ءبىز بۇگىنگە دەيىن الەمدىك دارەجەدە ۇلكەن جەتىستىك شىڭدارىن باعىندىرعان تۇلعالاردىڭ ومىرلىك ۇستانىمدارى، اقىل-كەڭەستەرى، جۇمىس رەجيمى سىندى ءبىرشاما قۇندى دۇنيەلەردى سىزدىك نازارعا ۇسىنىپ كەلەمىز. بۇگىن دە ءداستۇرلى داعدىمىزدان جاڭىلماي، ءتورتىنشى ونەركاسىپتىك ريەۆوليۋسيا جاعدايىندا ءومىر ءسۇرىپ جاتقان ازاماتتارعا ءبىر پايداسى تيەر دەگەن ويمەن ەۆگەنيا ەۆليۋتينانىڭ جەتىستىك قۇپياسىن اشقالى وتىرمىن.

بۇگىنگى جازبامىزدىڭ كەيىپكەرىنە اينالعالى وتىرعان ەۆگەنيا ەۆليۋتينا كىم؟ ول جەتىستىككە قالاي جەتتى؟

ەۆگەنيا ەۆليۋتينا - "توچكا" قارجى بانكىنىڭ نەگىزىن قالاۋشى جانە حولاكراتيانىڭ باسشىسى. ول ءوزىنىڭ وسى بانكتى اياققا تۇرعىزۋ كەزەڭىندە جانە وعان دەيىن قانداي باعىتتارمەن جۇمىس جاساعانىن ايتادى. بانك يەسىنىڭ سوزىنە سۇيەنسەك، ول ءوزىنىڭ التىن ۋاقىتىن كوركەم ادەبيەتتەردى وقۋعا جۇمساماعان جانە جۇمىس بارىسىندا ءتۇرلى كوماندالارمەن قىزمەتتەس بولعان.

ونىڭ جۇمىس كۇنى قالاي وتەدى؟

"مەن جۇمىس كۇنى ۇيقىدان جۇمىس ۋاقىتىنا ءبىر جارىم ساعات قالعاندا ويانامىن. تۇرعان بويدا ەلەكتروندى پوشتانى تەكسەرەمىن. ارتىنشا تاڭعى اس دايىنداپ، ونى وزىممەن بىرگە الا شىعامىن دا، كەپتەلىستە تۇرعاندا تاماقتانىپ ۇلگەرەمىن. كەڭسەگە ساعات 8-9 شاماسىندا جەتەمىن. دەگەنمەن، نەگىزگى جۇمىس كۇندىزگى ساعات ەكىدەن كەيىن قىزادى"، - دەيدى ول.

سونىمەن قاتار، ول ءوزىنىڭ وزگە دە داعدىلارىن ءسوز ەتتى. بانك باسشىسىنىڭ ايتۋىنشا، ول ءاردايىم ءوزىنىڭ جالپى جوسپارىن، ءوزىنىڭ جۇزەگە اسىرۋدى قالايتىن ماقساتتارىن جانە جاسالۋى ءتيىس مىندەتتەرىن قاعازعا ءتۇسىرىپ وتىراتىنىن ايتادى. ەۆگەنيا ءوزىنىڭ ويعا العان دۇنيەلەرىن Microsoft Outlook ەلەكتروندى قاعازىنا جۇكتەسە دە، ولاردى ستيكەرلەرگە جازىپ، ۇستەل ۇستىنە جاپسىرىپ قويۋدىڭ پسيحولوگيالىق ماڭىزى بار ەكەنىن ايتادى.

ول ءوزىنىڭ كەڭسەدەن تىس كوپ جۇرمەيتىنىن، ءبىراق كەڭسە ىشىندە ونلاين-كەزدەسۋلەر، جينالىستار وتكىزىپ، "توچكا" نۇكتەلەرى بويىنشا ەكسكۋرسيالار جاساپ تۇراتىنىن، جالپى جۇمىس بارىسىندا ءاردايىم قوزعالىستا بولاتىنىن العا تارتادى. سونىمەن قاتار، "توچكا" بانكىنىڭ باسشىسى جۇمىس ۋاقىتى ادەتتە كەشكى ساعات 7-8 شاماسىندا اياقتالعانىمەن، ونىڭ بارلىق ۋاقىتى جۇمىسقا ارنالاتىنىن ايتادى.

ەۆگەنيا – باسشىسى. سوعان وراي ول جەكە ۇيىمداستىرۋشىلىق قابىلەتى بار كوماندانىڭ حولاكراتيا زاڭدىلىقتارىنا ساي جۇمىس جاساۋىن قاداعالايدى. سونىمەن قاتار، ول – ۆەلوسيتيست. "ۆەلوسيتيست" دەگەنىمىز قىزمەت كورسەتۋدىڭ جىلدامدىعىنا جاۋاپ بەرۋ دەگەن ۇعىمعا سايكەس كەلەدى. مىنە، ونىڭ ەكىنشى قىزمەتى – وسى.

سونداي-اق، ەۆگەنيا ءبىرشاما ۋاقىتتان بەرى تۇتىنۋشىلارعا الكوگولدى ءونىم ساتۋ ءۇشىن جانە ونلاين-كاسسانى پايدالانۋ ءۇشىن ليسەنزيا الىپ بەرۋگە كومەكتەسەتىن قىزمەتتىڭ جانىندا ءجۇر ەكەن. بۇل قىزمەتتى كاسىپ سالاسىندا product owner دەپ اتايدى. ونىڭ ايتۋىنشا، ونلاين-كاسسا قىزمەتىنىڭ اياسىن كەڭەيتۋ – نەگىزگى ماقساتتارىنىڭ ءبىرى جانە وسى باعىتقا كوپ ۋاقىتىن جۇمسايدى.

"توچكا" بانكىنىڭ نەگىزىن قالاۋشى ءبىر ۋاقىتتا بىرنەشە قىزمەتتى قاتار اتقارۋ قيىنعا سوعاتىنىن جانە سول ءارتۇرلى باعىتتىڭ قىزمەتىنە كۇن سايىن بەيىمدەلۋگە ءبىراز ۋاقىت كەتەتىنىن تىلگە تيەك ەتتى. ءبىراق وزىنە بارلىق باعىتتى قاتار اتقارىپ وتىرۋ قاجەت بولعاندىقتان، جوعارىدا ايتقان بەيىمدەلۋگە كەتەتىن ۋاقىتتى ازايتۋعا تىرىساتىنىن ايتادى.

وسىلاي دەگەن ەۆگەنيا ءوزىنىڭ ۋاقىتتى قالاي ۇنەمدەيتىنىن دە جاسىرۋدى ءجون كورمەگەن.

"مەنىڭ تايم-مەنەدجمەنتىمنىڭ نەگىزى – كومپيۋتەردەگى نەمەسە ۇيالى تەلەفونداعى  Outlook كالەندارى. مەن تاپسىرمالاردى ورىندار الدىندا ءوزىم دە ىشىنە كىرەتىن كوماندانىڭ جاعدايىنا ورايلاستىرامىن"، - دەيدى ەۆگەنيا ەۆليۋتينا.

كاسىپ سالاسىنا كەلگىسى كەلەتىن كەز-كەلگەن ادام تايم-مەنەدجمەنتتى ءبىر كىسىدەي ۇيرەنۋى شارت. ايتپەسە، كاسىپتە جوسپارلانباي جاسالعان دۇنيەلەردىڭ ءبارى قۇلدىراۋعا الىپ كەلەدى. سوندىقتان، ۋاقىتتى ۇنەمدەۋ مەن ءتيىمدى پايدالانۋ جولدارىن قازىردەن باستاپ ۇيرەنگەنىڭىز ءجون.

سونداي-اق، ەۆگەنيا ەۆليۋتينا جەتىستىككە جەتۋگە قاجەتتى دۇنيەلەردى ءوز تاجىريبەسىمەن ۇشتاستىرا وتىرىپ اتاپ وتەدى.

ونىڭ ايتۋىنشا، جەتىستىككە جەتۋگە ەڭ ءبىرىنشى كەدەرگى بولاتىن دۇنيە – قورقىنىش. قورقىنىشى باسىم ادامدار ەشقاشان تاۋەكەل جاساي المايدى. ال جەتىستىكتىڭ نەگىزگى كىلتتەرىنىڭ ءبىرى – تاۋەكەلدى قادام.

مىنە، جوعارى دەڭگەيدەگى حولاكراتيالىق ۇجىمنىڭ باسشىسىنىڭ نەگىزگى داعدىلارى وسىنداي.

ەگەر جەتىستىككە قول جەتكىزگىڭىز كەلسە، بۇگىننەن باستاپ ارەكەت ەتىڭىز.

اۆتور: جۇلدىز مۇقانوۆا