جان-جاقتى دامىعان، اقپاراتقا قانىق، باسەكەگە قابىلەتتى بۇل قوعام – ءار ءتۇرلى الەۋمەتتىك ماسەلەلەرگە تولى. الەۋمەت ءسوزىنىڭ تۇپكى ماعىناسىن – تۇگەل قاۋىم، تۇتاس جۇرتشىلىق، ياكي، حالىق دەپ قاراستىرۋعا دا بولادى. حالىقتىڭ كوڭىلى الدەكىمگە، نەمەسە الدەنەگە ەش ۋاقىتتا تولىق تولىپ، بارىنە بىردەي ريزا بولعان ەمەس. دەمەك، ءار نارسەنىڭ استارىندا ءبىر ماسەلە بار دەگەن ءسوز. قولجەتىمسىز باسپانا، تۇرمىس جاعدايىنىڭ تومەندىگى، جەتىم بالالار مەن جەسىر انالار، ماماندىعىڭ بويىنشا قىزمەتكە ورنالاسا الماۋ، بىلىمسىزدىك، قورشاعان ورتاداعى ادىلەتسىزدىك، قىلمىس، ت.س.س نارسەلەردى – قازىرگى الەۋمەتتىڭ كۇردەلى ماسەلەلەرى دەپ قاراستىرۋعا ابدەن بولادى.

«بۇگىنگى كۇن – ەرتەڭگى تاريح» دەگەن اتالى ءسوز بار. دەمەك، كەيىن ءبىزدىڭ بالالارىمىزدىڭ ۇرپاعى بابالارىنىڭ قانداي ۋاقىتتا نەندەي كۇن كەشكەنىن كورۋ ءۇشىن –  ناسيحات قۇرالى رەتىندە كينو ونەرىنىڭ اتقارار ءرولى وراسان. قازىرگى ۋاقىتتا كورەرمەنگە اقپارات ماتەريالدارى عالامتور جەلىسى ارقىلى وتە قولجەتىمدى. قالاعان دۇنيەڭدى ءبىر سمارتفوندى باسقارۋ ارقىلى باقىلاي الاسىڭ. وسىنداي مۇمكىندىكتەرى مول ۋاقىتتا كورەرمەن تالعامىن قالىپتاستىرۋ مەن جاس ۇرپاقتى تاربيەلەۋ ماقساتىندا وتاندىق كينوگەرەلەردىڭ شىعارمالارىن ساپالى كينوتۋىندىلار ارقىلى جەتكىزۋگە ارەكەت ەتۋ كەرەك. ماقساتتارى ءار ءتۇرلى مەملەكەتتىك جانە كوممەرسيالىق ارنالاردىڭ دا كوپتىگى بۇل جاعدايدا وڭىنان ىقپال ەتەرى ءسوزسىز. بۇل ورايدا ناسيحات قۇرالى رەتىندە كاسىبي مامانداردىڭ كوزقاراسىمەن ساراپتالىپ، جاقسى دەپ تانىلعان فيلمدەر اتالمىش ارنالاردان كوپتەپ كورسەتىلۋى ءتيىس. ال مۇنداي دۇنيەلەردى ءتۇسىرۋ ءۇشىن تىڭ يدەيامەن جازىلعان ساپالى سەناريي جانە مەملەكەت تاراپىنان دەمەۋ، كورەرمەننەن قولداۋ كەرەك. جاسىراتىنى جوق، سوڭعى ۋاقىتتا ءتۇسىرىلىپ جاتقان «پوپكورن» فيلمدەر تەك كومەديا جانرىندا. ماسەلەن، «گلامۋر دليا دۋر» (رەج.: ا.ۇزابايەۆ)، «كەلينكا سابينا» (ن.ادامباي)، «سۆادبا نا ترويح» (ا.بيسەمبين)، «ۆسە يز-زا مۋجيكoff» (ا.ۇزابايەۆ)، «بيزنەس پو-كازاحسكيي» (ن.قويانبايەۆ)، «برات يلي براك» (ە.نۇرعالييەۆ) ت.ب. مۇنداي ءسوز مادەنيەتىن ءتۇسىرىپ، ءتىل مارتەبەسىن تومەندەتەتىن فيلمدەردى كورۋ – كورەرمەندى ارزان كۇلكىگە، جەڭىل ويلاۋعا، تۇرپايى ازىلدەرگە ءبىر تابان جاقىنداۋعا عانا تاربيەلەيدى.

ەگەمەن ەل بولۋىمىزعا قاسىق قانى قالعانشا كۇرەسكەن قانشاما باتىرلارىمىز بار، كوسەم بيلەرىمىز بەن داڭقتى حاندارىمىز بار. ولاردىڭ ەسىمدەرىن تەك كوشە تاقتايشالارى مەن مەكتەپ ماڭدايشالارىنا ءىلىپ قويۋ ازدىق ەتەدى. سەناريستەر ۇلى تۇلعانىڭ تىم قۇرىعاندا بىرەۋىن تاڭداپ الىپ، زەرتتەپ، ىزدەنىپ، جازىپ، جەتكىزسە، باسشىلىق نەگە قولداماسقا؟

«بولاشاققا باعدار: رۋحاني جاڭعىرۋ»، «ۇلى دالانىڭ جەتى قىرى»، ءتىپتى اعىمداعى جىل «جاستار جىلى» دەپ بەكىتىلدى. ەلباسىمىز جوعارىدا اتالعان جولداۋلاردىڭ بارىندە كونە زامانداعى كورىكتى قالالارىمىز، ءسان سالتاناتى تالاسقان وزىق ەسكەرتكىشتەرىمىز بەن مادەني مۇرالارىمىزدىڭ اينىماس ايعاق بولارىن اتاپ ءوتتى. دەمەك، ۇلتتىق كودتى ۇلىقتاۋ اياسىندا ۇلى تۇلعالار تۋرالى ءتۇرلى جانرداعى (كوركەم فيلمدەر، دەرەكتى سەريالدار) تۋىندىلار تۇسىرىلەر بولسا مەملەكەت تاراپىنان قولداۋ الارى ءسوزسىز. بۇل رەتتە تەلەكورەرمەندى دۇرىس باعىتتايتىن بلوگەرلەر ەن كاسىبي مامانداردىڭ دا اتقارار قىزمەتى وراسان. ءاربىر باسىلىم بەتى مەن اقپارات سايتتارىنىڭ كەز-كەلگەنىندە كينو ونەرىنىڭ جاڭالىقتارىن جاريالاۋعا ارنالعان ءبولىم بولۋعا ءتيىس. وندا سالىنعان ماتەريالداردى (فيلمدەردى، تەلەسەريالداردى، ماقالالار مەن سىني تالداۋلاردى، جاڭالىقتاردى) تالداۋ ارقىلى كورەرمەندەر اراسىندا پىكىرتالاس ۇيىمداستىرىپ، تالعامدارىن دا تۇزەۋگە جول اشۋعا بولادى.

توقسان اۋىز ءسوزدىڭ توبىقتاي ءتۇيىنى، كىمگە دە بولماسىن جالقاۋلىقتان ارىلىپ، تەرەڭ ىزدەنۋگە، تىڭ جاڭالىق اشۋعا تالپىنۋ كەرەك. قازاق كينو ونەرىندە بۇرىن سوڭدى تۇسىرىلمەگەن، ياكي از تۇسىرىلەتىن سپورت، ءبىلىم-عىلىم، مەديسينا، عارىش، اسپان الەمى تۋراسىنداعى ەرەكشە تاقىرىپتاردا فيلمدەر مەن سەريالدار ءتۇسىرىلۋى كەرەك. مۇنى ىسكە اسىراتىن جاس كينوگەرلەردىڭ قابىلەتىن شىڭداپ، ىنتاسىن ارتتىرۋ ءۇشىن وتاندىق، الەمدىك دەڭگەيدەگى فەستيۆالدەر مەن بايقاۋلاردى كوپتەپ ۇيىمداستىرۋ كەرەك. بۇل – كينوماتوگرافيستەردىڭ شىعارماشىلىق جولدا ءوسۋ دەڭگەيىن كوتەرىپ قانا قويماي، ساپالى كينوشىعارمالاردىڭ كوبەيۋىنە ارەكەت ەتەدى.

بۇگىنگى كۇننىڭ ايناسىن ەرتەڭگى ۇرپاققا كورسەتۋدە زەتتەۋ ماتەريالى رەتىندە قۇندى بولىپ سانالاتىن كينوتۋىندالار كوپتەپ تۇسىرىلە بەرسە دەگەن يگى تىلەك.

ايجان ەسەنگەلدى