بيىلعى وقۋ جىلى ءتامامدالدى. الدىمىزدا – جاڭا وقۋ جىلى. مەكتەپتى بىتىرگەن جاس تۇلەكتەر وزدەرىنىڭ بولاشاعى جارقىن بولۋى ءۇشىن ۇزدىك جوعارى وقۋ ورىندارىنا ءتۇسۋدى قالايدى. ەلىمىزدەگى ماڭدايالدى وقۋ وردالارىن زەرتتەپ، ساپالى ءبىلىم بەرەتىن ورىندى تاڭدايدى. Qamshy.kz اقپارات اگەنتتىگى ءوز كەزەگىندە وقۋشىلارعا جوعارى وقۋ ورىنىن تاڭداۋدا كومەك بەرمەككە شەشىم قابىلدادى. قازاقستانداعى ۇزدىك جوعارى وقۋ ورىندارىنىڭ ءتىزىمىن ۇسىنىپ، تاڭداۋدى جەڭىلدەتە تۇسپەكپىز. ەندەشە ءارى قاراي وقىڭىز.
ەلىمىزدەگى جوعارى ءبىلىم بەرەتىن وقۋ وردالارىنىڭ دارەجەسى جىل ساناپ ءوسىپ كەلەدى. جوعارى وقۋ ورىندارىنىڭ ءبىلىم بەرۋ باعدارلامالارى دا جاڭارىپ، الەمدىك ستاندارتتارمەن سايكەستەندىرىلۋدە. تاريحى تەرەڭ، مارتەبەسى جوعارى ۋنيۆەرسيتەتتەر اتالعان جۇيەگە الدەقاشان ءوتىپ، ستۋدەنتتەرگە وسى جۇيە بويىنشا ءبىلىم بەرۋدە.
سونىمەن، ەڭ ۇزدىك 5 جوعارى وقۋ ورىنىنىڭ قاتارىنا قانداي ۋنيۆەرسيتەت، اكادەميالار كىرەدى؟
- ءال-فارابي اتىنداعى قازاق ۇلتتىق ۋنيۆەرسيتەتى
ىرگەتاسى وتكەن عاسىردىڭ 30-جىلدارىندا قۇرىلعان ىرگەلى وقۋ ورداسىنىڭ ابىرويى اسقاق بۇگىندە. ءقازىر قازۇۋ - تمد كولەمىنەن الەمنىڭ 250 ۇزدىك ۋنيۆەرسيتەتىنىڭ قاتارىنا كىرگەن ەكى جوعارى وقۋ ورىنىنىڭ ءبىرى. ەكىنشىسى – م.ۆ.لومونوسوۆ اتىنداعى ماسكەۋ گۋمانيتارلىق ۋنيۆەرسيتەتى.
وسىنداي بيىك دارەجەگە كوتەرىلگەن ۋنيۆەرسيتەتتىڭ ءبىلىم بازاسى دا كەڭ، ءبىلىم بەرۋ باعدارلاماسى دا الەمدىك وزىق جۇيەلەرگە سايكەستەندىرىلگەن. وتىز مىڭنان استام ستۋدەنت وقيتىن ءبىلىم ورداسىندا شەتەلدەن كەلىپ، ءبىلىم الىپ جاتقان جاستاردىڭ دا ۇلەس سالماعى باسىم.
قازۇۋ-دى تاڭداۋ نەگە پايدالى؟ ويتكەنى، ەلىمىزدەگى ءبىلىم سالاسىنا ەنگىزىلگەن وڭ وزگەرىستەردىڭ بارلىعى وسى وقۋ ورداسىندا تاجىريبەدەن وتەدى. دەمەك، ستۋدەنتتەرگە ءبىلىم الۋ بارىسىندا مول مۇمكىندىكتەر تۋىندايدى.
سونداي-اق، ءال-فارابي اتىنداعى قازۇۋ-دىڭ الەمدەگى بىرنەشە وزىق ۋنيۆەرسيتەتتەرمەن ءوزارا كەلىسىمشارتى بار. بۇل كەلىسىمشارتتار اكادەميالىق ۇتقىرلىق ارقىلى قازاق جاستارىنىڭ شەتەلدە ءبىلىم الۋىنا مۇمكىندىك بەرەدى.
- ل.گۋميليەۆ اتىنداعى ەۋرازيا ۇلتتىق ۋنيۆەرسيتەتى
1996 جىلى ەلباسىنىڭ ارنايى بۇيرىعىمەن قۇرىلعان اسانا قالاسىنداعى ەۋرازيا ۇلتتىق ۋنيۆەرسيتەتى بۇگىندە ەلىمىزدىڭ جەتەكشى وقۋ ورىندارىنىڭ قاتارىندا. ەۇۋ دا ماڭدايالدى ۋنيۆەرسيتەتتەردىڭ ءبىرى بولعاندىقتان، الەمدەگى بيىك دارەجەلى جوعارى وقۋ ورىندارى قولدانىسقان ەنگىزىپ وتىرعان ءبىلىم بەرۋ جۇيەسىنە كوشكەن.
ل.ن.گۋميليەۆ اتىنداعى جوعارى وقۋ ورىنى الەمدەگى وزىق ۋنيۆەرسيتەتتەردىڭ رەيتينگىندە 336 ورىنعا جايعاسقان. ۋنيۆەرسيتەت جىل سايىن دامىپ، ءوز ستۋدەنتتەرىنە بارلىق جاعدايدى جاساپ وتىر. بۇگىندە ۋنيۆەرسيتەت كولەمىندە 28 عىلىمي مەكەمە مەن 13 فاكۋلتەت بار.
عىلىمي مەكەمەلەردىڭ قاتارىنا زەرتحانالار، ينستيتۋتتار، ءتۇرلى عىلىمي-زەرتتەۋ ورتالىقتارى كىرەدى. سونداي-اق، ىلىكتىلىكتى ارتتىرۋ ورتالىقتارى مەن اسكەري كافەدرا جۇمىس جاساۋدا.
- م. اۋەزوۆ اتىنداعى مەملەكەتتىك ۋنيۆەرسيتەت
1943 جىلى نەگىزى قالانعان شىمكەنت قالاسىنداعى مۇحتار اۋەزوۆ اتىنداعى مەملەكەتتىك ۋنيۆەرسيتەت بۇگىندە 76 تەحنيكالىق جانە گۋمانيتارلىق سالا بويىنشا ماماندار دايارلاۋمەن اينالىسىپ كەلەدى. قۇرامىندا 14 فاكۋلتەت پەن اسكەري كافەدرا بار.
گۋمانيتارلىق جانەتەحنيكالىق ءبىلىم العىسى كەلگەن ستۋدەنتتەردىڭ كوپشىلىگى شىمكەنت قالاسىنداعى وسى جوعارى وقۋ ورىنىنا بەت بۇراتىنى بەلگىلى. ءقازىر ۋنيۆەرسيتەتتە جاڭا ءبىلىم بەرۋ باعدارلاماسىن تولىققاندى ەنگىزگەن. جاڭا وقۋ جىلىنان باستاپ وزگە دە وڭ وزگەرىستەردىڭ بولارى انىق.
سونداي-اق، ۋنيۆەرسيتەتتىڭ ستۋدەنتتەرگە قاجەتتى تيىمدىلىگى – وقۋ اقىسىنىڭ تومەندەۋ بولۋى.
- س.د.اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتى
س.د. اسفەندياروۆ اتىنداعى قازاق ۇلتتىق ۋنيۆەرسيتەتىنىڭ ىرگەتاسى 1931 جىلى قالانعان. بۇل ءبىلىم ورداسى ەلىمىزدەگى اق حالاتتى ابزال جاندار دايارلاۋ ىسىندەگى جەتەكشى ۋنيۆەرسيتەتكە اينالعان. مەديسينانىڭ بارلىق سالاسى بويىنشا مامان دايارلاۋ ىسىندە الەمدەگى وزىق جۇيەلەردى پايدالانادى. سونداي-اق، وقۋ ورداسىندا بارلىق تەحنيكالىق جابدىقتارمەن جاراقتالعان زەرتحانالار قاراستىرىلعان جانە ەلىمىزدەگى مەديسينا سالاسىنىڭ ۇزدىك ۇستازدارى دا وسى وقۋ ورداسىنا شوعىرلانعان.
جىل سايىن مەديسينا قىزمەتكەرى بولۋدى كوزدەگەن تالاپكەرلەر وسى ۋنيۆەرسيتەتكە ءتۇسۋدى ارماندايدى. الماتى قالاسىنىڭ ورتالىعىندا ورنالاسقان وقۋ عيماراتىنىڭ دا تاريحى تەرەڭدە.
ءقازىر قازاق ۇلتتىق مەديسينالىق ۋنيۆەرسيتەتى ەلباسىنىڭ «رۋحاني جاڭعىرۋ» باعدارلامالىق ماقالاسىن قارقىندى قولداپ، ءبىلىم بەرۋ جۇيەسىن تولىق لاتىن قارپىنە كوشىرۋ جۇمىستارىن جۇرگىزۋدە. ايتۋلارىنشا، بۇل باستاما ارقىلى مەديسينا سالاسىندا بىلىكتىلىكتى ارتتىرۋ دەڭگەيى جوعارىلاماق.
- قازاق ۇلتتىق اگرارلىق ۋنيۆەرسيتەتى
قازاق ۇلتتىق اگرارلىق ۋنيۆەرسيتەتى – ەلىمىزدىڭ اۋىلشارۋاشىلىق سالاسىنا ساپالى مامان تاربيەلەپ بەرىپ وتىرعان جەتەكشى وقۋ ورىنى.
بۇگىندە ەلىمىز اۋىل شارۋاشىلىعىنا، اسىرەسە، مال شارۋاشىلىعى مەن ەگىن شارۋاشىلىعىنا ۇلكەن كوڭىل ءبولىپ وتىرعانىن بىلەمىز. وسى تۇستا اۋىل شارۋاشىلىعىنىڭ ناعىز ماماندارىن دايارلاۋ ىسىندە اتالعان ءبىلىم وشاعىنىڭ ەڭبەگى زور.
ۋنيۆەرسيتەتتە ءقازىر التى فاكۋلتەت پەن جۇزدەگەن بىلىكتى ماماندار جۇمىس جاسايدى. جىل سايىن اۋىل شارۋاشىلىعىنا دەگەن تالاپكەرلەردىڭ دە قىزىعۋشىلىعى ارتىپ كەلەدى.
ءبىز تەك قازاقستاندىق جۇيەدە ءبىلىم بەرەتىن جوعارى وقۋ ورىندارىن اتادىق. بۇدان بولەك، ەلىمىزدە ارنايى ۇلعايتىلعان ءارى تەرەڭدەتە ءبىلىم بەرەتىن جانە شەتەلدىك باعدارلامالارمەن وقىتاتىن ۋنيۆەرسيتەتتەر بار. تاڭداۋدى پاتشا كوڭىلىڭىز ءبىلسىن!
اۆتور: جۇلدىز مۇقانوۆا
