جەكە كاسىپكەر 2012 جىلى مۇنايلى اۋدانى، ماڭعىستاۋ سەلوسىنانكولەمى  0،1089 گا جەر تەلىمىن ساتىپ العان. 2016 جىلى ماڭعىستاۋ اۋىلى اكىمىنىڭ جەر تەلىمىنىڭ نىسانالى ماقساتىن بالاباقشا قۇرىلىسىن سالۋعا وزگەرتۋ تۋرالى شەشىمى نەگىزىندە «اقمارجان مۇنايلى» بالاباقشاسىنىڭ عيماراتىن سالىپ، ىسكە قوسادى.

ءسويتىپ ماڭعىستاۋ اۋىلى اكىمىنىڭ شەشىمى جانە «مۇنايلى اۋداندىق ساۋلەت جانە قۇرىلىس ءبولىمى» مەملەكەتتىك مەكەمەسىنىڭ بۇيرىعىمەن  ساتىپ الۋ-ساتۋ كەلىسىم شارتى جاساقتالىپ، جەر تەلىمى ءۇش جىلعا(2018، 2019، 2020 ج.) كاداسترلىق قۇنىن ءبولىپ تولەۋمەن، جەكە مەنشىككە بەرىلەدى.

ىسكەر 2017 جىلعا بەلگىلەنگەن قارجىنى تولىق تولەيدى. الايدا 2018 جىلى كاسىپكەردىڭ بەلگىلى سەبەپتەرمەن وبلىس اۋماعىندا بولماۋىنا بايلانىستى تولەماقى دەر كەزىندە اۋدارىلمايدى. سول جىلدىڭ شىلدەسىندە «مۇنايلى اۋداندىق ساۋلەت جانە قۇرىلىس ءبولىمى» مەملەكەتتىك مەكەمەسى اۋداندىق سوتقا تالاپ ارىز بەرىپ، قارجىنىڭ كەستەگە ساي ۋاقىتىندا تولەنبەۋى سالدارىنان ساتىپ الۋ-ساتۋ كەلىسىم شارتىن بۇزۋدى سۇراعان جانە سوتتىڭ 20 تامىز 2018 جىلعى شەشىمىمەن بۇل تالاپ ارىز قاناعاتتاندىرىلعان. سوت شەشىمى زاڭدى كۇشىنە ەنگەن جانە وعان تاراپتار اپەللياسيالىق شاعىم كەلتىرمەگەن.

قازىرگى كەزدە سوت شەشىمىنە اپەللياسيالىق شاعىم كەلتىرۋ مۇمكىندىگى ءوتىپ كەتتى. بەلگىلەنگەن ۋاقىتتىڭ وزۋىنا بايلانىستى كاسساسيالىق ساتىعا دا شاعىم كەلتىرۋگە بولمايدى. قايتپەك كەرەك؟

ال، «اقمارجان مۇنايلى» بالاباقشاسى 2017 جىلدىڭ قاڭتارىنان باستاپ 60 ءبۇلدىرشىندى تاربيەلەپ كەلەدى. ولاردىڭ 45ء-ى مەملەكەتتىك تاپسىرىس نەگىزىندە جۇزەگە اسۋدا. وندا 27 مامان جۇمىسپەن قامتىلىپ وتىر.

سوت شەشىمى نەگىزىندە بوبەكجاي قىزمەتىن توقتاتار بولسا، بالالار كۇتىمسىز، تاربيەشىلەر جۇمىسسىز قالىپ، بالالاردىڭ اتا-انالارىنىڭ جۇمىسقا شىعۋىنا كەدەرگى كەلىپ، ونىڭ سالدارى نارازىلىق اكسياسىن تۋعىزۋى ابدەن مۇمكىن ەدى.

وسى جاعدايلاردى ەسكەرە وتىرىپ وڭىرلىك «اتامەكەن» كاسىپكەرلەر پالاتاسى«بيزنەستىڭ جول كارتاسى 2020» ءبىرىڭعاي باعدارلاماسى، قازاقستان رەسپۋبليكاسى پرەزيدەنتىنىڭ «جاڭا ونجىلدىق - جاڭا ەكونوميكالىق ورلەۋ - قازاقستاننىڭ جاڭا مۇمكىندىكتەرى» اتتى قازاقستان حالقىنا جولداۋىن، ونىڭ ىشىندە   جالپى ەلدىڭ ورنىقتى ەكونوميكالىق دامۋىن قامتاماسىز ەتۋ بارىسىندا جەكە كاسىپكەرلىكتى، ەڭ الدىمەن، شاعىن جانە ورتا بيزنەس دەڭگەيىنە ىقپالىن تيگىزەتىن باسەكەلەستىكتى دامىتۋ، ىشكى سۇرانىستىڭ يمپورتقا تاۋەلسىزدىگىن قامتاماسىز ەتۋ، جۇمىسسىزدىق، كەدەيشىلىك جانە باسقا دا پروبلەمالاردى شەشۋ قاجەتتىگى تۋرالى تالاپتارىن ەسكەرە وتىرىپ، وسى ماسەلەنى، بارلىق مۇددەلى ورگانداردىڭ ۋاكىلدەرىنىڭ قاتىناسۋىمەن، دوڭگەلەك ۇستەل وتىرىسىندا تالقىلاپ، ەكى جاقتى مەموراندۋم اياسىندا بەلگىلى ءبىر توقتامعا كەلۋ تۋرالى اۋدان اكىمدىگىنە حات جولدادى.

ماڭعىستاۋ وبلىسى كاسىپكەرلەر پالاتاسى ديرەكتورىنىڭ ورىنباسارى ءامىرعالي جانايەۆ: «وسى ورايدا تاعى ءبىر ەسكەرەتىن جايت، ماڭعىستاۋ اۋىلىنىڭ اكىمى 23 قاڭتار 2018 جىلى جەكە كاسىپكەر زۇلحارنايەۆا عاليانىڭ جەر تەلىمىنىڭ نىسانالى ماقساتىن وزگەرتۋ تۋرالى شەشىمىنىڭ كۇشىن جويۋ تۋرالى قاۋلى قابىلداعان.الايدا، اۋىل اكىمىنىڭ بۇل ارەكەتى زاڭ تالاپتارىنا قايشى كەلگەن. سەبەبى: جەر تەلىمىنىڭ نىسانالى ماقساتىن وزگەرتۋ ساتىسىندا اۋدان اكىمى جانىنداعى جەر كوميسسياسىنىڭ قورىتىندى شەشىمى نەگىزىندە اكىم 2016 جىلى قاۋلى قابىلداعان، ال ونىڭ كۇشىن جويۋ ءۇشىن كوميسسيا شەشىمىن الماعان. وعان قوسا، «جىلجىمايتىن مۇلىككە قۇقىقتاردى مەملەكەتتىك تىركەۋ تۋرالى» زاڭى بويىنشا جىلجىمايتىن مۇلىككە مەنشىك قۇقىعى تىركەلگەن سوڭ، ياعني قۇقىقتىق كاداستر پاراعىنا تىركەلگەن سوڭ، تىركەۋشى ورگان بۇل جازبانىڭ كۇشىن زاڭدى كۇشىنە ەنگەن سوت اكتىسىنىڭ نەگىزىندە جۇزەگە اسىرا الادى نەمەسە مەملەكەتتىك تىركەۋگە بايلانىستى داۋلار سوت تارتىبىمەن شەشىلەدى. وسى جاعدايدى بايانداي كەلە، زاڭسىز قاۋلىعا پروكۋرورلىق اكت تا ەنگىزىلدى»،- دەيدى.

وسى كۇردەلى ماسەلە وڭىرلىك كاسىپكەرلەر پالاتاسىنىڭ ارالاسۋىمەن وڭ شەشىلدى. ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتى مۇنايلى اۋدانى، ماڭعىستاۋ اۋىلى اكىمىنىڭ 23 قاڭتار 2019 جىلى  جەكە كاسىپكەر زۇلحارنايەۆا عاليا قابيجانوۆناعا جەر تەلىمىنىڭ نىسانالى ماقساتىن وزگەرتۋ تۋرالى قۇجاتىنىڭ كۇشىن جويعان شەشىمىن زاڭسىز دەپ تاپتى. ءسويتىپ، زاڭسىز شەشىمنىڭ كۇشىن جويىلىپ، ماسەلە كاسىپكەر پايداسىنا تولىق شەشىلدى.

«مەنىڭ تۇيىتكىلدى ماسەلەمە بەي-جاي قاراماعان ماڭعىستاۋ وبلىسىنىڭ كاسىپكەرلەر پالاتاسىنىڭ قىزمەتكەرلەرىنە العىسىم شەكسىز. مەن سونشا جىل اياعىنان تۇرعىزعان كاسىبىم قۇردىمعا كەتىپ، تاربيەلەپ وتىرعان بالالارىم، ەڭبەك ەتىپ جۇرگەن قىزمەتكەرلەرىمنىڭ ءحالى نە كۇيدە بولادى؟ دەپ قاتتى قينالىپ ەدىم. زاڭ ۇستەمدىك قۇردى. بىلىكتى مامانداردىڭ ارالاسۋىمەن ءبارى ءساتتى شەشىلدى. ريزاشىلىعىمدى سوزبەن ايتىپ جەتكىزە المايمىن»،- دەيدى  جەكە كاسىپكەر عاليا زۇلحارنايەۆا.

وسىلايشا اۋىل كاسىپكەرىنىڭ زاڭدىق مۇددەسى قورعالىپ، كاسىبىنىڭ ءناسىبىن كورۋدە.