بيىلعى وقۋ ماۋسىمىنىڭ ءتامامدالعانىنا دا ەكى ايعا جۋىق ۋاقىت ءوتتى. بۇگىندە تۇلەكتەردىڭ كوپشىلىگى قاي ماماندىقتى تاڭدارىن بىلمەي، ابدىراپ جاتاتىنى بەلگىلى. ماماندىقتىڭ دا سانى كوپ. ولاردىڭ ىشىندە سالاۋاتتى ءومىر سالتىن ۇستانۋعا شاقىرىپ، ادام جانىنا اراشا بولاتىن اق حالاتتى ابزال جانداردىڭ ورنى تىپتەن بولەك. جالپى العاندا، دارىگەر بولۋ، مەديسينالىق ماماندىقتى تاڭداۋ – جاۋاپتى شەشىمدەردىڭ ءبىرى ەكەنى ءسوزسىز. سوندىقتان بولار، مۇنداي ماماندىق تەك ۇلكەن قالالاردا وقىتىلادى جانە وقۋ اقىسى دا قالتاعا اجەپتەۋىر سالماق سالادى. جاسىراتىنى جوق، مەديسينا ماماندىعىن تاڭداۋدى ءجون ساناعان وڭتۇستىكتىڭ تۇلەكتەرى كوبىنە-كوپ سولتۇستىك وڭىرلەرگە بەت تۇزەيدى.

ەندى، مىنە، جۋىردا عانا جامبىل وبلىسىنداعى شۋ اۋدانىندا مەديسينالىق كوللەدج اشىلىپ، جوعارىدا اتالعان ولقىلىقتىڭ ورنى تولعان سەكىلدى. الماتى يننوۆاسيالىق كوللەدجىنىڭ ۇيىتقى بولۋىمەن اشىلعان جامبىل وبلىستىق مەديسينالىق كوللەدجىن وسى ءوڭىردىڭ تۋماسى ءسابيت مەيىرحان ۇلى باسقارماق. ول بۇعان دەيىن ستوماتولوگ مامانى رەتىندە ۇزاق جىل بويى تاجىريبە جيناقتاپ، كەيىننەن بىرنەشە كومپانيادا باسشىلىق قىزمەتتەردى اتقارعان ەكەن. س.مەيىرحان ۇلىنىڭ سوزىنە سەنسەك، شۋ اۋدانىنان مەديسينالىق كوللەدج اشۋ يدەياسى وسى جىلدىڭ باسىندا-اق ويلاستىرىلعان كورىنەدى. بىزبەن اڭگىمە بارىسىندا كوللەدج ديرەكتورى ءدال وسى مەديسينا ماماندىعىن وقىتۋ شۋ اۋدانىنا اسا قاجەت ەكەندىگىن تىلگە تيەك ەتتى. راسىمەن دە، بۇعان دەيىن اۋدانداعى اۋرۋحانا مەن ەمحانادا مامان تاپشىلىعى تۋرالى ايتىلىپ، ول تۋرالى باسپا ءسوز بەتتەرىندە دە بىرنەشە مارتە جازىلعان بولاتىن. ءتىپتى، سونىڭ سالدارىنان ءبىر قىزمەتكەردىڭ بىرنەشە قىزمەتتى قاتار الىپ جۇرگەنىن دە قۇلاعىمىز شالعان. ال ادامنىڭ العاشقى بايلىعى - دەنساۋلىق ءۇشىن كۇرەسەتىن اق حالاتتىلاردىڭ جۇمىسى ۇلكەن جاۋاپكەرشىلىكتى تالاپ ەتەتىنىن ەسكەرسەك، مامان تاپشىلىعىنىڭ ادام ومىرىنە قانشالىقى كەرى اسەر ەتەتىنىن ايتپاسا دا تۇسىنىكتى.

وقۋ ورداسىنىڭ باسشىسى وندا ازىرگە 3 ماماندىق وقىتىلاتىندىعىن ايتادى. ولاردىڭ قاتارىندا فارماسيەۆت، فەلدشەر جانە مەيىربيكە ءىسى ماماندىقتارى بار. ال كەلەر جىلدان باستاپ ستوماتولوگيا، ۆەتەريناريا ماماندىقتارى وقىتىلماقشى. وسىلايشا، جىل وتكەن سايىن وزگە دە مەديسينالىق ماماندىقتار قوسىلىپ، كوللەدجىڭ اۋقىمى كەڭەيە تۇسپەك. جۋىرداعا عانا اشىلعان كوللەدج اعىمداعى ايدىڭ 10-نان باستاپ تامىز ايىنا دەيىن وقۋعا قابىلداۋ جۇرگىزەدى. سونىمەن بىرگە، كوللەدج بيىلعى وقۋ جىلىندا 200 ستۋدەنتتى قابىلداۋعا قاۋقاۋرلى. ازىرگە وقۋ كورپۋسىن جالعا الىپ وتىرعان مەكەمە الداعى ۋاقىتتا جەكە عيماراتقا كوشۋدى جوسپارلاپ وتىر. وقىتۋعا قاجەتتى قۇرىلعىلاردى ورنالاستىرىلىپ، بىلىكتى ماماندار جيناۋ ءىسى دە بىرتى-بىرتە شەشىلۋدە. ايتا كەتۋ كەرەك، قازىرگى ۋاقىتتا مەملەكەتتىك وقۋ ورىندارىنىڭ كوپشىلىگى جەكەنىڭ يەلىگىنە اۋىسىپ جاتقاندىقتان، اتالمىش وقۋ ورداسى دا بىردەن جەكەمەنشىك كوللەدج رەتىندە اشىلعان.

كوللەدج ديرەكتورىنان الەۋمەتتىك جاعدايى تومەن، كوپبالالى وتباسىنان شىققان ستۋدەنتتەرگە قانداي دا ءبىر جەڭىلدىكتىڭ بار-جوعىن  سۇراعانىمىزدا، بارلىق ستۋدەنتتەرگە جەڭىلدىك قاراستىرىلعانىن جەتكىزدى. ماسەلەن، مۇنداعى وقۋ اقىسى وزگە دە مەديسينالىق كوللەدجدەرگە قاراعاندا الدەقايدا تومەن كورىنەدى. دالىرەك ايتساق، توعىزىنشى سىنىپتان كەيىن تۇسكەن ستۋدەنتتەر ءۇشىن وقۋ اقىسى 125 مىڭ تەڭگە. وعان قوسا، ءبىر جىلدىڭ وقۋ اقىسىن ۇشكە ءبولىپ تولەۋدى قاراستىرىپ، اۋىلدىقتار ءۇشىن ۇلكەن جەڭىلدىك جاساپ وتىر. ياعني، باستاپقىدا وتىز پايىز، ەكىنشى بولىگى 10-شى جەلتوقسانسانعا دەيىن قىرىق پايىز، كەيىنگىسى 10-شى ساۋىردە قالعان وتىز پايىزى تولەنەدى. وسىلايشا، ستۋدەنت ءۇش جىل، ون ايدىڭ ىشىندە مەديسينا مامانى ەكەنىن راستايتىن ديپلومنىڭ يەسى بولىپ شىعا كەلەدى. ال 11ء-شى سىنىپتان كەيىن تۇسكەن نەمەسە كوللەدج ءبىتىرىپ، ەكىنشى ماماندىق الامىز دەگەن نيەتتەنۋشىلەر ءۇشىن وقۋ اقىسى 140 مىڭ تەڭگە بولماق. ولاردىڭ وقۋ مەرزىمى – ەكى جىل، ون اي. ەگەر وقۋعا تۇسكەن ستۋدەنت وقۋ اقىسىن بىردەن تولەيتىن بولسا، كوللەدج تاراپىنان ون پايىزدىق جەڭىلدىك قاراستىرىلعان. سونداي-اق، كۇندىزگى ۋاقىتتا جۇمىس ىستەيتىن ازاماتتار ءۇشىن كەشكى وقۋ دا قاراستىرىلىپتى.

شاپاعات قونىسباي