بۇگىن قازاقستان پرەزيدەنتتىگىنە كانديدات نۇرسۇلتان ءابىش ۇلى نازاربايەۆتىڭ رەسپۋبليكالىق قوعامدىق شتابى مۇشەلەرى ايماقتار بويىنشا ناسيحات جۇرگىزۋ ءۇشىن جولعا شىقتى. وسى ورايدا ناسيحات توبىنىڭ ەڭ الدىمەن قاراعاندى وبلىسىنا ات باسىن بۇرۋى بەكەر ەمەس. سەبەبى ۇلت كوشباسشىسىنىڭ ەڭبەك جولى ءدال وسى جەردەن باستاۋ العان بولاتىن.

دەلەگاسيا قۇرامىندا – رەسپۋبليكالىق قوعامدىق شتاب جەتەكشىسى مۇحتار قۇل-مۇحاممەد، قازاقستان پارتيوتتارى پارتياسىنىڭ ءتوراعاسى عاني قاسىموۆ، «اق جول» دەموكراتيالىق پارتياسىنىڭ ءتوراعاسى ازات پەرۋاشيەۆ، «بىرلىك» پارتياسىنىڭ ءتوراعاسى سەرىك سۇلتانعالي، «اتامەكەن» ۇكپ باسقارما ءتوراعاسى ابىلاي مىرزاحمەتوۆ، قحا ءتوراعاسىنىڭ ورىنباسارى اناتوليي باشماكوۆ، قوعام قايراتكەرى ورالباي ابدىكارىم، ءماجىلىس دەپۋتاتتارى مايرا ايسينا، اسقار بازاربايەۆ، مۇحتار تىنىكەيەۆ جانە سەرىكجان قانايەۆ، سەنات دەپۋتاتى مۇحتار التىنبايەۆ، قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ، وليمپيادا چەمپيونى سەرىك ساپييەۆ جانە باسقا دا تانىمال قازاقستاندىقتار بار.

ەلىمىزدىڭ ءوندىرىس ورتالىعىندا ايماق اكتيۆتەرىمەن، ستۋدەنت جاستارمەن، كاسىپكەرلەرمەن، «ارسەلور ميتتال تەميرتاۋ» اق شاحتەرلەرىمەن جانە ەتنومادەني بىرلەستىكتەردىڭ وكىلدەرىمەن ءبىرقاتار كەزدەسۋلەر ءوتتى.

قاراعاندىلىقتار ۇدەمەلى يندۋستريالىق-يننوۆاسيالىق دامۋ باعدارلاماسى ءۇشىن نۇرسۇلتان ءابىش ۇلى نازاربايەۆقا العىس ءبىلدىردى. وسى باعدارلاما اياسىندا سوڭعى 5 جىلدا وبلىستا 59 كاسىپورىن ىسكە قوسىلىپ، 5000 جاڭا جۇمىس ورنى اشىلدى.

ايماقتىڭ قوعام قايراتكەرى تاتيانا ساۆيسكايا قازاقستاندىق ايەلدەر قاۋىمى اتىنان ەلىمىزدە ورناعان بەيبىتشىلىك، تۇراقتىلىق پەن تىنىشتىق ءۇشىن نۇرسۇلتان ءابىش ۇلى نازاربايەۆقا شەكسىز ريزاشىلىعىن جەتكىزدى.

رەسپۋبليكالىق قوعامدىق شتاب جەتەكشىسى اتاپ وتكەندەي، ۇلت كوشباسشىسى نۇرسۇلتان ءابىش ۇلى نازاربايەۆتىڭ ساياساتىنىڭ ارقاسىندا قازاقستان ەلىمىزدى دامۋدىڭ جاڭا دەڭگەيىنە كوتەرەتىن ۇلى وزگەرىستەرگە قاراي قادام باسقالى تۇر.

كەزدەسۋلەرگە مىڭداعان قاراعاندىلىق قاتىستى. ءوز سوزدەرىندە ولار مەملەكەت باسشىسى نۇرسۇلتان ءابىش ۇلى نازاربايەۆتىڭ ساياساتىنىڭ ارقاسىندا قازاقستان زور جەتىستىكتەرگە قول جەتكىزگەنىن اتاپ ءوتتى.

حالىق مەملەكەتىمىزدى مىقتى كوشباسشى باسقارعانىن قالايدى. سول سەبەپتى ورتالىق قازاقستاننىڭ تۇرعىندارى ءبىراۋىزدان 2015 جىلى 26 ساۋىردە رەسپۋبليكامىزدىڭ گۇلدەنۋى ءۇشىن، ياعني، نۇرسۇلتان ءابىش ۇلى نازاربايەۆ ءۇشىن داۋىس بەرەتىندەرىن ءمالىم ەتتى.