسىنىڭ قيىلىسىنداعى، جانسۇگىروۆ كوشەسى مەن سەيفۋللين كوشەسىنىڭ قيىلىسىنداعى جانە رىسقۇلوۆ داڭعىلى مەن قۇلجا كۇرە جولىنىڭ قيىلىسىنداعى جولايرىقتارىنىڭ نەگىزگى قۇرىلىمدارى سالىنۋدا. اياقتالۋ مەرزىمى – 2019 جىلدىڭ جەلتوقسان ايى»، – دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ساعىندىق تەلىبايەۆ.
بيىل قالادا 155 شاقىرىمدى قۇرايتىن 157 كوشەگە ورتاشا جوندەۋ جۇمىستارىن جۇرگىزۋ جوسپارلانعان. ونىڭ ىشىندە، 140 كوشەدە جۇمىس تولىق اياقتالعان. ءقازىر تەك 17ء-سى قالىپ وتىر. مەردىگەرلەر وقۋ ماۋسىمى باستالعانشا تاس جولداردى تەگىستەپ ءبىتۋى ءتيىس. الاتاۋ اۋدانىنداعى 5 شاعىن اۋدانىنىڭ جوبالاۋ سمەتالىق قۇجاتتارى مەملەكەتتىك ساراپتامادان ءوتىپ، ءقازىر بايقاۋعا حابارلاما بەرىلگەن. تاعى 12 شاعىناۋداننىڭ قۇجاتتارى ازىرلەنىپ جاتىر. ودان وزگە، ناۋرىزباي اۋدانىنداعى 41 كوشەنى جاساۋ جوسپارلانعان.
«ورتاشا جول جوندەۋ جۇمىستارىن جۇرگىزىپ جاتقان مەردىگەر كومپانيا 3 كەپىلدىك بەرۋى ءتيىس. ياعني، ەگەر جۇمىس اياقتالعان سوڭ وسى ۋاقىت ارالىعىندا ول بۇلىنسە، نە كەمشىلىكتەر انىقتالسا، ونى ءوز قارجىسىنا قالپىنا كەلتىرۋى كەرەك»، – دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسىنىڭ ءبولىم باسشىسى نۇرزات وردابايەۆ.
سونىمەن قاتار، نازاربايەۆ داڭعىلىنىڭ بويى تۇگەلدەي جاڭارادى. باس-اياعى 7 شاقىرىم اۋماقتى قامتيتىن داڭعىلدىڭ قوس بەتىندە جۇرگىنشى جولىنا تولىقتاي كەسپە تاستار توسەلىنەدى. 80 مىڭ شارشى مەتردى قامتيتىن اۋماقتىڭ 20 مىڭى كوگالداندىرىلماق. سونداي-اق، داڭعىل بويىندا ورنالاسقان بارلىق شامدار، سوڭعى ۇلگىدەگى اسەم تۇرلەرىنە اۋىستىرىلادى. سودان كەيىن جۇرگىنشىلەر جولىنىڭ بويىنا 200 ورىندىق ورناتىلىپ، ءار قايسىسىنىڭ جانىنا قوقىس جاشىگى قويىلماق. وعان قوسا، 3 سۋبۇرقاق جاسالادى.
«نازاربايەۆ داڭعىلىن ۇشكە بولدىك. ءبىر جارتىسى قوستانايدان اكەلىنگەن كەسپە تاستان، ءبىر جارتىسى گرانيتتەن، ءبىر جارتىسى الماتىدان شىعارىلاتىن كەسپە تاستان بولماق. جاياۋ جۇرەتىن ادامعا وتە ادەمى. ەڭ باسىنان سوڭىنا دەيىن گازون سەبىلەدى. كىشكەنتاي اعاشتار، گۇلدەر وتىرعىزىلادى. بۇرىندارى قاراپايىم كورىنەتىن. ەندى ءبارى اسەم بولادى»، – دەدى قۇرىلىسشىلار توبىنىڭ جەتەكشىسى ءادىلحان ءابدىعاپاروۆ.
ءقازىر تيميريازيەۆ كوشەسىندە دە جۇمىس قاۋىرت. مۇندا برت جەلىسى ىسكە قوسىلماق. وسى ارقىلى قوعامدىق كولىكتەر ەش كەدەرگىسىز جۇيتكي الادى. جەلى ىسكە قوسىلعاننان باستاپ سولعا قاراي بۇرىلۋعا رۇقسات ەتىلمەيدى. قوعامدىق كولىكتەر جولدىڭ ورتاسىمەن، ال جەكە ماشينالار كوشەنىڭ قاپتالىمەن جۇرەتىن بولادى.
«تيميريازيەۆ كوشەسىندە جوندەۋ جۇمىسى قىركۇيەك ايىنىڭ بىرىندە اياقتالادى. مۇندا تەك اسفالت توسەلىپ قانا قويماي، بارلىق كوممۋنيكاسيا اۋىستىرىلىپ جاتىر. ودان بولەك، تروللەيبۋس جەلىسى دە جاسالۋدا»، – دەدى «جول-قۇرىلىس كومپانياسىنىڭ» ۆيسە-پرەزيدەنتى الەكساندر شيەۆەليەۆ.
برت جەلىسىنىڭ العاشقى كەزەڭى 8 شاقىرىمنان اسىپ جىعىلادى. بۇل جوبا مۇستافين، سۇلەيمەنوۆ، جاندوسوۆ، تيميريازيەۆ كوشەلەرى بويىمەن جەلتوقسان كوشەسىنە دەيىن سالىنادى. ال برت جەلىسىنىڭ ەكىنشى كەزەڭى جەلتوقسان كوشەسىنىڭ بويىمەن تولە بي كوشەسىنە دەيىن، تولە بي كوشەسىنەن شىعىس اينالما جولىنا دەيىن جۇرگىزىلىپ، شىعىس اينالما جولى ارقىلى قالا شەكاراسىنا دەيىن ۇزارتىلماق.
پىكىر قالدىرۋ