«الىسقا مەنى اكەتىڭدەر، دوستار!
تيبەتتەردىڭ عيباداتحاناسى بولسىن ول جەر...
جانىم سوندا عانا تىنىشتالار.
ءوزىمدى ءوزىم كەزىكتىرىپ، ماڭدايدان شىعار ىستىق تەر...»

(ەرنار سارسەيەۆ، «ىنتىزارلىققا تولى ولەڭ جولدارى» ولەڭدەر جيناعىنان، ورىسشادان قازاقشاعا اۋدارعان جازيرا بايدالى)

-ەرنار، قازاقيلىقتان الىسقا كەتپەيىك. العاشقى سۇراعىم، قايدانسىز جانە قايدا باعىت الدىڭىز دەگەن قيسىندا بولسىن.

-مەن تازا الماتىلىقپىن. اكە-شەشەم دە ءومىر باقي الاتاۋدىڭ بوكتەرىندە ءومىر سۇرگەن ادامدار. رۋىمدى سۇراساڭىز، شاپىراشتىمىن. شاپىراشتى بولعانىممەن شالقىپ جۇرگەنىم شامالى (كۇلىپ-اۆت.). اسفالتتا وسكەن قازاقتىڭ قاراپايىم بالاسىمىن. ءسىزدىڭ قازاق ءتىلدى جۋرناليست ەكەندىگىڭىزدى بىلە تۇرا ورىسشا سويلەپ جاتقانىما ايىپ ەتپەڭىز. قازاقشانى تۇسىنەمىن، ءبىراق، وكىنىشىمە قاراي، ەركىن كوسىلىپ جاۋاپ بەرە المايمىن.

-بالالاردىڭ سەرەبرالدى سال اۋرۋىنا (ارى قاراي – بسس) شالدىققان ازاماتسىز.  بۇل دياگنوز سىزگە 10 ايلىق كەزىڭىزدە قويىلىپتى. دارىگەرلەر بۇل اۋرۋدى جەڭۋگە بولادى دەيدى. 41 جىل بويى ءسىز بسس-پەن الىسىپ كەلەسىز. ايتىڭىزشى، وسى دەرت ءبىزدىڭ بالالارعا نەگە كەنەدەي جابىستى؟

-بۇل گەنەتيكالىق اۋرۋ ەمەس. تۇقىم قۋالامايدى. بالا اناسىنىڭ تار قۇرساعىن كەڭەيتىپ، دۇنيە ەسىگىن اشىپ جاتقاندا شاقالاققا زاقىم كەلەدى. اكۋشەر-گينەكولوگتاردىڭ كىناسى دەر ەدىم مۇندايدى. سەبەبى بسس-كە شالدىققان بالالاردىڭ سانى كۇن ساناپ وسۋدە. مەن دۇنيەگە كەلگەن پەرزەنتحانادا، مىسالى، مەنىمەن بىرگە ءبىر كۇندە تۋىلعان كوپتەگەن بالالاردىڭ ۋاقىت وتە كەلە وسى دەرتكە شالدىققانى بەلگىلى بولدى. دەمەك اكۋشەرلەردىڭ كاسىبيلىگى مەن بىلىمدىلىگىن تارازىلايتىن ۋاقىت الدەقاشان جەتتى دەگەن ءسوز. جالپى بسس-پەن شىنىمەن دە كۇرەسسە، ەڭ باستىسى، ەرتەرەك دياگنوز قويىلسا، بسس شەگىنەدى. 10 ايلىق كەزىمدە ءتىسىم شىقپاعان، ءبىر ورىندا وتىرا المايتىن بالا بولدىم. سول كەزدە عانا انام كۇدىكتەنگەن بولسا كەرەك. قانشاما نيەۆروپاتولوگقا مەنى كورسەتكەن. تەك بىرەۋى عانا «بۇل – بسس» دەپ دياگنوزدى ءدال قويا ءبىلىپتى. ەگەر دە دارىگەرلەر دياگنوزىمدى 10 ايدا ەمەس، مىسالى 4 ايىمدا انىقتاعاندا، بالكىم، ارباعا تاڭىلماي، وزدىگىمنەن جۇرە الۋشى ما ەدىم دەگەن ويعا قالامىن. قايتالاپ ايتامىن،  بۇل جەردەگى ەڭ باستى ماسەلە – دياگنوزدى ەرتەرەك انىقتاۋ. مەنىڭ مۇنداي حالگە دۋشار بولعانىم اناما، اكەمە وڭاي تيگەن جوق. ءبىراق ولار ءبىلىمدى، ساۋاتتى ازاماتتار بولاتىن. مەنىڭ اياققا تۇرىپ كەتۋىم ءۇشىن بار ءجان-تانىن سالدى. 16 جاسقا دەيىن بارماعان دارىگەرىم قالمادى. 17-گە تولعاندا انام ۇلىنىڭ ءومىر باقي مۇگەدەكتەرگە ارنالعان اربادا وتىراتىنىنا امال جوق كوندى.

ء-سىز كوندىڭىز بە؟ ۇنەمى كۇلىپ جۇرەسىز. ەشنارسەگە قاراماستان باقىتتى بولۋدىڭ سىرى نەدە؟

-انام كوندى دەگەن ءسوز كۇرەسۋدى توقتاتتى دەگەندى بىلدىرمەيدى. اردي دەگەن ۇيىم جايلى ەستۋىڭىز بار شىعار. مۇمكىندىگى شەكتەۋلى بالالاردىڭ اتا-انالارىنا ارنالعان قوعامدىق ۇيىم. ونى مەنىڭ انام اشقان بولاتىن. مەنىڭ تىك تۇرىپ كەتە الماسىمدى قابىلداعانىمەن، انام بسس-پەن شايقاسۋدى توقتاتقان ەمەس. اردي 1991 جىلى بالالارى دەرتكە شالدىعىپ، جۇرۋدەن قالعان اتا-انالارعا قولداۋ ءبىلدىرۋ، كومەك كورسەتۋ ماقساتىندا قۇرىلعان بولاتىن. مەن ءتىپتى سول ۇيىمدا وسى ۋاقىتقا دەيىن ءار ءتۇرلى قىزمەتتە جۇمىس ىستەدىم. ءسىزدىڭ ەكىنشى سۇراعىڭىزعا كەلسەك، باقىتتى بولۋ وڭاي. سەبەبى ادام ونسىز دا باقىتتى. اكەم كەزىندە «نەمەرە سۇيە المايتىن بولدىم» (مەن ءۇيدىڭ جالعىزىمىن-اۆت.) دەپ جىلاعان بولاتىن. مەن بولسام، وتىزعا دەيىن ءۇيلى-باراندى بولاتىنىما ءشۇبا كەلتىرمەيتىنمىن. ءبىراق ول تۋرالى ەشكىمگە ءتىس جارىپ، ايتقان ەمەسپىن. تەك ىشتەي سەنىمدى جۇرە بەرەتىنمىن. ادام جاقسىلىققا سەنە ءبىلۋى شارت. ءوزىڭىز بىلەسىز، ءۇمىتسىز شايتان...

ء-ۇش بالانىڭ اكەسى ەكەنسىز. جان جارىڭىزبەن قالاي تانىستىڭىز؟ ءسىزدىڭ اكەڭىز بۇل قۋانىشتى كورە الدى ما؟

-وكىنىشكە قاراي، اكەمە بۇل كۇندەردى كورۋ پەشەنەسىنە جازىلماپتى. ۋادە ەتكەندەي 2008 جىلى، ياعني وردالى وتىز جاسىمدا، ۇيلەندىم. ايەلىمنىڭ ەسىمى ادەپحان. ەكەۋمىز راديو ارقىلى تانىستىق. تانىسۋ جانە سەزىم جايلى سىر شەرتۋ باعدارلامالارى بولاتىن. سونى تىڭدايتىنمىن، بىردە اعام ەكەۋمىز اتالمىش باعدارلاماعا حات جازۋ ۇيعاردىق. سودان سوڭ كوپ بويجەتكەن حابارلاستى. 7-8-مەن كەزدەسىپ، ءبىر شىنىاياق شاي ءىشىپ، اڭگىمە-دۇكەن دە قۇردىق. ادەپحان ەكەۋمىزدىڭ اڭگىمەمىز بىردەن جاراسا كەتتى. بۇل 2000-شى جىلدار بولاتىن. الايدا سوسىن ول بەلگىلى ءبىر سەبەپتەرگە بايلانىستى اۋىل جاعىنا قايتۋدى ۇيعارادى. 5-6 جىلدان كەيىن ءنومىرىن ىزدەپ، تاۋىپ الدىم. قايتادان حابارلاسا باستادىم. ءسويتىپ ەكەۋمىز قايتادان تابىستىق. ادەپحانعا ءسوز سالعانىم ءالى ەسىمدە. جىگىتتىڭ ءبارى «ماعان كۇيەۋگە شىعاسىڭ با؟ مەن سەنى سۇيەمىن» دەپ جاتادى ادەتتە. مەن بولسام، «مەن سەنىمەن ءومىر سۇرە الامىن» دەدىم. ول باس يزەدى.

-ىڭعايسىز سۇراق قويعانىما كەشىرىم سۇرايمىن. ايەلىڭىزدىڭ مۇمكىندىگى شەكتەۋلى مە؟

-جوق، ونىڭ 12 مۇشەسى ساۋ.  ءۇي شارۋاسىمەن ۇيدە وتىرادى. اقشانى ەر ادام تابادى دەگەن ءپرينسيپتى ۇستاناتىن ازاماتپىن. «سەن بالالارعا ءباس-سوز بول، اقشانى ۋايىمداما» دەپ ايتقانمىن. بويىمدى السىزدىك بيلەپ، قينالعان ساتتە تە ادەپحان مەنى سان مارتە رەت كوتەرىپ، جۋىندىرىپ-شايىندىراتىن. وسى ءساتتى پايدالانا وتىرىپ، جان جارىما ماحابباتى مەن قامقورلىعى ءۇشىن، بالالارىم ءۇشىن العىس ايتقىم كەلەدى.

-باقىتتىڭ كىلتى سىقىرلاعان اقشا ەمەس دەپ جاتادى. دەگەنمەن كۇلىپ-ويناپ ءجۇرۋ ءۇشىن ءامياننىڭ بوس بولماعانى ابزال عوي. ءسىز قالاي كۇن كورەسىز؟ باسىڭىزدا باسپانا بار ما؟

-اكىمدىككە ارىز جازىپ، كەزەككە تۇرىپ، مەملەكەتتىڭ تەگىن ءۇيىن العانمىن. نەگىزى ءبىز سياقتى جارىمجان جاندار تەگىن باسپانالى بولا الادى. تەك تەتىگىن بىلسە بولدى. ءبىراق كەزەككە تۇرعاننان كەيىن ۇزاق ۋاقىت كۇتۋ كەرەكتىگى راس. ءتىپتى ونداعان جىل قاجەت بولۋى مۇمكىن. ءبىز تۇراتىن ۇيدە كىلەڭ ارباداعىلار تۇرادى. ءبىر ايتا كەتەرلىگى، بەس قاباتتى تۇرعىن ءۇي ارنايى ءبىز ءۇشىن تۇرعىزىلعان بولاتىن. 25 وتباسىنا ارنالعان. العاشقى كىرپىشىسىنەن باستاپ قۇرىلىستى باقىلاپ ءجۇردىم. بولمەلەرى كەڭ، ەسىكتەرى داڭعاراداي. مۇگەدەك ارباسىمەن قينالماي كىرەسىڭ، بولمەدەن بولمەگە ءوتىپ جۇرە بەرەسىڭ. ءوز باسىم باسپاناسىز جۇرگەن 30 شاقتى مۇمكىندىگى شەكتەۋلى جاننىڭ ءۇيلى بولۋىنا سەپتىگىم ءتيدى. مۇنىڭ بارلىعى ءبىلىمنىڭ ارقاسى. ەكى جوعارى ءبىلىمىم بار. فيلولوگپىن، سونىمەن قاتار زاڭگەرمىن. پوليسەي قىزمەتكەرى، انىعىن ايتقاندا، تەرگەۋشى بولعىم كەلەتىن. الايدا الماي قويدى. ونىمەن قوسا جۋرناليست بولۋدى ارماندايتىنمىن. ماقالالارىم رەسپۋبليكالىق باسىلىمداردان جارىق كورگەن بولاتىن. «ماي شاممەن ىزدەسەڭ دە، قاتە تاپپايسىڭ. ءتىپتى سوزدەردىڭ رەتتىلىگىن اۋىستىرۋعا كەلمەيدى. ءبارى ءوز ورنىندا. ويى تياناقتى» دەپ ايتقانى ەسىمدە كوررەكتوردىڭ. الايدا جۋرناليست ءومىردى، قوعامدى وزگەرتە المايتىندىعىنا كوز جەتكىزدىم. سىزدەر ءبىر ادامنىڭ ءومىرىنىڭ وزگەرتەتىن شىعارسىزدار. ءبىراق تۇتاس جۇيەگە كەلگەندە قاۋقارسىزسىزدار. سوندىقتان دا قوسىمشا زاڭگەرلىك ءبىلىم الۋدى ءجون دەپ شەشتىم. ەشقاشان جاقىندارىما ماسىل بولىپ، جۇمىسسىز وتىرعان ەمەسپىن. كۇن سايىن تىرلىك جاساماسام، ازاماتتىعىما سىن. اردي-دەن كەتكەننەن كەيىن «نلپ» دەگەن ۇيىم اشتىم. قازاقشاعا اۋدارساق، «ەركىندىك – ەڭ جاقسى سىيلىق» دەگەن ماعىنا بەرەدى.

-ەگەمەن ەلدە تۇراسىز. ەركىن ويلى ازاماتسىز. ەركىندىكتى اڭساۋىڭىزعا نە سەبەپ؟

-كەڭەس ۋاقىتىن ءوز باسىم ساعىنىشپەن ەسكە الامىن. مەديسينا، ءبىلىم ءبارى تەگىن بولدى. جانە ولاردىڭ ءبارى شىن مانىندە ساپالى ەدى. ءقازىر ءبارى شارتتى تۇردە تەگىن. جانىڭ قينالعاندا جەكە مەنشىك اۋرۋحاناعا قاراي قالاي جۇگىرگەنىڭدى ءوزىڭ بايقاماي قالاسىڭ. ءبىراق كەڭەستىك زاماننىڭ ءبىر كەمشىن تۇسى بولدى، ول – مۇمكىندىگى شەكتەۋلى جانداردى كوزدەن تاسا ۇستاۋ ماسەلەسى. ولار تۋرالى ەشكىم ءسوز قوزعامايتىن. دالاعا شىقساڭ دا، اربادا وتىرعان ازاماتتاردى كەزىكتىرمەيسىڭ. سەبەبى بارلىعى ۇيىندە قامالىپ، قۇسا بولىپ وتىراتىن. ەگەمەندىك العانىنا 27 جىل بولعان قازاقستان، قۇدايعا شۇكىر، ءبىز سياقتىلاردان قىسىلمايدى. دەي تۇرعانمەن، قولايلى جاعداي جاساۋعا اسىعار ەمەس. قالانىڭ ورتاسىندا جالعىز قاتىناپ جۇرگەن مۇگەدەكتى كورىپ پە ەدىڭىز، ارينە، مەنەن باسقا؟ وندايلار جوق. سەبەبى باسپالداق كوپ، پاندۋستار از، جولدان ءوتۋ رەتى ىڭعايسىز، اسفالت جولدىڭ ءوزى مىڭ تەسىك. اكەم كوزى تىرىسىندە «الماتى – باسپالداقتار قالاسى» دەپ ايتىپ وتىرۋشى ەدى. مىنە، سول پروبلەمانىڭ شەشىلمەي كەلە جاتقانىنا 27 جىل بولدى. ءبىز سياقتىلار، ەڭ بىرىنشىدەن، ءوز قارا باستارىن وزدەرى الىپ ءجۇرۋدى ارماندايدى. قايدا قاشان باراتىنىڭىزدى ءوزىڭ شەشۋ – ءبىز اڭسايتىن ەركىندىك.

-«نلپ»-نىڭ اردي-دەن ايىرماشىلىعى قانداي؟  

-اردي ادامنىڭ فيزيكالىق جاي-كۇيىنە قاتتى ءمان بەرەدى. ءبىز بولساق، ەموسيونالدىق كوڭىل-كۇيگە اكسەنت جاسايمىز. بەلسەندىلىكتى ارتتىراتىن، كوڭىلدىڭ حوشىن كوتەرىپ، كۇلكىگە قارىق قىلاتىن، ەستەن كەتپەس دەمالىس كەشتەرىن، كەزدەسۋلەردى ۇيىمداستىرۋدى ماقسات تۇتامىز. مىسالى، قىركۇيەكتىڭ ون ءبىرى كۇنىندە اربادا وتىراتىن 20 ازاماتتىڭ اراسىندا كاراوكە-بايقاۋ ۇيىمداستىرماقشىمىز. جۇرگىزۋشىمىز دە بار. مۇرات وسپانوۆ. ەسترادا جۇلدىزى ايجان نۇرماعامبەتوۆا ءادىل-قازىلاردىڭ بىرەۋى. بۇل ءىش پىستىرارلىق شارا بولمايدى. جاس شەكتەۋى دە بار. تەك 21 جاستان اسقاندار عانا باعىن سىناي الادى. ىشىمدىكتى دە رۇقسات ەتتىك. شاراپتان ازداپ اۋىز تيگەندە تۇرعان دانەڭە جوق. ەندىگى ماقسات – جەڭىمپازدارعا تارتۋ ەتىلەتىن سىيلىقتارعا سپونسور تابۋ. بايقاۋ بولعاندىقتان جەڭىمپاز بولۋى ءتيىس، ال جەڭىمپاز ماراپاتسىز قالسا، قىزىق بولمايتىن سياقتى. «قامشىنى» وقىپ وتىرعان ازاماتتاردىڭ اراسىندا «سىيلىق اپەرەيىن» دەگەندەر تابىلسا، توبەمىز كوككە جەتەر ەدى. كاراوكە-كلۋب «Empire» بولسا، ءوز قىزمەتىن تەگىن ۇسىندى.

-وسىنىڭ ءبارى زاڭگەرلىكتىڭ ارقاسى ما؟

-ارينە، جوق. مىنەز كەرەك الدىمەن. مەنىڭ اياق-قولىم ىستەمەسە دە، باسىم ىستەيدى. سوندىقتان بارلىق كۇش-جىگەرىمدى ساپالى ءبىلىم الۋعا جۇمسادىم. ءوز قۇقىعىن قورعاي الاتىن ازامات وزگەنىڭ ادىلەتسىزدىككە ۇشىراۋىنا جول بەرمەيدى. مەنىڭ ومىردەگى ەڭ جەك كورەتىن دۇنيەم – ادىلەتسىزدىك. ءبىراق مەن قۇر ايعايعا باسپايمىن، ادىلەت جەڭىس تۇعىرىنان كورىنۋى ءۇشىن ناقتى ىس-ارەكەتكە بارامىن. مۇمكىندىگى شەكتەۋلى جانداردىڭ ماسەلەسىمەن دەنساۋلىق ساقتاۋ، قارجى مينيسترلىكتەرىنە قانشاما حات جازدىم. قانشاما كەلىسسوز ۇيىمداستىردىم. الدا ءالى تىندىرار شارۋا كوپ...

-ايتپاقشى، جاقىندا عانا استانادا بيلىك باسشىلارىنا ارنالعان مەرەكەلىك ءىس-شارا وتكەن بولاتىن. ايدا كولپاكوۆا ەسىمدى انا ءوزىنىڭ فەيسبۋك پاراقشاسىندا ارباعا تاڭىلعان قىزىنىڭ سول كونسەرتكە ونەر كورسەتۋ ءۇشىن شاقىرىلعانىن، الايدا سوڭىندا ساحنادان شەتتەتىلگەندىگى تۋرالى جازبا جاريالاعان بولاتىن. ونى ءوزىڭىز دە جالپاق جۇرت ءبىلسىن دەگەن ويمەن بولىسكەنىڭىزدى بايقادىم. بۇل سيتۋاسيا توڭىرەگىندە نە دەيسىز؟

ء-بىر-اق نارسە ايتايىن. بۇل  يديوتيزم. وندايلاردى بيلىكتەن قۋۋ كەرەك.

-ال وزىڭىزگە كومەك كەرەك بولعان كەزدەر بولدى ما؟ «قالادا جالعىز ءوزى اربامەن جۇرەتىن مەن» دەدىڭىز ءبىر سوزىڭىزدە.

-باسىمنان نەشە ءتۇرلى جاعداي ءوتتى. ءۇش رەت اۆتوبۋس قاعىپ كەتە جازدادى. بىرەۋى ءتىپتى جاي عانا اۋىز جىبىرلاتىپ، كەشىرىم دە سۇرامادى. «امانسىز با؟ جاراقاتتانىپ قالمادىڭىز با؟» دەپ جاعدايىم دا بىلمەدى. قىسقاسى، مەنى مىسىق قۇرلى كورمەگەن. مىسىق نەمەسە ءيتتى باسىپ كەتە جازداساڭ، ۋايىمداپ، ءابىرجيسىڭ عوي. قاتىگەزدىگىنە ىزالانعان مەن ءنومىرىن جازىپ الىپ، شاعىمداندىم. سوتتا ءبىراق كورىستىك. «4 بالاسى بار ەركەكتى جەپ وتىرعان نانىنان قالايشا ايىراسىڭ؟» دەپ اقىل ايتقان قاسىنداعىلارى. «بالاسى بار، وسىنداي ارەكەتكە بارماس بۇرىن قالايشا ويلانبايدى؟» دەدىم. جاۋاپ جوق. جالپى، سوڭعى كەزدە قوعامنان قاتىگەزدىك پەن تاس باۋىرلىقتى كوپ كورەمىن. مەنىڭ اربادا وتىرعانىمدى كورىپ تۇرىپ، باسىنعىسى، مازاق قىلعىسى كەلەتىندەر بارشىلىق. دجيپ مىنگەن بىرەۋ "تەمىر تۇلپارىمدى سىرىپ كەتە جازدادىڭ" دەپ الەك سالماسى بار ما!؟ قانىم باسىما شاپتى. كۇرتەشەمنىڭ ىشكى قالتاسىنان تاپانشانى نۇسقادىم. «ايتار اڭگىمەڭ بولسا، ايت، دايىنمىن» دەپ قىرسىقتاندىم. «شاتاسىپپىن، باۋىرىم»،-دەپ ءوز جونىنە كەتە قالدى. جالپى، ومىرىمدە 8 ءتۇرلى تاپانشا ۇستاعان اداممىن. ال پىشاققا كەلەتىن بولساق، ول ۇنەمى وزىممەن بىرگە.

-سۋىق قارۋ ۇستاۋدان قورىقپايسىز با؟ ادامزاتقا «مەيىرىمدى بولايىق، زامانداستار» دەپ ۇندەۋ تاستاپ جۇرگەن ازاماتسىز. مۇنى قالاي تۇسىنۋگە بولادى؟

-جاس بولدىق، مىقتى بولىپ كورىنگىمىز كەلدى. اۋدان-اۋدانعا ءبولىنىپ، توبەلەسەتىن ەدىك. مەن دە قالىسپايتىن ەدىم. بۇگىندە تاپانشامەن دوس ەمەسپىن. تاپانشا ۇستاعان كەزدىڭ وزىندە ەشكىمگە زيانىم تيگەن ەمەس. پىشاق تاقىرىبىنا كەلەتىن بولساق، ونسىز مەنىڭ كۇنىم شىنىمەن دە قاراڭ. بۇل اشۋ-ىزادان، جۇيكەنىڭ جۇقارۋىنان پايدا بولعان جوق. بايقاعانىڭىزداي، اياعىم ارباعا باۋمەن. بايلانعان كەيدە قىسىلىپ، تارتىلىپ قالادى. سول كەزدە پىشاقتىڭ كومەگىمەن بوساتامىن. كۇنى بويى دالادا جۇرەتىن اداممىن. قارنىم اشسا، شۇجىق ساتىپ الامىن. ونى دا پىشاقپەن تۋراپ، جەپ الامىن. قىسقاسى، كەز كەلگەن توتەنشە جاعدايعا دايىن بولىپ ءجۇرۋدى ادەتكە اينالدىردىم. بىرەۋگە قيانات جاساۋدان قۇداي ساقتاسىن. «ادامنىڭ كۇنى –اداممەن» عوي. جانىما تەك جاقسى ادامداردى جيناپ ءجۇرۋ كەرەكتىگىن ۇققانىما ءبىرتالاي زامان بولدى.  

-مەن ءسىزدى سۇحباتقا شاقىرعاندا بىردەن كەلىسە كەتتىڭىز. ءتىپتى ءوزىڭىز بىرنەشە رەت قوڭىراۋ شالدىڭىز. كەزدەسۋگە، سويلەسۋگە اسىقتىڭىز. بۇل ءسىزدىڭ وقىرمانعا، قاۋىمعا ايتارىڭىز بار ەكەندىگىن بىلدىرەدى. ىشىڭىزگە سىيماي جۇرگەن دۇنيەلەرمەن ءبولىسىڭىزشى.

ء-ومىر ماعان وڭاي تيگەن جوق. ءبىراق مەن اتا-انامنىڭ قولداۋىنىڭ ارقاسىندا كۇرەسكەر بولىپ ءوتۋدى دۇرىس دەپ سانادىم. مويىنۇسىنۋ، جەڭىلۋ، وكىنۋ دەگەننەن اۋلاقپىن. وزگەرىستەن، جاڭالىقتان قورىقپايمىن. اشىق بولۋدان قايمىقپايمىن. كوشەدە كەلە جاتقان بەيتانىس اداممەن تەز ءتىل تابىسا كەتەمىن. قوعام ءۇشىن اشىقپىن. ءوزىم سياقتى ارباعا تاڭىلعان دوستارىم دا اشىق-جارقىن بولۋدان قىسىلماسا ەكەن دەيمىن. ءومىر دەگەن عاجاپ سەبەبى. ءاربىر ءساتتى قۋانىشپەن قارسى الا ءبىلۋ ماقسات. "قامشىنىڭ" كەڭ اۋديتورياسىن پايدالانا وتىرىپ، «نلپ» ۇيىمى ءوزىنىڭ كەڭسەسىن اشۋدى جوسپارلاپ جاتقانىن ايتقىم كەلەدى. سونىمەن قاتار وڭالتۋ ورتالىعىن اشۋ دا ويدا بار.  وسىنىڭ بارلىعىنا كومەك كورسەتەمىن دەگەن يگى جاقسىلار تابىلسا، كومەك قولىنان باس تارتپايمىز. قايىرىمدىلىققا جۇمسايتىن اقشاڭىزدى مەشىتتەرگە ەمەس، ءبىز سياقتىلارعا بەرسەڭىزدەر. ءسىز اقشا بەرمەسەڭىز دە، مولدا كۇن كورەدى. مەشىت كومەكتەسپەيدى ەمەس، كومەكتەسەدى. ءبىراق بارىنە ەمەس.

-موتيۆاسيا ىزدەپ جۇرگەن ادامعا تاپتىرماس قازىنا ەكەنسىز. جاستار الدىندا ءسوز سويلەۋگە، جالپى سەمينار، ترەنينگ وتكىزۋگە، TEDx كونفەرەنسيالارىنا شاقىرتۋ الىپ پا ەدىڭىز؟

-جوق. ەگەر شاقىرىپ جاتسا، اركەز دايىنمىن. مۇمكىندىگى شەكتەۋلى ادامدارعا ءبىزدىڭ قوعام ۇركە قارايدى. ولاردىڭ ويناپ-كۇلگەنىن، قىدىرعانىن، بيلەگەنىن، سپورتقا دەن قويعانىن، كينوتەاترعا بارعانىن قابىلداي المايدى. فيزيكالىق جاي-كۇيىنە قاراماستان ءار ادام تولىققاندى ءومىر سۇرۋىنە قۇقىلى ەكەندىگىن ءبىز استە ەستەن شىعارامىز. وسى ءبىر دۇنيەلەردى مەن ەسكە سالعىم كەلەدى.

«سەنىڭ جولىڭ بولارىنا سەنەمىن، ءۇمىت تە سەنەن جىراق كەتپەيدى.
جالعىزدىقتى تا وڭاي جەڭەسىڭ، ماحاببات وتى جۇرەگىڭدى شارپيدى.
ءومىر بويى تىك ۇستايسىڭ ەڭسەڭدى، اداسپاي تاۋىپ ءومىر-دارا جولىڭدى.
جاۋىن، جەل، كۇنگە قاراماستان سەنىمدى، بىرگە بولارمىز، سۇرەرمىز عۇمىر تولىمدى»

(ەرنار سارسەيەۆ، «ىنتىزارلىققا تولى ولەڭ جولدارى» ولەڭدەر جيناعىنان، ورىسشادان قازاقشاعا اۋدارعان جازيرا بايدالى)