ەگىن جيناۋعا قاناتتى ءسوزدىڭ قانداي قاتىسى بار دەۋىڭىز بەك مۇمكىن. ەلىندەگى اشتىق پەن ازىق-تۇلىك تاپشىلىعىن جۇرتشىلىقتان جاسىرۋعا نيەت ەتتى مە ەكەن، تۇرىكمەنستان پرەزيدەنتى گۋربانگۋلى بەردىمۇحامەدوۆ تاعى ءبىر قادامعا باردى. پرەزيدەنت ەلدىڭ اتقارۋشى بيلىگىمەن كەزدەسۋ كەزىندە اۋىل شارۋاشىلىعىن رەفورمالاۋعا قاتىستى جيىن وتكىزە كەلىپ، جەرگە قاتىستى قاناتتى سوزدەردى جيناۋدى تاپسىردى. ەندى تۇرىكمەندىك ماماندار استىقپەن قاتار ماقال-ماتەل دە جينايتىن بولادى.

–بيداي مەن ماقتا جيناۋ وڭاي ەمەس. ءبىراق ونىڭ بارلىعىن ءبىز اتا-بابامىزدان كەلە جاتقان تاريحي داستۇرگە سۇيەنە وتىرىپ جاساۋىمىز كەرەك. ءار جەردىڭ ءوز قۇنارى، ءوز ەرەكشەلىگى بار. مۇنى اتادان قالعان بابالار سوزىمەن ۇيلەستىرمەسە بولمايدى. سوندىقتان ارنايى سوزدىك جاساعان دۇرىس. مۇنى تۇرىكمەنستان اۋىل شارۋاشىلىعى ۋنيۆەرسيتەتىنىڭ ماماندارى جۇزەگە اسىرعانى ءجون، –دەپ تاپسىرما بەردى پرەزيدەنت گۋربانگۋلى بەردىمۇحامەدوۆ.

ءدال ءقازىر رەسمي دەرەك بويىنشا تۇرىكمەنستاندا ازىق-تۇلىك تاپشىلىعى بايقالادى. ءبىراق بۇل ماسەلە بيلىك تاراپىنان اشىق ايتىلىپ وتىرعان جوق. كەيبىر دەرەكتەرگە قاراعاندا، ۇن، قانت، وسىمدىك مايى 30 پايىزعا ازايعان. ءتىپتى سىرتتان ءسۇت ونىمدەرى اكەلۋ - 60 پايىزعا، شۇجىق ونىمدەرى 40 پايىزعا تومەندەگەن.

ءبىراق پرەزيدەنتتىڭ ءوزى اش ەمەس. جاڭا جىلدا اشحابادتا ورتالىق ازياداعى ەڭ ۇلكەن شىرشا ورناتىلدى. ول نەمەرەسىمەن بىرگە اعىلشىن، نەمىس جانە تۇرىكمەن تىلىندە ءان ايتىپ، ەل حالقىن قۇتتىقتادى. ءبىراق...

جاڭا جىل تۇرىكمەندەرگە اۋىرلىعىن الا كەلدى. 1 قاڭتاردان باستاپ تۇرعىندار ءوز اقشاسىنا ەلەكتر قۋاتى، سۋ مەن گازعا ەسەپتەگىش قۇرالدارىن ورناتۋعا تاپسىرما الدى. ەگەر ەسەپتەگىش قۇرالىن ورناتپاسا، تۇرعىندار وعان قاتىستى ەشقاندار قاجەتتى قۇجاتتاردى الا المايدى جانە سۋسىز، جارىقسىز، گازسىز قالادى. سونىمەن قاتار، ايىپپۇل تولەيدى. ءسويتىپ 1992 جىلدان بەرى جاسالىنىپ كەلگەن «تۇرىكمەن جۇماعىنىڭ» كۇنى ءبىتتى. ءقازىر حالىقتا اقشا جوق، ازىق-تۇلىك تاپشى، جاعداي قيىن. ءبىراق تۇرىكمەنستان پرەزيدەنتى ءان ايتىپ ءجۇر. ول ەلدەگى بۇكىل قارا كولىكتى اققا بوياتتى. قالاداعى بۇكىل عيماراتتار اق تۇسكە وزگەرىپ جاتىر. بيلىكتىڭ قاتاڭ تاپسىرماسىنا سايكەس، حالىقتىڭ مەشىتكە بارۋىنا تىيىم سالىنعان، ءدىن تاقىرىندا اڭگىمە ايتۋعا بولمايدى. جۇمىس ورنىندا ناماز وقۋ دۇرىس ەمەس. ەگەر ونى بيلىكتەگىلەر ءبىلىپ قويسا، وندا جۇمىستان ايرىلادى. جالپى تۇرىكمەنستاندا جاعداي قيىن، سوڭعى تاپسىرمانىڭ ءوزى كۇلكىلى، تۇرىكمەندەر استىقپەن قاتار قاناتتى ءسوز جينايتىن بولدى. بۇل دا تۇسىنىكتى شىعار، ويتكەنى ەرتەڭ تۇرىكمەن حالقىنىڭ ماقال-ماتەلدەرى ۇلى پرەزيدەنت «اركاداگ – ەل قامقورشىسى» بەردىمۇحامەدوۆتىڭ جيناعى بولىپ شىعا كەلەدى ەمەس پە؟!.