جۋىردا بەلگىلى جۇلدىزشى نازاربەك قوجامسەيىتوۆ ءوزىنىڭ اۋا رايىنا قاتىستى ءبىرشاما بولجامدارىمەن ءبولىستى. ول اۋا رايىنان بولەك  ساياسي بولجامدارىن دا جاسىرىپ قالماعان.

“مەنىڭ بولجامدارىم ءارقاشان تۋرا كەلەدى. جالعىز اۋا رايىنىڭ بولجامدارى ەمەس، مەن ساياسي بولجامداردى دا تۋرا ايتا الامىن. ماعان كەيبىر تانىس ساياساتكەرلەر الداعى پرەزيدەنتتىك سايلاۋدىڭ قالاي وتەتىنىن ەسەپتەپ قوي دەپ تاپسىرما بەردى. ونى دا ەسەپتەپ قويدىم”، – دەيدى جۇلدىزشى.

قوجامسەيىتوۆ ءساۋىر ايىندا ەل ايماقتارىنىڭ سالقىندايتىنىن بولجاعان.

“سولتۇستىك وبلىستاردا ءساۋىردىڭ 10-دا سۋىق سيكلون كەلەدى. 18-20 ساۋىردە قارا داۋىل سوعىپ، قارا سۋىق بولادى. 2 مامىر كەزىندە دە اۋا رايى بۇزىلىپ، ارتى قار ارالاس جاڭبىرعا اينالادى. كۇن كۇرت سۋىتادى”، – دەدى ول.

سونىمەن قاتار، جۇلدىزشى اۋا رايىنىڭ كۇرت سۋىتىپ نەمەسە كۇر جىلىپ، حالىقتى ابدەن مەزى قىلۋىنىڭ سەبەبىن ايتتى.

زىمىران ۇشسا بولدى – اۋا رايى كۇرت بۇزىلادى. قىستا كۇرت جىلىمىق، جازدا كۇرت سۋىق اكەلىپ، ىلعالدى شامادان تىس جاۋدىرادى.

“ونىڭ باستى سەبەبى، رەسەيدىڭ بايقوڭىر عارىش ايلاعىنان ۇشىرىپ جاتقان زىمىراندارىندا. زىمىران ۇشسا بولدى – اۋا رايى كۇرت بۇزىلادى. جانە ول قىستا كۇرت جىلىمىق، جازدا كۇرت سۋىق اكەلىپ، ىلعالدى شامادان تىس جاۋدىرادى. ماسەلەن، بىلتىر 17 ناۋرىزدا “پروتون” ۇشىرىلعان سوڭ پاۆلودار قالاسىندا ەكى كۇن 30 گرادۋس، ەكى كۇن 28-29 گرادۋس ىستىق بولدى. بۇل ۋاقىتتا ەلىمىزدىڭ سولتۇستىك-شىعىسىنداعى وسىناۋ قالادا مۇنداي ىستىق ەشقاشان بولماۋى كەرەك ەدى. سونىڭ كەسىرىنەن قار كۇرت ەرىپ، كوپتەگەن شارۋاشىلىقتار مەن نىساندار سۋدىڭ استىندا قالدى”، – دەيدى نازاربەك قوجامسەيىتوۆ.

ول جۋىرداعى تابيعات اۋىتقۋشىلىقتارى  19 ناۋرىزدا ۇشىرىلعان “پروتوننىڭ” كەسىرىنەن دەپ ەسەپتەيدى.

“الماتىدا قىستىڭ اياعىندا وسىنداي كولەمدە قار جاۋار ما ەدى؟ “قازگيدرومەت” مۇندايدىڭ سەبەبىن عىلىمي دالەلى بولماعان سوڭ ايتا المايدى. ال مەن ونى ۇنەمى ايتىپ كەلە جاتىرمىن. تابيعات ءوز تىنىشتىعىنىڭ، ءوزىنىڭ ەكولوگيالىق تەڭگەرىمىنىڭ بۇزىلعانىن ۇناتپاي، وعان ءوزىنىڭ قاتال جاۋابىن بەرەدى. سوندىقتان، زىمىرانداردى تەك بەلگىلى ۋاقىتتاردا عانا ۇشىرۋعا كەلىسىم بەرۋ كەرەك. سونىڭ ىشىندە كوكتەم مەن كۇزدەگى جيىن-تەرىن ناۋقانى اياقتالعانشا ولاردى جىبەرمەي قويا تۇرۋ كەرەك، وعان موراتوريي جاريالاۋ كەرەك دەپ 2009 جىلدان بەرى ايتىپ كەلە جاتىرمىن. وعان ەشكىم جاۋاپ تا بەرمەيدى، قۇلاقتارىنا دا ىلمەيدى”، – دەپ نازىن ءبىلدىردى جۇلدىزشى.

قوجامسەيىتوۆ تابيعات اپاتتارىنىڭ تۇبىندە ادام قولىمەن ىستەلگەن تەحنوگەندىك زالالدار جاتقانىن ايتتى.

الماتىدا قىستىڭ اياعىندا وسىنداي كولەمدە قار جاۋار ما ەدى؟ “قازگيدرومەت” مۇندايدىڭ سەبەبىن عىلىمي دالەلى بولماعان سوڭ ايتا المايدى.

“امەريكالىقتار ەكونوميكاسى مەن اسكەري قۋاتى جاعىنان رەسەيدەن الدەنەشە ەسە قۋاتتى مەملەكەت بولا تۇرا وزدەرىنىڭ جەرسەرىكتەرىن وربيتاعا رەسەيدىڭ “پروتون” زىمىرانتاسىعىشتارىمەن ميللياردتاعان دوللار تولەپ ۇشىرىپ جاتقانىنا نەگە نازار اۋدارمايمىز؟ زياندى بولماسا ولار وزدەرىندە-اق ۇشىرار ەدى عوي. مەنى ەشكىم دە تىڭدامايدى. 2009 جىلدان بەرى ايتىپ كەلە جاتىرمىن دەدىم عوي… ال عىلىمي ورىندار ونى دالەلدەۋگە نە شاماسى جەتپەيدى نەمەسە مۇندايدى ايتپاڭدار دەپ بىرەۋلەر قورقىتىپ تاستاعان. سوندىقتان اۋىزدارىن اشپايدى”، – دەپ اياقتادى اڭگىمەسىن تانىمال جۇلدىزشى.