***
الماتى – قۇج-قۇج قايناعان قازان عوي! ناعىز «بۇرقىلداعان» تىرشىلىك! ءبىرى تۇبىنە ءتۇسىپ كۇيىپ، قايتا ورالىپ، ەندى ءبىرى ءپىسىپ، وزگەسى قازان تۇبىنە جابىسىپ، پىسىقتارى قۇيىلار سورپامەن بەتىنە قالقىپ شىعىپ جاتىر. قولىنان كەلگەنى قونىشىنان باسىپ، قولىنان كەلمەگەنى قونىش استىندا قالىپ، بولماسا، سول باسقان ءىزىن قايتا باسىپ دەگەندەي، ايتەۋىر تىرشىلىك، ولمەستىڭ قارا كۇنى. ادامدار، ۋا، ادامزات، ءبىر ءسات ءوتىنىش، كىدىرىڭدەرشى؟! ءبىر مەزەت توقتاڭدارشى؟! بيلىك تە، اقشا دا، قۇنسىز دۇنيە دە قۇرىسىن، اناۋ جەتىمنىڭ جانارىندا ءمولت-مولت جاستى قاراڭدارشى...
***
مەديسينالىق ورتالىقتامىن. كەزەك كۇتىپ تۇرمىن. ءبىر ادامنان سوڭ ەسىكتىڭ ارعى جاعىنداعى دارىگەردىڭ ءجۇزىن كورۋ باقىتىنا يە بولامىن، بۇيىرسا. الدىمداعى – قازاق جىگىت.. كىردى. قابىلداپ وتىرعان دا ەكى قازاق ايەل ەكەنىن ەسىك ساڭىلاۋىنان كوردىم. ءۇش قازاق. ءيا، ءدال تاپتىڭىز! ورىس تىلىندە «سايراپ» جاتىر. قازاقپىز. قانىڭ قايناي ما؟
***
اۆتوبۋس. بارلىعى دا شارشاپ تۇر. تۇرتسەڭ قۇلار. تاڭ ازانىمەن جۇمىسقا اسىققان اشۋشاڭ ادامنىڭ ءبىرى دە جوق. ءبارى مومىن، ءبارى سابىرلى. ءبارىمىزدىڭ دە كوزدەگەنىمىز – تەزىرەك ۇيگە جەتۋ. ءبىر ايالدامادان قوس ارۋ كىردى. قازاقتىڭ قويۋ قارا شاشتى، اپ-ادەمى قىزدارى. سۇلۋ-اق... ءبىرىن-بىرى ەندى كورگەن-اۋ شاماسى، اڭگىمەلەرى تاۋسىلار ەمەس. تاعى دا ءدال تاپتىڭىز، ەكەۋىن بايلانىستىرىپ تۇرعان ورىس ءتىلى. قازاقپىز-اق... ءتىلىمىز تۋراسىندا ءبىراز ايتارىمدى ايتىپ، بار بولسا، جۇزدەرىنە ۇياتىن شىعارايىن دەسەم، سويلەۋگە شاما جوق. كولىك ىشىندەگىلەردىڭ دە ءوز ايتارى تابىلار-اق ەدى، تەك، شارشاپ... ىشكى داۋىسىم ءبىر شىڭعىرىپ قويا بەردى. قازىرگى جاستار – ءبىلىپ تۋعان...
***
مەن وسەكشىمىن بە؟ «وسەك» تىڭدايمىن، دەمەك...ۇيات-اي. ءبىراق «ونى» ايتاتىندار «اڭگىمە» ايتىپ جاتىرمىن دەپ ايتادى عوي. دەمەك، وسەكشى ەمەس، اڭگىمەشىلمىز...
«اڭگىمەنىڭ» باستى كەيىپكەرىن ءوز كوزىڭمەن كورىپ، الگىندە ايتىلعان «اڭگىمە» يەسى راس سول ما، سول ەمەس پە، ايتىلعان «ماقتاۋلار» يەسىنە جاراسا ما، جوق پا، جۇزىنە قاراپ بىلگىڭ كەلىپ تۇرادى ەكەن. قۇددى، جۇزىندە جازىلىپ تۇرعانداي.
استە، جوتاڭا جابىسقان شوڭاينانى دەنەڭە باتسا عانا سەزەسىڭ، بىلەسىڭ.
بىرەۋدىڭ بىرەۋدى ىلىكتىرىپ الىپ، «ادەمى» «اڭگىمە» شىعارعانى دۇرىس پا ەكەن وسى؟! سول «اڭگىمەنى» تىڭداۋ بارىسىندا، ءوزىڭ دە كەزەكتى «ەرتەگىنىڭ» تۋۋىنا سەبەپشى بولعان «كەيىپكەر» ەكەنىڭدى سەزبەي قالاسىڭ...
ايتىلعان ءسوز اعىپ كەتكەن سۋ سياقتى، جاي سۋ ەمەس، قولجۋعىشتىڭ سۋىنداي. قانە، قولجۋعىشتىڭ استىنداعى شەلەكتەن بەس سەكۋند بۇرىنعى تازا سۋدى كورسەتشى؟!.
پىكىر قالدىرۋ