ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ "كوشى-قون، ەڭبەك جانە الەۋمەتتىك قورعاۋ" كوميتەتىنىڭ ءتوراعاسى اقمادي سارباسوۆ شەتتە جۇرگەن ەتنيكالىق قازاقتارعا  قازاقستان ازاماتتىعى مەن ورالمان كۋالىگىن الۋدا ءبىرقاتار جەڭىلدىكتەر قاراستىرىلادى دەپ مالىمدەدى. بۇل تۋرالى "قامشى" پورتالى حابارلايدى.

"قازىرگى تاڭدا ەلىمىزدە شەتتە جۇرگەن قانداس باۋىرلارىمىزدى، ەتنيكالىق قازاقتاردى وزدەرىنىڭ اتامەكەندەرىنە، ياعني، قازاقستانعا اكەلۋ ءۇشىن، ولارعا ءبىرىنشى، جاعداي جاساپ، ءتۇرلى الەۋمەتتىك جەڭىلدىكتەر كورسەتەتىن زاڭ جوباسى ازىرلەنۋدە. اتالمىش زاڭ جوباسىندا شەت ەلدەردەن كوشىپ كەلەتىن ەتنيكالىق قازاقتارعا ورالمان كۋالىگىن الۋدى جەڭىلدەتۋ، ورالمان كۋالىگىن العاننان سوڭ، ءبىر جىلدىڭ ىشىندە قازاقستان ازاماتتىعىن بەرۋ، (قاي وبلىس نەمەسە ايماققا قونىس اۋدارسا - سول جەردەن قۇجاتتارىن ازىرلەپ بەرۋ)، سونداي-اق، كوشىپ كەلىپ قونىستانعان جەرىندە ءتۇرلى الەۋمەتتىك جەڭىلدىكتەردى، كوممۋنالدىق شىعىندار، كولىك شىعىنى، باسپانامەن قامتاماسىز ەتۋ، مەكتەپ جاسىنداعى بالالارعا قولايلى مەكتەپتەرگە ورنالاستىرۋ جانە ت.ب. سەكىلدى ءبىرقاتار جەڭىلدىكتەر قاراستىرىلعان"،-دەدى سارباسوۆ.

ق ر ءدسادم وكىلىنىڭ ايتىۋىنشا، اتالمىش زاڭ جوباسى ءقازىر ق ر پارلامەنتىنىڭ قارالۋىنا جىبەرىلگەن.

ال ق ر كونستيتۋسياسىنىڭ  "ق ر ازاماتتىعى" تۋرالى بابىندا قازاقستان ازاماتتىعىن شەت ەلدەردەن كەلىپ، ق ر تەرريتورياسىندا كەمىندە جىل تۇرعان ەتنيكالىق قازاقتار الا الادى دەلىنگەن. سونداي-اق، اتالمىش كۋالىكتى الۋ ءۇشىن ق ر ازاماتىمەن شاڭىراق كوتەرىپ، كەمىندە 3 جىل ق ر تەرريتورياسىندا تۇرۋى شارت.

"دەي تۇرعانمەن، ق ر ازاماتتىعىن الۋ تۋرالى جاڭا ازىرلەنگەن زاڭ جوباسىندا شەتتەن كەلگەن قانداستارىمىزعا ورالمان كۋالىگى جانە قازاقستان ازاماتتىعىن الۋدا جەڭىلدىكتەر جاسالادى دەپ كورسەتىلگەن. سونىمەن قاتار، پارلامەنتكە قارالۋعا جىبەرىلگەن ماتەريال قارالۋعا جىبەرىلگەن مەرزىمنەن 3 ايدان ارتىق جاتۋعا بولمايدى"، دەيدى سارباسوۆ مىرزا.